काठमाडौं- नेपाली कांग्रेसका नेता रमेश लेखकले संक्रमणकालीन न्यायको विषय सरकार वा अमुक पार्टीकोभन्दा पनि राज्यको विषय भएको बताएका छन्।
मंगलबार सिंहदरबारमा पत्रकारहरुसँग उनले प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डविरुद्ध सर्वोच्च अदालतमा परेको रिटका बारेका प्रतिक्रिया दिएका थिए। उनले अदालतमा मुद्दा पर्नै हुन्न भन्ने नभएको बताए।
उनले सर्वोच्च अदालतले द्वन्द्वकालका मुद्दाहरुलाई संक्रमणकालीन न्याय पद्धतिबाट टुंग्याउने हो भन्ने कुरा योभन्दा पहिले पनि बोलिसकेको स्मरण गराए।
‘द्वन्द्वकालमा जति पनि घटनाहरु भए, त्यसमा जसलाई पनि पीडा पुग्यो। ती पीडित र पीडितका परिवारहरुलाई न्याय दिने, परिपुरण दिने र यो विषयलाई तार्किक निष्कर्षमा पुर्याउने विषय भनेको राज्यको विषय हो। राज्यको विषय भन्नेबित्तिकै सरकारको विषय भयो। संसद्को विषय भयो। सबै राजनीतिक दलहरुको विषय भयो। त्यसमा सर्वोच्च अदालत पनि पर्यो’, उनले भने।
उनले संक्रमणकालीन न्यायको विषय टुंग्याउनु राष्ट्रकै महत्त्वपूर्ण काम भएको हुनाले सबै मिलेर सम्पादन गर्नुपर्ने बताए। ‘त्यसैले सर्वोच्च अदालतको भूमिका पनि यसबारेमा सकारात्मक हुन्छ, सहयोगी हुन्छ भन्ने कुरामा मलाई विश्वास छ’, उनले भने।
नेता लेखकले द्वन्द्वकालमा भएका घटनाहरु संक्रमणकालीन न्यायकै प्रबन्धबाट सम्बोधन गर्नुपर्ने बताए। ‘त्यसमा अलिकति हाम्रो कमीकमजोरी भएको छ। धेरै लामो समयसम्म पीडित र पीडितका परिवारहरुले न्याय र परिपुरणका बारेमा गर्नुपर्ने सबै कामहरु सम्पादन भएका छैनन्। तर यसलाई संक्रमणकालीन न्यायकै प्रबन्धबाट गर्ने हो’, उनले भने।
उनले नियमित अदालतबाट फौजदारी न्यायको सामान्य प्रक्रियाबाट संक्रमणकालीन न्यायको विषय निरुपण नहुने बताए। ‘संसारभरको अभ्यास भनेको संक्रमणकालीन न्यायकै प्रबन्धबाट गर्नुपर्छ’, उनले भने।
लेखकले दुईटा काम गर्नुपर्ने बताए। ‘जुन ऐन छ। त्यसमा परिमार्जन गरेर यसलाई विधेयकको रुपमा तत्काल यसै प्रतिनिधि सभा वा संघीय संसद्मा पेश गर्नुपर्यो। र चाँडोभन्दा चाँडो कानुन बनाउनुपर्यो। अर्को कुरा, कानुन बमोजिम आयोग गठन गर्नुपर्यो। सत्य निरुपण तथा मेलमिलाप आयोग र बेपत्ता पारिएका व्यक्तिहरुको छानबिन आयोग गठन गरेर यो कामलाई चाँडोभन्दा चाँडो तार्किक निष्कर्षमा पुर्याउनुपर्छ भन्ने नै हो हाम्रो’, उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
