जनकपुरधाम– नेकपा एकीकृत समाजवादीका अध्यक्ष माधवकुमार नेपालले प्रदेश सरकारहरुको नेतृत्वमा आलोपालो हुने बताएका छन्।
पार्टीनिकट समाजवादी प्रेस संगठन नेपाल धनुषाले शुक्रबार आयोजना गरेको पत्रकार सम्मेलनमा बोल्दै अध्यक्ष नेपालले प्रदेश सरकारहरुको नेतृत्वमा दलहरुका बीचमा आलोपालो हुने बताएका हुन्। उनले प्रदेश सरकारहरु धमाधम परिवर्तन हुन थालेका भन्दै एकीकृत समाजवादी पनि प्रदेश सरकारमा सामेल हुने बताए।
जनमत नै मिलेर सरकार बनाउने रहेको उल्लेख गर्दै नेपालले पार्टीको संख्यात्मक कुरालाई ध्यानमा राखी गठबन्धनका दलहरुका बीचमा बाँडफाँट हुने बताए। कुनै एक दलको बहुमत नरहेकाले सरकार निर्माणमा अन्य पार्टीको भावनालाई पनि ध्यान दिनुपर्ने बताए।
नेपालले भने– कसैकसैले के भन्छन् भने आलोपालो गर्नु हुँदैन। यो संसारमा कहीँ सम्भव छ ? यो कुरा उठाउने मान्छेले पनि मौका पाएको भए छोड्थ्यो? अरुलाई बडो उपदेश दिने मान्छेहरु।
जब जनताले नै भने कि तपाईहरु मिलेर गर भनिसकेपछि कुनै एउटा पार्टीको बहुमत नहुँदाखेरी गर्छन् के? किनकि त्यो पार्टीसँग पनि कार्यकर्ता हुन्छन्। जनमत पनि हुन्छ। त्यसो हुनाले अरु पार्टीको भावनालाई पनि ध्यानमा राख्नुपर्छ। नीतिमा मिल्नुपर्छ। नीति र कार्यक्रम मिल्नुपर्यो। त्यसपछि पार्टीको सन्तुलनलाई पनि ध्यानमा राख्नुपर्यो। त्यसकारण हाम्रो पार्टी प्रदेश सरकारहरुमा सहभागी हुनेछ। कसरी हुन्छ ? कतिजना हुन्छ ? भन्ने कुराहरु बसेर छलफल भइसकेपछि टुंगो लाग्नेछ। एउटै पार्टीको बहुमत नभएको हुनाले अरु पार्टीको संख्यात्मक कुरालाई ध्यानमा राखेर अरुले पनि दाबी गर्ने स्थितिमा गठबन्धनका अरु घटकले पनि मौका पाउनेछन्। यसमा को–को सहभागी हुने हुन् अझै स्पष्ट छैन।
समाजवाद बाहेक नेपालको विकासको अर्को कुनै सम्भावना छैन। समाजवाद भनेको समानता र सामाजिक न्याय, विकास र समृद्धिको अर्को नाम हो। त्यसमा प्रतिवद्ध भएको पार्टीहरुको बीचमा हामी समाजवादी मोर्चा बनाउने सोच बनाइरहेका छौँ। यसको निम्ति नेकपा(एकीकृत समाजवादी), नेकपा(माओवादी केन्द्र) र जनता समाजवादी पार्टीलाई एकताबद्ध गर्नुको साथसाथै नेकपा विप्लव समूहसँग पनि कुरा भएको छ।
अरु पार्टीहरुसँग पनि हामी कुरा गर्न गइरहेका छौँ। यो समाजवादी मोर्चा बनेको खण्डमा एकातर्फ समाजवादप्रतिको हाम्रो प्रतिबद्धतालाई र राज्यमा सुशासनको प्रत्याभुति गर्ने कुरालाई, जनताको पिर मर्कालाई सम्बोधन गर्ने कुरालाई त्यसले केन्द्रबिन्दुमा राख्नेछ। साझा विषयमा सहकार्य गर्न हामी सबैसँग हातेमालो गर्नेछौँ। विचार, सिद्धान्त, नीति मिलेका पार्टीहरुका बिचमा पार्टी एकताको पहल गर्नेछौँ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1789631269.jpg)
