सरकारको प्रष्टीकरण : विश्वविद्यालय खोल्ने निर्णय भएको छैन, परराष्ट्र नीतिमा आँच पुग्ने अभिव्यक्ति आए

राजनीति

नेपाल लाइभ आइतबार, फागुन २१, २०७९ १९:४९

काठमाडौं– सरकारले मुस्ताङमा विश्वविद्यालय खोल्ने कुनै निर्णय नगरेको बताएको छ। मुस्ताङमा विश्वविद्यालय खोल्न भारतलाई अनुमति दिएको कुरा सञ्चारमाध्यममा सार्वजनिक भएपछि सरकारका प्रवक्ता एवम् सञ्चार तथा सूचना प्रविधिमन्त्री रेखा शर्माले त्यस्तो कुनै निर्णय नभएको प्रष्टीकरण दिएकी हुन्।

आइतबार उनले एक विज्ञप्ति जारी गर्दै मुस्ताङमा बौद्ध विश्वविद्यालय खोल्नेबारे कुनै निर्णय नभएको दाबी गरेकी छन्। शनिबार एक कार्यक्रमका क्रममा नेकपा एमालेका अध्यक्ष तथा पूर्व प्रधानमन्त्री केपी शर्मा ओलीले चीनलाई लक्षित गरी भारतको सहयोगमा मुस्ताङमा बौद्ध विश्वविद्यालय खोल्न लागिएको भन्दै आलोचना गरेका थिए।

त्यसपछि उक्त विषयलाई प्रष्ट पार्न सञ्चारमन्त्रीले आइतबार विज्ञप्ति जारी गरेकी हुन्। मुस्ताङको बारागुङ मुक्तिक्षेत्र गाउँपालिकाले कलेज स्थापनाका लागि भारतीय दूतावासमा पत्र लेखेको जानकारी सार्वजनिक भएको र उक्त विषयमा के कसो भएको हो भन्ने छानबिन गरिने पनि विज्ञप्तिमा उल्लेख गरिएको छ।

‘पूर्वप्रधानमन्त्री एवं नेकपा एमालेका अध्यक्ष केपी शर्मा ओलीको भनाइ भनी सञ्चारमाध्यममा सार्वजनिक भएको समाचारप्रति नेपाल सरकारको गम्भीर ध्यानाकर्षण भएको छ। यस सम्बन्धमा नेपाल सरकारको धारणा स्पष्ट गर्न चाहन्छौं,’ विज्ञप्तिमा भनिएको छ, ‘मुस्ताङको बारागुङ मुक्तिक्षेत्र गाउँपालिकामा सरकारले कुनै अमूक देशको प्रस्तावमा कुनै अर्को देशलाई लक्षित गरी विश्वविद्यालय स्थापना गर्न थालेको भन्ने अभिव्यक्ति पूर्णतः भ्रमपूर्ण रहेको छ । नेपाल सरकारले यससम्बन्धी कुनै निर्णय नगरेको स्पष्ट गर्न चाहन्छौं । यस सम्बन्धमा मुस्ताङको बारागुङ मुक्तिक्षेत्र गाउँपालिकाले कलेज स्थापनाका लागि सहयोग गर्न अनुरोध गर्दै भारतीय दूतावासमा पत्र लेखेको भन्ने समाचार सार्वजनिक भएकाले यस सम्बन्धमा के भएको हो सोको अध्ययन र आवश्यक छानबिन गरी सत्य तथ्य सार्वजनिक गर्ने व्यहोरा जानकारी गराउन चाहन्छौं।'

यस्तै केपी शर्मा ओलीले परराष्ट्र नीतिमाथि आँच पुर्‍याउने गरी अभिव्यक्ति दिएको भन्दै विज्ञप्तिमा दुMख व्यक्त गरिएको छ। प्रधानमन्त्री र सरकारलाई आक्षेप लगाउनेगरी तथ्यहीनरुपमा यस्ता श्रंखलाबद्ध अभिव्यक्तिहरु सार्वजनिक हुनु दुखद भएको बताइएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

ट्रम्प प्रशासनद्वारा युएसएआईडीका प्रमुख निरीक्षक बर्खास्त

पहिले पनि त्यस्तो घटना घटिसकेको अनुभूति अर्थात् डेजा भु: भूत, वर्तमान, कि भ्रम?

शंखरापुर बस दुर्घटना: ज्यान गुमाउनेको सनाखत