काठमाडौं– अन्तर्राष्ट्रिय क्रिकेट परिषद् (आईसीसी) विश्वकप क्रिकेट लिग २ शृङ्खलाअन्तर्गत संयुक्त अरब ईमिरेट्स (यूएई)ले पीएनजीलाई ६ विकेटले पराजित गरेको छ। पीएनजीले दिएको २३५ रनको लक्ष्य यूएईले ३८.४ ओभरमा चार विकेटको क्षतिमा पूरा गर्यो।
यूएईका कप्तान मुहम्मद वासिमले जम्मा ७६ बलमा ११९ रन बनाएका थिए। उनले ६० बलमै शतक बनाउने यूएईको पहिलो ब्याटरका रुपमा रेकर्ड समेत बनाएका छन्। यूएईको जितमा वृत्य अरबिन्दले ३३ रन, चुन्दनग्यापोइ रिजवानले नटआउट ४४ रन र अबजल खानले २७ रनको योगदान गरे।
काठमाडौंको कीर्तिपुरस्थित त्रिवि क्रिकेट मैदानमा टस जितेर ब्याटिङ रोजेको पीएनजीले निर्धारित ५० ओभरमा ७ विकेट गुमाएर २३४ रन बनाएको थियो।
पीएनजीका लागि कप्तान अर्सद भालाले सर्वाधिक ६५ रन बनाए। ९५ बल खेलेका उनले ६ चौका र १ छक्का प्रहार गरे। २२ रनको योगफल हुँदा २ विकेट गुमाएको अवस्थामा ब्याटिङका लागि क्रिजमा आएका भालाले पीएनजीको पारी उकासेका हुन्। भालाले किप्लिन डोरिगासँग तेस्रो विकेटका लागि ४१ रन र चौथो विकेटका लागि चार्ल्स एमिनीसँग ५३ रनको साझोदारी गरे।
ओपनर डोरिगा २४ र एमिनी २२ रनमा आउट भए। अर्का ओपनर हिरी हिरी ४ रन मात्र बनाएर आउट भए। तेस्रो क्रममा ब्याटिङका लागि आएका सेसे बाउले ९ रन जोड्न सके।
गौडी टोकाले १५ रन बनाए। आक्रामक ब्याटिङ गरेका रिले हेकुरे २२ बलमा ३३ रन बनाएर रन आउट भए। नोमान भनुवा ३१ बलमा ४९ रन बनाउँदै अविजित रहे। नवौं ब्याटर चाड सोपर शुन्य रनमा अविजित रहे।
यूएईका लागि हजरत विलला एक्लैले ४ विकेट लिए। १० ओभर बलिङ गरेका उनले ४७ रन खर्चिए। रोहन मुस्तफा र जवार फरिदले समान १–१ विकेट लिए।
आइसीसी लिग टू अन्तर्गतको अन्तिम शृंखलाको अन्तिम खेल बिहीबार नेपाल र यूएईबीच हुँदैछ। बिहीबार पनि खेल जित्दा नेपाल विश्वकप छनोटमा पुग्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770478002.png)
-1764146706.png)
