काठमाडौं– अन्तर्राष्ट्रिय क्रिकेट परिषद् (आईसीसी) विश्वकप क्रिकेट लिग २ शृङ्खलाअन्तर्गत आफ्नो अन्तिम खेलमा पपुवा न्युगिनी (पीएनजी)ले संयुक्त अरब ईमिरेट्स (यूएई)लाई २३५ रनको लक्ष्य दिएको छ।
काठमाडौंको कीर्तिपुरस्थित त्रिवि क्रिकेट मैदानमा टस जितेर ब्याटिङ रोजेको पीएनजीले निर्धारित ५० ओभरमा ७ विकेट गुमाएर २३४ रन बनायो।
पीएनजीका लागि कप्तान अर्सद भालाले सर्वाधिक ६५ रन बनाए। ९५ बल खेलेका उनले ६ चौका र १ छक्का प्रहार गरे।
२२ रनको योगफल हुँदा २ विकेट गुमाएको अवस्थामा ब्याटिङका लागि क्रिजमा आएका भालाले पीएनजीको पारी उकासेका हुन्। भालाले किप्लिन डोरिगासँग तेस्रो विकेटका लागि ४१ रन र चौथो विकेटका लागि चार्ल्स एमिनीसँग ५३ रनको साझोदारी गरे।
ओपनर डोरिगा २४ र एमिनी २२ रनमा आउट भए। अर्का ओपनर हिरी हिरी ४ रन मात्र बनाएर आउट भए। तेस्रो क्रममा ब्याटिङका लागि आएका सेसे बाउले ९ रन जोड्न सके।
गौडी टोकाले १५ रन बनाए। आक्रमक ब्याटिङ गरेका रिले हेकुरे २२ बलमा ३३ रन बनाएर रन आउट भए।
नोमान भनुवा ३१ बलमा ४९ रन बनाउँदै अविजित रहे। नवौं ब्याटर चाड सोपर शुन्य रनमा अविजित रहे।
यूएईका लागि हजरत विलला एक्लैले ४ विकेट लिए। १० ओभर बलिङ गरेका उनले ४७ रन खर्चिए। रोहन मुस्तफा र जवार फरिदले समान १–१ विकेट लिए।
यूएईले जवाफी ब्याटिङ थाल्दा वर्षाका कारण खेल प्रभावित भएको छ। यूएईले २.२ ओभर खेलेर विना विकेटको क्षतिमा १४ रन बनाउँदा हल्का वर्षा सुरु भएपछि खेल रोकिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
