रामेछापमा बोलेरो दुर्घटना: मृतक चारै जनाको सनाखत

समाचार

रासस बिहीबार, चैत २३, २०७९ १९:५३

मन्थली– रामेछापको मन्थली नगरपालिका वडा नम्बर ७ को कौछिनी (मगरगाउँ) नजिक भएको बोलेरो जीप दुर्घटनामा मृत्यु हुने चारै जनाको सनाखन भएको छ।

रामेछापको सदरमुकाम मन्थलीबाट दिउँसो मन्थली नगरपालिका–७ स्थित कौछिनीतर्फ जाँदै गरेको वा ११ च ५५३ नम्बरको बोलेरो सडकबाट करिब १०० मिटर तल खस्दा घटनास्थलमै मृत्यु हुनेमा मन्थली नपा–७ की ८२ वर्षीया नन्दमाया भण्डारी, सोही वडाकी ५५ वर्षकी ज्ञानदानी तामाङ, ६८ वर्षका जेनसुन तामाङ र सुनापति गाउँपालिका–१ गुन्सीकी आठ वर्षीया लाक्पा घिसिङ रहेका छन्।

दुर्घटनामा परी घाइते हुने ११ मध्ये चालकसहित दुईको अवस्था गम्भीर रहेको र उनीहरूको मन्थली अस्पताल र रामेछाप सामुदायिक अस्पतालमा उपचार भइरहेको छ। घुम्तीमा मोड्ने क्रममा ब्रेक नलागेपछि बोलेरो कौछिनीको मगरगाँउ नजिकको सडकबाट करिब १०० मिटर तल खसेको प्रहरीको प्रारम्भिक अनुमान रहेको छ।