काठमाडौं- संघीय, प्रदेश र स्थानीय तहको निर्वाचनका समयमा नेपाली कांग्रेसको घोषणा पत्र लेख्ने समूहका दुई नेताले पार्टी छाडेका छन्। संघ र प्रदेशको निर्वाचनमा कांग्रेसको घोषणपत्र निर्माणमा संयोजनकारी भूमिका खेलेका अर्थशास्त्री डा स्वर्णिम वाग्लेले बिहीबार पार्टीबाट अलग्गिएको बताएका छन्।
विसं २०४२ सालको ‘सत्याग्रह’ र २०४६ को जनआन्दोलनदेखिको आफ्नो संलग्नता एवं ५० वर्षदेखिको पारिवारिक विरासत गाँसिएको नेपाली कांग्रेस पार्टीबाट अलग हुने निर्णय लिनुपर्ने अवस्था आएको उनले बताएका छन्।
‘पछिल्ला वर्षहरुमा कांग्रेस पार्टीभित्रका गतिविधिहरु नियालेका प्रत्येक स्वाभिमानी कांग्रेसजनको शीर निहुरिने अवस्था आएको छ। जननायक बीपी कोइराला, गणेशमान सिंह, सुवर्ण शमशेर र किशुनजीको ऐतिहासिक दल अहिले दाई-भाउजु-साला-भतिजको अक्षम गिरोहमा परिणत हुने क्रममा छ,’ उनले भनेका छन्।
राष्ट्रिय स्वतन्त्र पार्टी (रास्वपा)मा प्रवेश गर्ने उक्त पार्टीका एक नेताले जानकारी दिएका छन्। वाग्ले कांग्रेसको संघ र प्रदेशको निर्वाचनका लागि निर्माण गरिएको घोषणा पत्रको मस्यौदा उपसमितिका संयोजक थिए। उनले पार्टीमा ३० वर्षदेखि परोक्ष र गत १० वर्षदेखि प्रत्यक्ष रुपमा आर्थिक नीति र योजना, बौद्धिक-सैद्धान्तिक विमर्श र प्रशिक्षण एवं अन्तर्राष्ट्रिय वैधताको विस्तारमा उल्लेख्य योगदान गरेको दाबी गरेका छन्।
महामन्त्री विश्वप्रकाश शर्मा नेतृत्वको घोषणा पत्र मस्यौदा उपसमितिको नेतृत्वदायी भूमिका खेलेका वाग्लेले कांग्रेस सभापति शेरबहादुर देउवा र देउवापत्नी तथा कांग्रेस नेतृ आरजु राणाको व्यवहारबाट आजित भएर पार्टीबाट बाहिरिएको बताएका छन्।
डा वाग्लेले गत निर्वाचनमा चितवन-१ बाट निर्वाचन लड्न चाहेका थिए। तर, देउवाले आफूनिकट विश्व पौडेललाई उक्त क्षेत्रको टिकट दिए। पौडेल रास्वपाका हरि ढकालसँग पराजित भएका थिए।
यसअघि स्थानीय तहको निर्वाचनमा महामन्त्री गगन थापाको संयोजकत्वको घोषणा पत्र मस्यौदा समितिमा बसेर काम गरेका मनिष झाले पार्टी परित्याग गरेका थिए। स्थानीय तहको चुनावलगत्तै उक्त पार्टीबाट अलग्गिएका उनले रास्वपा ज्वाइन गरेका थिए। रास्वपाबाट उनी समानुपातिकबाट सांसद् निर्वाचित भएका छन्।
डा वाग्ले पनि उक्त पार्टीबाट सांसद् बन्नका लागि कांग्रेसबाट अलग्गिएका हुन्। उनी तनहुँ-१ बाट उपनिर्वाचनमा उम्मेदवार बन्ने रास्वपाले जनाएको छ। कांग्रेस नेता रामचन्द्र पौडेल राष्ट्रपति बनेपछि उक्त क्षेत्रमा उपनिर्वाचन हुँदैछ। रास्वपाका एक नेताका अनुसार डा वाग्लेलाई पार्टीले उक्त क्षेत्रबाट उम्मेदवार बनाउनेछ।
नेपाली कांग्रेसमा पार्टीभित्र नयाँ मान्छेले इन्ट्री पाउनुपर्ने व्यवस्था गर्न जरुरी रहेको महामन्त्री गगन थापाले बताएका थिए। मंसिर ४ को निर्वाचनको पूर्वसन्ध्यामा उनीसँग गरिएको अन्तर्वार्तामा भनेका थिए, ‘किन कोही मान्छे कुनै ठाउँको मेयर हुनको लागि नेपाली कांग्रेसको वर्षौदेखिको सदस्य भएर पार्टीको नेताले प्रमाणित गरेको खल्तीबाटै किन हुनुपर्ने? कुनै युवा वा पुरानो कुनै प्रोफेसनमा रहेको मान्छे आएर ‘मसँग आइडिया छ, म फलानो सहरमा कांग्रेसको तर्फबाट मेयर बन्छु, सांसद हुन्छु' भनेर आयो भने हुनसक्ने व्यवस्था किन नगर्ने?’
थापाले भनेजस्तै फरक पेशाबाट आउने व्यक्तिलाई कांग्रेसमा ‘स्पेश’ बन्न नसकेको वाग्ले र झाको बहिर्गमनले देखाएको छ। वाग्लेले त्यही संकेत गरेका छन्। उनले भनेका छन्, ‘अब कुरेर बस्ने कृपा र निगाहको जीवनपर्यन्त राजनीतिभन्दा समयसीमा तोकेर आफ्नो उमेर, ज्ञान र ऊर्जा सान्दर्भिक रहँदै ‘डेलिभरी’को प्रयोगमा जान चाहेँ।’
उनले कांग्रेसको इतिहास भए पनि नयाँलाई यसभित्र अटाउन ‘रेट्रोफिट’ जरुरी भएको बताएका थिए। ‘नयाँ ढंगले पेन्टिङ गर्नुपर्यो। कहाँ समस्या छ हेर्नुपर्यो। यहाँ अलिकति सुधार गरियो भने पुरानो घरमा मान्छेहरु त आइहाल्छन् नि,’ उनले भनेका थिए।
गएको संसदीय दलको निर्वाचनमा उनले उम्मेदवारीसमेत दिएका थिए। तर, उनी पराजित भए। कांग्रेसमा डा शेखर कोइराला, महामन्त्रीद्वय गगन थापा र विश्वप्रकाश शर्माहरु निर्णायक भएको दिन फर्किन सक्ने उनको संकेत छ। वाग्लेको बहिर्गमनपछि नेपाली कांग्रेसका अर्का नेता गुरुराज घिमिरेले कांग्रेसमा राजनीति गर्ने आधारभूत योग्यता वा मानक सम्पत्ति र नाता मात्र रहेको बताएका छन्।
‘सन् १९११मा रिचर्ड मिसेलले निकालेको निष्कर्ष अनुसार कुलिनतन्त्रको चरित्र हो यो। यसैको दृष्टान्त हो, स्वर्णिमको कांग्रेस परित्याग! कांग्रेसको ढुकढुकी अझै बाँकी छ भने स्वर्णिमलाई घर फर्काउनुस्,अन्यथा राम राम,’ घिमिरेको टिप्पणी छ। उनले यसअघि नै नयाँ वर्षबाट आफ्नो राजनीतिक दिशासमेत नयाँ हुने बताइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821303.jpg)
-1787798469.jpg)
-1786602170.png)
