सबै मिलेर अर्थतन्त्रमा देखिएको समस्या समाधान गरौं : वरिष्ठ उपाध्यक्ष ढकाल

अर्थ समाचार

नेपाल लाइभ आइतबार, फागुन २८, २०७९ १५:०४

लुम्बिनी– नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले अहिलेको संवेदनशील परिस्थितिमा एकले अर्कोलाई दोषारोपण गर्नुभन्दा सबै मिलेर अर्थतन्त्रमा देखिएको समस्यालाई समाधान गर्नुपर्ने बताएका छन्।

नेपाल उद्योग वाणिज्य महासंघ लुम्बिनी प्रदेशको पाँचौ प्रदेश सभालाई सम्बोधन गर्दै वरिष्ठ उपाध्यक्ष ढकालले भने, ‘अहिले कसैले कसैलाई आरोप लगाउने अवस्था नै छैन। बैंकलाई पनि असजिलो छ। व्यवसायीहरुलाई झन धेरै असजिलो छ। सरकारको पनि राजश्व उठेको छैन। त्यसैले सबैलाई समस्या परेको छ। सबै मिलेर यसको समाधान निकाल्नुको विकल्प छैन।’

उनले महासंघभित्र पनि एकता भयो भने मात्र यो समस्याको समाधान गर्न सहज हुने हुनाले महासंघको आगामी नेतृत्व सर्वसम्मत रुपमा चयन गर्नुपर्ने धारणा व्यक्त गरे।

उनले सरकार, व्यवसायी, उपभोक्ता सबै पक्ष मिलेर अहिले अर्थतन्त्रमा देखिएको समस्या समाधान गर्नुपर्ने बताए। उनले भने, ‘अहिले कुनै व्यक्तिको जित हारको अस्वस्था छैन। समग्र अर्थतन्त्रको जित हारको अवस्था हो। हामी सबै मिलेर अर्थतन्त्रलाई जिताउन पर्नेछ। यसलाई पुनः सही ट्रयाकमा ल्याउनुपर्नेछ। त्यसैले हामी सबै एक हुनुको विकल्प छैन। सबै मिलेर एकसाथ अगाडि बढ्नुको विकल्प छैन। म साथीहरुलाई भन्न चाहन्छु। एक पक्षले अर्को पक्षलाई आरोप–प्रत्यारोप लगाएर मात्र समस्याको समाधान हुन सक्दैन।’

उनले सरकार तथा राजनैतिक दलहरुले आर्थिक अजेण्डालाई प्राथमिकतामा नराखेको गुनासोसमेत गरे। ‘अहिले सरकारले पनि पूर्णता पाइसकेको अवस्था छैन। नयाँ संविधान आइसकेपछि हामीलाई लागेको थियो, अब सायद राजनैतिक अजेण्डा सकिए। आर्थिक अजेण्डाले प्राथमिकता पाउनेछन्। तर, राजनैतिक दलको व्यवहारमा आर्थिक अजेण्डा प्राथमिकतामा नपरेको महशुस हुन्छ,’ उनले भने।

बैंकले लगानी गरेकै कारण व्यवसायीहरुलाई व्यवसाय गर्न सहज भएको बताउँदै उनले बैंकविरुद्धमा आन्दोलन गरेर अहिलेको समस्या समाधान हुन नसक्ने बताए।

उनले अर्थतन्त्रका केही कुराहरुमा सुधार आएको बताउँदै अर्थतन्त्र अहिलेको अवस्थाभन्दा नबिग्रने विश्वास व्यक्त गरे। उनले भने, ‘वैदेशिक रोजगारमा जानेको संख्या पनि बढेको छ। विदेशबाट आउने पर्यटकको संख्या पनि बढ्न थालेको छ। रेमिट्यान्सको आप्रवाह पनि बढेको छ। बैंक तथा वित्तीय संस्थाहरुमा तरलताको अवस्थामा पनि सुधार देखिएको छ। र, आउने दिनमा अर्थतन्त्र योभन्दा धेरै बिग्रिन्छ भन्ने मलाई लाग्दैन। केही न केही सुधार हुने मलाई विश्वास छ।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

शुक्रबारदेखि पुनःबदली र वर्षा हुने

पाकिस्तानः जारी सडक अवरोध र चिकित्सा सङ्कटबीच पाराचिनारमा १०० भन्दा बढी बालबालिकाको मृत्यु

आवश्यकताका आधारमा संविधान संशोधन गर्न सकिन्छ : अध्यक्ष दाहाल