कर्णाली प्रदेश सभामा दुई विधेयक टेबुल

राजनीति

रासस आइतबार, चैत १९, २०७९ २१:४६

सुर्खेत– कर्णाली प्रदेश सभामा दुई वटा विधेयक टेबुल गरिएको छ। सभाको दोस्रो कार्यकालको पहिलो अधिवेशनको दशौँ बैठकका क्रममा आइतबार प्रदेश सभामा विधेयक टेबुल गरिएको हो।

कर्णाली प्रदेश सभाका सभामुख नन्दा गुरुङले सभामा टेबुल गर्न समय दिएसँगै प्रदेश सरकारका आन्तरिक मामिला तथा कानुनमन्त्री कृष्णबहादुर जीसीले ‘कर्णाली प्रदेश प्रशिक्षण (स्थापना र सञ्चालन) सम्बन्धमा व्यवस्था गर्न बनेको विधेयक’ सभामा टेबुल गरे।

त्यस्तै, सामाजिक विकासमन्त्री टेकराज पछाईंले ‘कर्णाली प्रदेश खेलकुद विकास ऐन, २०७६ लाई संशोधन गर्न बनेको विधेयक’ प्रदेश सभामा टेबुल गरे। प्रदेश सरकार गठनको तीन महिनापछि सभामा पहिलो पटक दुई वटा विधेयक टेबुल गरिएका छन्। प्रदेश सभाको अर्को बैठक यही चैत २२ गते दिउँसो ३ बस्नेछ।