काठमाडौं- उपप्रधानमन्त्री तथा गृहमन्त्री नारायणकाजी श्रेष्ठले सरकारले नागरिकता विधेयक छिट्टै संसदमा पेस गर्ने दाबी गरेका छन्। राष्ट्रपतिसमक्ष प्रमाणीकरणका लागि पुगेको नागरिकता विधेयक संविधान र कानुनअनुसार अघि बढाउन नमिल्ने भएकाले सरकारले नयाँ शिराबाट त्यो विधेयक छिट्टै संसदमा ल्याउने तयारी गरेको उनले बताए।
बुधबार प्रतिनिधि सभा बैठकमा सांसदहरुले उठाएको प्रश्नको जवाफ दिने क्रममा उपप्रधानमन्त्री श्रेष्ठले सांसदहरुले भनेजस्तो राष्ट्रपति समक्ष प्रमाणीकरणका लागि पुगेको सो विधेयकलाई कानुन, संविधान र नियमावली अनुसार प्रमाणीकरण गरेर जान उपयुक्त र उचित नहुने निष्कर्षमा सरकार पुगेको पनि जानकारी गराए।
उनले नागरिकता विधेयकमा सरकारले राष्ट्रिय सहमतीमा जोड दिन चाहेको पनि स्पष्ट पार्दै यदि राष्ट्रिय सहमति भएन भने पनि संसदबाट पारित गराएर संविधानअनुसार नागरिकता पाउनेहरुलाई नागरिकता दिन सरकार प्रतिवद्ध रहेको उपप्रधानमन्त्री श्रेष्ठले बताए। सरकारले अब संसदमा ल्याउने नागरिकता विधेयक संसदबाट छिट्टै पारित हुने पनि उनले बताए।
‘नागरिकताको विषय केही सांसदहरुले उठाउनुभएको छ। त्यो विधेयक यसअघि प्रमाणीकरणका लागि राष्ट्रपति कार्यालय पुगेको पनि थियो। तर राष्ट्रपतिले प्रमाणीकरण नगर्या हो। अहिलेका राष्ट्रपतिले गरिदिए भइहाल्यो नि भन्नु भयो तर अहिले मिल्दैन,’ उनले भने, ‘त्यो स्थिति हामीले कानुन, संविधान, नियमावली सबै हेर्दा त्यो उचित र उपयुक्त हुँदैन भन्ने कानुनी कोणबाट कुरा आइसकेपछि हामीले नयाँ शिराबाट विधेयक ल्याउनुपर्ने भएको छ।’
त्यसकारण नयाँ शिराबाट नै विधेयक ल्याउने तयारी सरकारले गरेको उनले बताए। ‘यसमा हामीले सहमतिको निम्ति प्रयत्न गर्नु आवश्यक छ। नागरिकता अत्यन्तै संवेदनशील विषय हो। नागरिकता जस्तो संवेदनशील विषयमा राष्ट्र विभाजित हुनु हुँदैन,’ उनले भने, ‘त्यसको निम्ति अझै पनि अपिल गर्नु, त्यसको निम्ति छलफल गर्नु, सकेसम्म सहमतिमा ल्याउन प्रयत्न गर्नु राष्ट्रिय आवश्यकता हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
