काठमाडौं– उपप्रधान तथा गृहमन्त्री नारायणकाजी श्रेष्ठले मित्रताको आधारमा सम्बन्ध राख्दै काम गरिने बताएका छन्। प्रहरीदेखि कर्मचारी र सेवाग्राही सबैसँग मित्रताको सम्बन्ध राख्दै काम गरिने र काममा बाहनाबाजी र छुट भने कसैलाई नहुने बताएका छन्।
जिम्मेवारी सम्हाल्दै गृहमन्त्रालयमा कर्मचारीहरुलाई निर्देशन दिँदै मन्त्री श्रेष्ठे उक्त कुरा बताएका हुन्। आफू समयको पालनामा धेरै सजक रहेको सबैले समयको पालना गर्नुपर्ने बताए।
‘देश पछाडी पर्नुको कारणमध्ये एक समयको पालना नगर्नु पनि हो। त्यसलाई सच्याउनुपर्छ। कुनै पनि हालतमा समयको अवज्ञालाई म छुट दिन्नँ। त्यसमा सबैको ध्यान जाओस्। समयमा गर्नुपर्ने काम सकिएन भने त्यसको कारण मलाई चाहिन्छ। काम नगर्ने प्रवृति अब सह्य हुँदैन,’ गृहमन्त्री श्रेष्ठले भने।
अर्कोतर्फ पद भनेको केवल जिम्मेवारी मात्रै भएकाले त्यसलाई त्यही अनुसार बुझ्नुपर्ने उनले बताए। ‘मेरो पदले मलाई जिम्मेवारी मात्रै दिएको हो। तर हामीलाई हाकिमी पारा देखाउने छुट छैन। पदलाई अन्यथा प्रयोग गर्ने छुट कसैलाई छैन। पदलाई जिम्मेवारी पालनाको पथमा मात्रै बुझौं। पदको अधाारमा व्यक्तिहरुलाई होच्याउने काम नगरौं। सम्बन्ध मित्रका आधारमा हुन्छ तर काममा छुट हुँदैन’ उनले भने।
त्यसैगरी नखाने मेन्युको सूचीमा अर्को एक चिज घुस पनि थपिएको उनले बताए। ‘माछामासु, रक्सी, चिया, चुरोट, पानसुपारी खान्नँ। अर्को एक क्याटागोरी खान्नँ घुस, उपहार, चाकरी। चाकरी गरेर केही हुन्छ भन्ने ठाने कुरो बिग्रियो भनेर बुझ्नुस्,’ गृहमन्त्री श्रेष्ठले भने।
आफू मातहतको राष्ट्रिय परिचयपत्रलाई व्यवस्थित गरिने, अध्यागन विभाग र कार्यालयलाई अझ व्यवस्थित गरिने पनि उनले बताए। अर्थतन्त्रको अवैधानिक पक्षलाई न्यूनीकरण गर्न लाग्ने, अवैधानिक व्यापार बन्द गरिने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
