काठमाडौं– प्रधानमन्त्री पुष्पकमल दाहाल प्रचण्डले अब आफूले हाइड्रोजन गाडी चढ्ने योजना बनाइरहेको बताएका छन्। नेपालमा हाइड्रोजन इन्धनको सम्भावना रहेकाले त्यसको सुरुवात गर्नका लागि प्रधानमन्त्री कार्यालयमा छलफल गरिरहेको उनले बताएका हुन्।
मंगलबार सोलुखोला–दूधकोशी जलविद्युत् आयोजनाको काठमाडौंबाट उद्घाटन गर्दै प्रधानमन्त्री प्रचण्डले यस्तो बताएका हुन्। विद्युत् प्राधिकरणका कार्यकारी निर्देशक कुलमान घिसिङले डिजेल र पेट्रोलको विकल्पमा हाइड्रोजन गाडी चढ्न सल्लाह दिएकाले आफूले कार्यालयमा त्यसका लागि छलफल चलाएको उनको भनाइ थियो।
उनले अब विश्व ग्रिन इनर्जीबाट हाइड्रोजनतिर गइरहेकाले त्यसको प्रयोग नेपालले पनि गर्नुपर्नेमा जोड दिए। ‘यो ग्रिन इनर्जीबाट ग्रिन हाइड्रोजन बनाउने सबभन्दा उपयुक्त अवसर हो। म प्रधानमन्त्री बन्दै गर्दा विद्युत् प्राधिकरणको एमडीले मलाई प्रधानमन्त्रीको रुपमा डिजेल र पेट्रोलको गाडीको साटो हाइड्रोजन गाडी चढ्न सल्लाह दिनुभयो। हामीले प्रधानमन्त्री कार्यालयमा छलफल गरेका छौं। म हाइड्रोजन गाडी चढने तयारीमा छु। ताकी अब हामी यो ग्रिन इनर्जीबाट ग्रिन हाईड्रोजनतिर गएर हामीले किसानहरुलाई आवश्यक पर्ने मलखाद उत्पादन गर्नका लागि पनि, यातायात क्षेत्रको लागि पनि, अन्य उद्योगको लागि पनि हामीले एउटा रिभोलुशन ल्याउन सक्ने सम्भावना पैदा भएको छ।’
उनले अहिले विकसित देशहरुमा विस्तारै हाइड्रोजनको प्रयोगको मात्रा गुणात्मक रुपमा वृद्धि हुँदै गएको भन्दै ग्रिन इनर्जीको सम्भावना भएको देशमा भएकाले त्यसो उपभोग गर्ने बताए।
उनले भने, ‘यति धेरै सम्भावना भएको देश छौं हामी भने हामीले यो इनर्जीलाई हाइड्रोजनमा र हाईड्रोजनबाट हामीले तमाम अन्य उद्योग, व्यवसाय, आर्थिक गतिविधिलाई किन अघि नबढाउने?’ प्रधानमन्त्री प्रचण्डले ग्रिन इनर्जीबाट हाइड्रोजन इनर्जीमा गएर मुलुकमा विभिन्न उद्योग, व्यवसाय सञ्चालन गरी आर्थिक गतिविधिलाई अघि बढाउन सकिने स्पष्ट पारे।
यस्तै उनले सबैको सामूहिक विवेक प्रयोग गरेर मुलुकमा देखा परेको आर्थिक संकट समाधान गर्ने बताएका छन्। मुलुकमा देखा परेका आर्थिक संकट समाधानका लागि आफूले केही दिनअघि मात्रै सरोकारवालाहरुसँग छलफल सुरु गरेको र केही दिन भित्र ती समस्याहरुको समाधानको प्रक्रिया अघि बढाउने उनको भनाइ थियो। आफूलाई प्रधानमन्त्रीको रुपमा असफल हुने छुट नरहेको पनि दोहोर्याए।
उनले मुलुकभित्रै पेट्रोल उत्पादन छिट्टै हुने आश्वासन समेत दिए। त्यसका लागि अध्ययन र अनुसन्धानको काम धेरै अघि बढिसकेको प्रधानमन्त्री प्रचण्डको जिकिर थियो।
उनले विद्युत व्यापारबाटै व्यापार घाटा सन्तुलनमा ल्याउन सकिने संकेत मुलुकमा देखा परेको दाबी गरे। मुलुक विद्युत्मा आत्मनिर्भर भएको उल्लेख गर्दै प्रधानमन्त्री प्रचण्डले त्यसलाई बिक्री गर्नका लागि सरकारले भारत र बंगलादेशसँग पनि सहमति गरेको स्मरण गराए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787798469.jpg)
-1786602170.png)
-1786513116.png)
-1788425345.png)
