३ वटै क्षेत्रमा मंसिर ४ को निर्वाचनभन्दा कम मतदान

निर्वाचन विशेष

नेपाल लाइभ आइतबार, वैशाख १०, २०८० १७:४८

काठमाडौं– प्रतिनिधि सभाको उपनिर्वाचन भएका तीनवटै क्षेत्रमा मंसिर ४ को भन्दा कम मत खसेको निर्वाचन आयोगले जनाएको छ। निर्वाचन आयोगको प्रारम्भिक तथ्यांकअनुसार तनहुँमा सवैभन्दा कम ५१ प्रतिशत मत खसेको छ।

तनहुँमा यसअघि ५४ दशमलव ३ प्रतिशत मत खसेको थियो। मंसिर ४ को निर्वाचनमा सत्ता गठबन्धनबाट नेपाली कांग्रेसका उम्मेदवार रामचन्द्र पौडेल निर्वाचित भएका थिए। उनी राष्ट्रपति बनेपछि उपनिर्वाचन भएको हो। कांग्रेसका तर्फबाट सत्ताधारी दलको समर्थनमा गोविन्द भट्टराई उम्मेदवार छन्। उनलाई रास्वपाका स्वर्णिम वाग्ले र एमालेका सर्वेन्द्र खनालले चुनौती प्रस्तुत गरेका छन्।

यसैगरी चितवनमा यसपल्ट ६० प्रतिशत मत खसेको छ। मंसिर ४ मा ६७ दशमलव ६३ प्रतिशत मत खसेको थियो। राष्ट्रिय स्वतन्त्र पार्टीका सभापति रवि लामिछानेले नै उक्त निर्वाचन क्षेत्रमा जितेका थिए। नागरिकता विवादमा अदालतले उनको सांसद पद खारेज गरेपछि फेरि चुनाव भएको हो। रविलाई यसपल्ट सत्ता गठबन्धनबाट कांग्रेसका जितनारायण श्रेष्ठ र एमालेका रामप्रसाद न्यौपानेले चुनौती दिएका छन्।

बारा- २ मा ६१ प्रतिशत मत खसेको छ। यसअघि ६३ दशमलव ५६ प्रतिशत मत खसेको थियो। बारा २ बाट मंसिर ४ मा जनता समाजवादी पार्टीका रामसहाय प्रसाद यादवले चुनाव जितेका थिए। यादव उपराष्ट्रपति भएपछि सोही पार्टीका अध्यक्ष उपेन्द्र यादव उक्त क्षेत्रबाट उम्मेदवार छन्। उनलाई जनमत पार्टीका शिवचन्द्र कुशवाह, रास्वपाका रमेश खरेल र एमालेका पुरुषोत्तम पौडेलले चुनौती दिएका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

नमोबुद्धका बालबालिकामा ‘हेपाटाइटिस’ सङ्क्रमण

जुम्ला–रारा म्याराथन भोलि देखि, ५९१ धावक सहभागी हुँदै

तोलामा एक हजार ४ सयले घट्यो सुनको मूल्य, चाँदीको कति ?