काठमाडौं– नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले स्थानीय वस्तु तथा सेवाको उत्पादन एवं बजारीकरणमा मेला महोत्सवको महत्त्वपूर्ण भूमिका रहने बताएका छन्। उनले मेला महोत्सवले अर्थतन्त्रलाई चलायमान बनाउने समेत बताए।
महोत्तरीको बर्दिबासमा आयोजित चौथो बर्दिबास महोत्सवलाई प्रमुख अतिथिको रुपमा सम्बोधन गर्दै वरिष्ठ उपाध्यक्ष ढकालले मेला महोत्सवको मुख्य उद्देश्य नै स्थानीय वस्तु तथा सेवाको उत्पादन, वितरण र बजारीकरण गर्ने रहेको बताए।
‘यसले स्थानीय उत्पादनको बजारीकरण र प्रवर्द्धनमा महत्त्वपूर्ण भूमिका खेल्न सक्छ। स्थानीय उत्पादनहरुलाई उपभोक्ताहरुसम्म पुर्याउँछ। मेला महोत्सवको आयोजनाले स्थानीय अर्थतन्त्रलाई चलायमान समेत गराउँछ’, ढकालले भने।
अहिलेको असहज परिस्थितिमा मेला महोत्सवको आयोजनाको विशेष महत्त्व रहेको बताउँदै ढकालले मेला महोत्त्सवको आयोजनामा महासंघको साथ र सहयोग रहने प्रतिवद्धतासमेत व्यक्त गरे। उनले कोरोनाभाइरस महामारीपछि मुलुकको अर्थतन्त्रमा देखिएका समस्या विस्तारै सहज हुँदै गएको उल्लेख गरे।
‘कोरोनाभाइरसपछि मुलुकको अर्थतन्त्रमा केही समस्या देखिएका थिए। बैंकिङ क्षेत्रमा लगानीयोग्य तरलताको अभाव रहन गयो। रेमिट्यान्सको आप्रवाहमा कमी आयो भने नेपाल आउने पर्यटकको संख्या कम हुँदा विदेशी मुद्रा सञ्चितिमा पनि कमी हुन गयो’, ढकालले भने, ‘तर, अहिले रेमिट्यान्स उत्साहजनक रुपमा बढेको छ। पर्यटनमा पनि सुधार देखिएको छ भने बैंकिङ क्षेत्रमा तरलताको पनि क्रमश: सहजता देखिन थालेको छ। यसले गर्दा अर्थतन्त्रमा सकारात्मक संकेत देखिएका छन्। मलाई विश्वास छ यसमा थप सुधार हुँदै जान्छ।’
व्यवसायीहरुमा धेरै नै नैराश्यता देखिएको बताउँदै उनले व्यवसायीहरुलाई निरास नहुन समेत आग्रह गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772597059.png)
-1764146706.png)
