काठमाडौं– काठमाडौं महानगरपालिकाका प्रमुख बालेन्द्र शाह (बालेन) स्वस्थ सहर शिखर सम्मेलनमा भाग लिन बेलायत प्रस्थान गरेका छन्। शाह चैत ५ गते स्वदेश फर्कर्नेछन्। यस अवधिका लागि उपप्रमुख सुनिता डंगोललाई कार्यबाहक प्रमुखको जिम्मेवारी दिइएको छ।
मंगलबार बिहान २ बजेको उडानबाट बेलायत गएका प्रमुख शाहसँग स्वास्थ्य सल्लाहकार डा जगदिश अग्रवाल, २४ नम्बर वडाका वडा अध्यक्ष बिनोद राजभण्डारी र स्वकीय सचिव भुपदेव शाह छन्।
चैत २ गतेसम्म ‘हेल्दी सिटीज समिट इन लण्डन’ शिखर सम्मेलन हुँदैछ। सम्मेलनमा भाग लिन मेयरसँगै, साझेदार सहरबाट प्राविधिक सत्रमा सामेल हुन निमन्त्रणा गरिएको थियो।
ब्लुमबर्ग फिलान्थ्रोपिज र विश्व स्वास्थ्य संगठन आयोजक रहेको सम्मेलनको सह आयोजनामा लण्डनका मेयर छन्। शिखर सम्मेलनले मेयर र सहरका प्राविधिक कर्मचारीहरूलाई गैरसंक्रामक (नसर्ने खालका रोग) र चोट पटकका कारण मानव स्वास्थ्यमा सिर्जना भएको विश्वव्यापी बोझसँग कसरी लड्ने भन्ने विषयमा छलफल हुनेछ। सम्मेलनबाट आएका निचोडले स्वस्थ्य सहर निर्माण गर्न अग्रणी रणनीति प्रदान गर्नेछ।
विश्वमा सहरीकरण तीब्र गतिमा फैलिएको छ। अस्वस्थ्य सहरी आचरण र दुर्घटनाहरु बढ्दै जाँदा सहरी केन्द्रहरूमा बस्ने मानिसहरु नसर्ने रोगका कारण मृत्युवरण गरिरहेका छन्।
हृदय रोग, स्ट्रोक, क्यान्सर, मधुमेह, पुरानो श्वासप्रश्वासका रोग मानव मृत्युको कारण बनेका छन्। विश्वव्यापी रूपमा हेर्दा सबै मृत्युमध्ये ८० प्रतिशत मृत्यु चोटका कारण भइरहेको छ।
सहरहरूमा बसोबास गर्ने मानिसहरू नसर्ने रोगबाट आफूलाई बचाउन कमजोर हुँदै गएका छन्। शिखर सम्मेलनले स्वस्थ्य र जीवन्त सहरहरू निर्माण गर्ने उत्कृष्ट अभ्यासमा छलफल गर्ने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
