काठमाडौं- गैरआवासीय नेपाली संघ (एनआरएनए)ले राष्ट्रिय आविष्कार केन्द्रलाई ६३ लाख रुपैयाँभन्दा बढीको सामग्री सहयोग गरेको छ।
सामाजिक साझेदारीको अवधारणाअन्तर्गत एनआरएनएले २०७२ वैशाख १२ गतेको महाभूकम्पपछि गोर्खास्थित लाप्राक वस्ती पुनर्निर्माण गर्न खरिद गरिएका निर्माण उपकरण, औजार र सवारी साधन तथा बालुवाटारस्थित एनआरएनए सचिवालयले खरिद गरेका फर्निचर तथा सामग्रीहरु केन्द्रलाई सहयोगस्वरुप हस्तान्तरण गरेको हो।
सहयोग हस्तान्तरण गर्न बिहीबार संघको केन्द्रीय कार्यालयमा आयोजित समारोहलाई सम्बोधन गर्दै संघकी कार्यकारी अध्यक्ष रबिना थापाले राष्ट्रिय आविष्कार केन्द्र स्थापना गरी मुलुकमा वैज्ञानिक अनुसन्धान, सूचना–प्रविधि तथा समाजका अन्य क्षेत्रमा राष्ट्रको उन्नति र संवर्द्धनका लागि सामाजिक अभियन्ता महावीर पुनले पुर्याएको योगदानको प्रशंसा गरिन्।
संघका अध्यक्ष कुल आचार्यले विदेशमा बसेका नेपालीहरुले आविष्कार केन्द्रलाई यथाशक्य सहयोग गर्दै आएको जनाउँदै पुनको सक्षम नेतृत्वमा मुलुकभित्रै विभिन्न आविष्कार भइरहेकोप्रति खुशी व्यक्त गरे। संघले समृद्ध नेपाल निर्माणका लागि विदेशमा रहेका नेपालीहरुले आ–आफ्नो स्थानबाट सहयोग गरिरहेको भन्दै अध्यक्ष आचार्यले आविष्कार केन्द्रमार्फत मुलुकमा विकास र नवप्रवर्तनका लागि साझेदारी गर्न पाउँदा गौरवान्वित महसुस भएको बताए।
संघका उपाध्यक्ष आरके शर्माले विदेशमा सिकेको ज्ञान र सीपलाई मुलुकमा प्रयोग गर्न फर्कने हुटहुटी सधैं चलिरहने भए पनि विभिन्न कारणवश फर्कन नसकेको बताउँदै महावीर पुनले देशमा फर्केर गरिरहेको कामले एनआरएनहरुलाई प्रेरणा प्राप्त भएको बताए।
संघका प्रवक्ता सोम सापकोटाले मुलुकमा कृषि उपजको आयात बढ्दो क्रममा रहेको अवस्थामा कृषि औजार कारखाना सञ्चालनका लागि आविष्कार केन्द्रले लिएको पहलकदमीले नेपालको कृषि क्षेत्रको विकास तथा प्रवर्धनका लागि थप टेवा पुग्ने विश्वास व्यक्त गरे।
‘कृषिप्रधान देशमा कृषि औजार कारखाना बन्द’
उक्त अवसरमा बोल्दै आविष्कार केन्द्रका संस्थापक महावीर पुनले कृषिप्रधान देश भए पनि गएको तीन दशकदेखि कृषि औजार कारखाना बन्द रहेकाले औजार कारखाना संचालन गर्न सरकारले दिएको जिम्मेवारीलाई आफूले एउटा अवसर र चुनौतीको रुपमा लिएको बताए।
‘किसानहरुले देशभरिबाट फोन गर्नुहुन्छ कृषि औजार कहिले देखि पाइन्छ भनेर। कारखानाको ७० देखि ७५ प्रतिशत सामानहरु मर्मत भै सक्यो तर खेतीपातीको लागि प्रयोग गरिने औजार उत्पादन गर्न भने हामीलाई पुँजीको अभाव छ,’ उनले भने।
कृषि औजार कारखानाको १० बिघा जग्गामध्ये झन्डै ५-६ बिघा जग्गा झाडी र जंगलले भरिएको भन्दै पुनले संघले उपलब्ध गराएको ट्रयाक्टर, लोडर आदि उपकरण प्रयोग गरी त्यहाँ कृषिसम्बन्धी नयाँ प्रविधि परीक्षण गर्ने आफ्नो योजना सुनाए। यसमा सहकार्य गर्न उनले एनआरएनहरुलाई आग्रह पनि गरे।
उनले नेपालमा कस्तो किसिमको कृषि औजारको माग छ भन्ने बारे पनि अनुसन्धान गर्नु पर्ने बताए। उनले संघको निरन्तर सहयोगप्रति धन्यवाद पनि दिए। यसअघि संघले आविष्कार केन्द्रलाई झन्डै १३ लाख रुपैयाँ नगद सहयोग गरेको थियो। त्यस्तै संघका पूर्वअध्यक्ष भवन भट्टद्वारा स्थापित एक करोड राशिको ‘भवन कीर्ति रत्न’ पुरस्कार आविष्कार केन्द्र तथा संस्थापक पुनलाई प्रदान गरिएको थियो।
कार्यक्रमको सञ्चालन संघका प्रवक्ता सोम सापकोटा तथा सचिव गोविन्द प्रसाद गौतमले गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
