काठमाडौं- हालका प्रहरी महानिरीक्षक (आईजी) धीरजप्रताप सिंह ३० वर्षे सेवा अवधिका कारण आउँदो चैत १० राति १२ बजेबाट अनिवार्य अवकाशमा जाँदैछन्।
आईजी सिंहसँगै उनका ब्याची एआईजीहरु सहकुल थापा, उत्तमराज सुवेदी, दिवेश लोहनीसहित डीआईजीहरु पनि अनिवार्य अवकाशमा जाँदैछन्। त्यसपछि हाल मात्रै एआईजी बढुवाका लागि सिफारिस भएका एआईजीहरुमध्येबाट एक जना आईजी बन्नेछन्।
सरकारले बसन्त कुँवर, टेकप्रसाद राई, दीपक थापा, श्यामलाल ज्ञवाली र किरण बज्राचार्यलाई एआईजी बढुवाका लागि सिफारिस गरिसकेको छ। अहिलेसम्म बढुवा सिफारिस विरुद्ध कुनै उजुरी नपरेकाले अबको केही दिनमै उनीहरुले एआईजीको दर्ज्यानी चिह्न लगाउनेछन्।
एआईजी भएको एक सातामै उनीहरुमध्येबाट एक जना नेपाल प्रहरीको ३०औं आईजी बन्नेछन्।
पहिलो नम्बरमा बढुवा भएका कुँवर डीआईजी बन्दा पनि पहिलो नम्बरमै बढुवा भएका थिए। हाल उनी मधेस प्रदेश प्रमुखको रुपमा कार्यरत छन्। यसअघि उनले काठमाडौं उपत्यका अपराध अनुसन्धान कार्यालयको समेत जिम्मेवारी सम्हालिसकेका छन्।
नेपाल प्रहरीको केन्द्रीय प्रवक्ता भएर काम गरेका कुँवरले डीआईजी हुँदा कार्य विभागमा रहेर पनि काम गरिसकेका छन्। एसपीमा नुवाकोट लगायतका विभिन्न जिल्लामा रहेर उनले काम गरेका छन्।
सरकारले एआईजी बढुवा गर्दा पनि डीआईजीकै रोल क्रमलाई निरन्तरता दिएकाले कुँवर आईजी बन्नसक्ने सम्भावना बलियो छ। उनी कमाण्ड कन्ट्रोलमा अब्बल मानिन्छन्।
उनीपछि दोस्रो नम्बरमा बढुवा भएका राई लामो समय सादा पोशाकमा काम गरेका प्रहरी अधिकृत हुन्। ३० वर्षे प्रहरी सेवा अवधिको दुई तिहाइ अर्थात् २० वर्षभन्दा बढी राईले बिना बर्दी काम गरेका छन्।
नेपाल प्रहरीको आतंकवाद तथा अन्तरदेशीय अपराधहरुको अनुसन्धान गर्ने विशिष्टकृत इकाई विशेष ब्यूरो दुई दशकभन्दा बढी रहेर काम गरेका राईसँग आतंकवाद तथा प्रतिआतंकवादसम्बन्धी राम्रो ज्ञान छ।
लामो समय बिना बर्दी काम गरेका राईले एसपी हुँदा भने बाँके जिल्लाको इन्चार्ज भएर काम गरेका थिए। एसएसपीमा बढुवा भएपछि जिल्ला प्रहरी परिसर ललितपुर तथा मानव बेचबिखन तथा अनुसन्धान ब्यूरोमा रहेर उनले काम गरेका छन्। केन्द्रीय प्रवक्ता भएर समेत काम गरेका उनी हाल लुम्बिनी प्रदेश प्रमुखको रुपमा कार्यरत छन्।
तेस्रो नम्बर बढुवा भएका थापा हाल बागमती प्रदेश प्रमुखको रुपमा कार्यरत छन्। अहिले एआईजी बढुवा सिफारिस भएकाहरु भन्दा ६ महिनापछि प्रहरी निरीक्षकबाट सेवा प्रवेश गरेका उनी पनि आईजी हुने दौडमा अघि नै छन्।
एसपी हुँदा जिल्ला प्रहरी कार्यालय चितवन, एसएसपी हुँदा काठमाडौं उपत्यका अपराध अनुसन्धान कार्यालय, डीआईजी भएपछि प्रबन्ध महाशाखामा रहेर थापाले सेवा गरेका छन्।
अहिले आईजी नभएको अवस्थामा पनि थापाको आईजी हुने सम्भावना भने कायमै रहन्छ। अहिले एआईजीमा बढुवा भएका चार जना २०५१ चैत ५ गते प्रहरी निरीक्षकमा भर्ना भएका थिए। एकै पटकको आवेदन भए पनि थापासहितका केही प्रहरी अधिकारीलाई भने ६ महिनापछि नियुक्ति दिइएको थियो। जसकारण अहिले आईजी नभए पनि थापाको आईजी बन्ने सम्भावना कायमै रहन्छ।
चौथो स्थानमा बढुवा भएका ज्ञवाली पनि आईजीको प्रतिस्पर्धामा छन्। कोशी प्रदेश प्रहरी प्रमुखको रुपमा कार्यरत रहेका ज्ञवाली कमाण्ड कन्ट्रोलमा राम्रो मानिन्छन्। एसएसपी हुँदा जिल्ला प्रहरी प्रहरी परिसर काठमाडौं प्रमुखको रुपमा समेत ज्ञवालीले काम गरेका थिए। डीआईजी भएपछि कोशी प्रदेश प्रमुख हुनभन्दा अघि त्रिभुवन अन्तर्राष्ट्रिय विमानस्थल कार्यालको प्रमुखको रुपमा ज्ञवालीले काम गरेका थिए।
एसपी हुँदा रुपन्देही जिल्लाको कमाण्ड गर्नुका साथै काठमाडौं उपत्पका अपराध अनुसन्धान कार्यालयमा रहेर समेत काम गरेको अनुभव ज्ञवालीसँग छ।
ज्ञवाली आईजी भएको अवस्थामा नेपाल प्रहरीको इतिहासमा सहोदर दाजुभाइ नै आईजी भएको पहिलो घटना हुनेछ। यसअघि ज्ञवालीका सहोदर दाजु ठाकुर ज्ञवाली नेपाल प्रहरीको आईजी भइसकेका छन्।
पाँचौ नम्बरमा बढुवा सिफारिस भएकी बज्राचार्य पनि नेपाल प्रहरीको इतिहासमा पहिलो पटक आईजीको प्रतिस्पर्धामा गर्ने महिला प्रहरी बनेकी छिन्। यसअघि पार्वती थापा पनि आईजी बन्ने लाइनमा रहे पनि डीआईजीबाट एआईजी बढुवा गर्दा नै बढुवामा छुटेपछि उनी आईजीको प्रतिस्पर्धाबाट बाहिरिएकी थिइन्।
बज्राचार्य भने एआईजी बढुवा भएकाले प्रहरीको इतिहासमा पहिलो पटक आईजीमा प्रतिस्पर्धा गर्ने महिला प्रहरी बनेकी हुन्। यदि उनी आईजी बनेको अवस्थामा नेपाल प्रहरीको इतिहासमा पहिलो महिला आईजी हुनेछिन्।
एसएसपी हुँदा जिल्ला प्रहरी परिसर ललितपुरको प्रमुख भएर काम गरेकी बज्राचार्यले डीआईजी हुँदा बागमति प्रदेश प्रमुख तथा प्रबन्ध महाशाखाको जिम्मेवारी सम्हालेकी छिन्। केन्द्रीय अनुसन्धान ब्यूरो सीआईबी, जिल्ला प्रहरी परिसर भक्तपुर लगाउत ठाउँमा बसेर काम गरेको अनुभव बज्राचार्यको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782043740-1782045652.jpeg)
-1764146706.png)
