काठमाडौं– आगामी वैशाख १० गते हुने बारा- २ को उपनिर्वाचनमा गत मंसिर ४ मा पराजित उम्मेदवारहरुबीच प्रतिस्पर्धा हुने भएको छ। उक्त क्षेत्रमा उम्मेदवार बन्न लागेका उपेन्द्र यादव, रमेश खरेल र शिवचन्द्रप्रसाद कुशवाहा मंसिर ४ मा सम्पन्न निर्वाचनमा पराजित भएका व्यक्ति हुन्।
गत ४ मंसिरको निर्वाचनमा जनता समाजवादीका अध्यक्ष यादव सप्तरी- २, तत्कालीन नेपाल सुशासन पार्टीका अध्यक्ष खरेल काठमाडौं- १ र तत्कालीन माओवादी केन्द्रका कुशवाहा बारा- २ बाट पराजित भएका थिए। अहिले यी तीनै जना यो क्षेत्रबाट उम्मेदवार बन्दैछन्।
बारा- २ का सांसद रामसाहायप्रसाद यादव उपपराष्ट्रपति भएपछि उक्त क्षेत्रमा उपनिर्वाचन हुन लागेको हो।
यादव उपराष्ट्रपति भएपछि पुन: प्रतिस्पर्धामा उत्रिएका कुशवाहा
जनमत पार्टीबाट उम्मेदवार बनेका कुशवाहा मंसिर ४ को निर्वाचनमा सोही क्षेत्रबाट तत्कालीन सांसद यादवसँग पराजित भएका थिए। करिब ४ सय मतान्तरले पराजित कुशवाहा उक्त समयमा भने फरक पार्टीमा थिए।
तत्कालीन निर्वाचनमा कुशवाहा माओवादी केन्द्रबाट उम्मेदवार बनेका थिए। उनी नेपाली कांग्रेस लगायतको तत्कालीन गठबन्धनका साझा उम्मेदवार थिए। तर आसन्न निर्वाचनमा कुशवाहाले उक्त पार्टीबाट उम्मेदवारी पाउने सम्भावना नरहेको बुझेपछि जनमत पार्टीमा प्रवेश गरेर उम्मेदवारी दिन लागेका हुन्।
उनले तत्कालीन निर्वाचनमा १३ हजार ४६८ मत पाएका थिए। उक्त निर्वाचनमा जित निकालेका यादवले भने १३ हजार ८२२ मत प्राप्त गरेका थिए।
सप्तरी- २ बाट पराजित यादव बारा- २ मा
जसपा अध्यक्ष उपेन्द्र यादव लोकतन्त्रपछिका सबै निर्वाचनबाट संसद् छिर्ने मौका पाएका कमै नेतामध्येका हुन्। तर मंसिर ४ को निर्वाचनले उनको उक्त निरन्तरतालाई ब्रेक लगायो। सप्तरी- २ बाट पराजित भएका थिए। तर उनले संसद् यात्राका लागि अर्को ५ वर्ष कुर्ने धैर्यता राख्न सकेनन्। त्यसलाई मूर्तरुप दिन प्रतिस्पर्धा गर्नका लागि बारा- २ पुगेका छन्।
आफ्नै विश्वासिला पात्र रामसहाय यादवलाई उपराष्ट्रपति बनाएर निर्वाचन क्षेत्र खाली गरी बारा- २ पुगेका हुन्। त्यसअघि मंसिर ४ को निर्वाचनमा उनि जनमत पार्टीका अध्यक्ष सीके राउतसँग करिब १८ हजार मतान्तरले पारजित भएका थिए। राउतले ३५ हजार ४२ मत प्राप्त गर्दा यादवले १६ हजार ९७९ मत पाएका थिए।
मंसिर ४ को निर्वाचनमा एमालेको समर्थन पाएका यादवलाई आसन्न निर्वाचनमा भने कांग्रेस, माओवादी केन्द्र, एकीकृत समाजवादी लगायतका दलको समर्थन छ। गठबन्धन फेरेर उम्मेदवारी दिएका यादव आफ्नो जित सुनिश्चित गर्न यादव बाहुल्य क्षेत्र बारा- २ मा पुगेका हुन्।
काठमाडौं- १ बाट पराजित खरेल जित निकाल्न आफ्नो ‘आधार क्षेत्रमा’
रमेश खरेल प्रहरीको उच्च अधिकारी भएर निवृत्त व्यक्ति हुन्। खरेल तराई क्षेत्रका लागि पनि परिचत अनुहार हुन्। बाराको सीमावर्ती जिल्ला पर्सा जिल्ला इन्चार्ज भएर काम गरेका खरेलको खरो स्वभावका कारण उनी त्यस क्षेत्रमा पनि परिचित छन्। सीमा नाकाबाट हुने तस्करी, अपराध तथा तराईका क्षेत्रमा लगाइने अवैध गाँजा खेतीविरुद्ध खरेल आक्रामक भएर प्रस्तुत भएका थिए। तराईमा आफू परिचित अनुहार भएकाले त्यसको फाइदा उपनिर्वाचनमार्फत लिने दाउमा अहिले खरेल मधेस झरेका हुन्।
खरेल मंसिर ४ को निर्वाचनमा काठमाडौं- १ बाट नेपाल सुशासन पार्टीबाट प्रतिनिधि सभामा प्रतिस्पर्धामा थिए। उनी नेपाली कांग्रेसका प्रकाशमान सिंहसँग पराजित भए। ७१४३ मत ल्याएर कांग्रेसका प्रकाशमान सिंह विजयी हुँदा ३१२४ मत ल्याउँदै खरेल चौथो भएका थिए।
तर, आसन्न निर्वाचनमा उनी दल बदलेर राष्ट्रिय स्वतन्त्र पार्टीबाट उम्मेदवार बनेका छन्। त्यसो त उनी मंसिर ४ को निर्वाचनबाटै रास्वपाको समर्थनमा संसद् छिर्ने दाउमा थिए। उनी र उक्त पार्टीका सभापति रवि लामिछानेबीच काठमाडौं- १ मा रास्वपाले उम्मेदवार खडा नगर्ने र खरेललाई समर्थन गर्ने भन्ने समझदारी भएको तर लामिछानेले उल्लंघन गरेकोले खरेलले आक्रोश व्यक्त गरेका थिए।
अन्तत्वगतवा उनै खरेल लामिछानेकै दलबाट बारा- २ मा खडा भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779880470.png)
-1764146706.png)
-1779545841.jpg)
