अर्थमन्त्री महत (फाइल तस्बिर)
काठमाडौं– राष्ट्रिय सभाको बैठकमा अर्थमन्त्री प्रकाशशरण महत उपस्थित नभएको भन्दै एमाले सांसद्हरुले विरोध गरेपछि बैठक स्थगित गरिएको छ। बैठक १४ मिनेटपछि बस्नेगरी स्थगित गरिएको हो।
राष्ट्रिय सभामा एकीकृत समाजवादीकी सांसद् गरिमा शाहले वर्तमान आर्थिक समस्याका विषयमा सार्वजनिक महत्वको प्रस्ताव राखेकी छिन्। जुन प्रस्तावमा छलफल गर्ने क्रममा एमाले सांसद्हरुले अर्थमन्त्री महतको उपस्थिति खोजेका हुन्।
‘यति जरुरी सार्वजनिक महत्त्वको प्रस्तावमा हामी छलफल गरिरहेका छौँ। तर अर्थमन्त्री कहाँ बसेर सुनिरहनुभएको छ? यो सदनको गरिमाका लागि सदनमा उपस्थित भएर सुनिदिने कसले हो? उहाँको उपस्थिति हुँदैन भने हामीले यहाँ छलफलमा सहभागी नहुने कुरा अवगत गराउन चाहन्छौँ,’ एमालेका सांसद् भैरवसुन्दर श्रेष्ठले भने।
उनले अर्थमन्त्रीलाई पनि सहभागी गराउन माग गरे।
अध्यक्ष गणेशप्रसाद तिमिल्सिनाले भने अर्थमन्त्रीले आधा घण्टा ढिला हुने जानकारी गराएको बताए। सदनमा बोलिएका विषयको टिपोट भएको र अर्थमन्त्रीले प्रस्ताव पनि अध्ययन गरिसकेको उनको भनाइ थियो। उनले बैठकमा धैर्यपूर्वक बस्न आग्रह समेत गरेका थिए।
एमालेका सांसदहरुको केहीबेरको सवालजवाफपछि अध्यक्ष तिमिल्सिनाले बैठक स्थगित गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
