काठमाडौं– बुटवलमा १ हजार ७० सिट क्षमताको सभाहल निर्माणमा ९६ करोड ४० लाख रूपैयाँ खर्च भएको महालेखा परीक्षकको कार्यालयले जनाएको छ।
उक्त सभाहलको निर्माण सम्पन्नपश्चात उद्घाटन भएपनि हल सञ्चालनका लागि आवश्यक व्यवस्था गरेको नपाइएको महालेख परीक्षकको कार्यालयको ६०औं प्रतिवेदनमा उल्लेख छ।
ललितपुरको गोदावरीमा ३ हजार सिट क्षमता भएको सभाहल निर्माणमा ८० करोड २७ लाख १६ हजार खर्च भएको छ। सभाहल निर्माण गर्न १४३ रोपनी १ आना ३ पैसा जग्गा उपलब्ध गराउने निर्णय भएको र ४३ रोपनीमा निर्माण भएको तथा बाँकी जग्गा अतिक्रमण भई टहरा निर्माण भएको देखिन्छ।
पन्ध्रौँ आवधिक योजनाले नयाँ सहर आयोजनालाई रुपान्तरणकारी आयोजनाको रुपमा घोषणा गरेको थियो। जसअन्तर्गत पुष्पलाल (मध्यपहाडी) लोकमार्ग र यसका आसपासमा पर्ने प्रमुख १० स्थानमा २०८६–०८७ सम्म प्रतिसहर कम्तीमा १ लाख जनसंख्या बसोबास गर्न सक्ने अत्याधुनिक सेवा सुविधा सम्पन्न सहरहरू निर्माण गर्ने उद्देश्यले २०६६–६७ देखि नयाँ सहर आयोजना सुरु भएको थियो।
सुरुमा १० स्थानमा नयाँ सहर स्थापना गर्नेगरी छनोट भएकोमा हाल २७ स्थानमा नयाँ सहर, १० हिमाली सहर, १७ स्मार्ट सिटीसहित ५४ नयाँ सहरको विकासका लागि एकीकृत जग्गा विकास, पूर्वाधार विकास लगायतका कार्यको विस्तृत आयोजना प्रतिवेदन तयार गर्ने कार्य भइरहेको महालेखा परीक्षकको प्रतिवेदनले जनाएको छ।
हालसम्म ९ स्थानमा ७७७ रोपनी जग्गामा मात्र जग्गा विकास कार्यक्रम सञ्चालन भएको देखिन्छ। पूर्वघोषित आयोजनाको कार्य समाप्त नहुँदै नयाँ सहर आयोजना थप्दै जाने प्रवृत्तिले वर्षौंसम्म आयोजनाको कार्य अधुरो नै रहने अवस्था रहेको जनाएको छ।
भवन निर्माण विभागबाट प्राप्त विवरण अनुसार सात प्रदेशमा ४३ ओटा सभाहल निर्माण गर्ने योजना रहेकोमा ११ सभाहल निर्माण कार्य सम्पन्न भएको १८ निर्माणाधीन र १४ सभाहलका लागि जग्गा प्राप्ती भएर निर्माण कार्य भइरहेको जनाएको छ।
यी ४३ सभाहलमध्ये २९ सभाहल निर्माणका लागि १८ अर्ब १६ करोड १० लाखको लागत अनुमान रहेकोमा ९ अर्ब ८३ करोड ३३ लाख खर्च भएको महालेखा परिक्षकको प्रतिवेदनले देखाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
