काठमाडौं- प्रधानमन्त्री पुष्पकमल दाहाल प्रचण्डले शुक्रबार साँझ राष्ट्रपति निर्वाचनका सन्दर्भमा नयाँ गठबन्धन निर्माण गरे। प्रधानमन्त्री निवास बालुवाटारमा बसेको आठ दलको बैठकले राष्ट्रपतिमा कांग्रेस उम्मेदवारलाई सघाउने निर्णय लियो। लगत्तै शनिबार नै राप्रपाले सरकारबाट बाहिरिने र सरकारलाई दिएको समर्थन पनि फिर्ता लिने निर्णय लियो। तर, एमालेले भने त्यसो गरे। शनिबार बिहान बसेको सचिवालय बैठकले राष्ट्रपतिको उम्मेदवार मात्रै तय गर्यो।
यतिबेला नेकपा एमाले सत्तापक्ष हो। सरकारमै सहभागी दल हो। अझ सरकारमा रहेका दलहरुमध्ये सबैभन्दा ठूलो दल हो। तर प्रधानमन्त्रीले गठबन्धन फेरिसक्दा समेत सरकारमै रहने निर्णय लिएको पार्टीका अध्यक्ष ओलीले आइतबार भने प्रधानमन्त्री प्रचण्डको तीव्र आलोचना गरेका छन्। सामान्यतया आफ्नै दल सहभागी सरकारका प्रधानमन्त्रीको सार्वजनिक आलोचना गर्ने गरिँदैन।
शनिबार राष्ट्रपतिका लागि उम्मेदवारी दर्ता गर्ने समयमा पनि उनले माओवादीको खासै आलोचना गरेका थिएनन्। बरु पुस १० को सहमति अनुसार माओवादीले राष्ट्रपतिमा एमाले उम्मेदवारलाई सघाउने विश्वास व्यक्त गरेका थिए। तर भोलिपल्टै प्रचण्डको विगतदेखि वर्तमान उधिनेर आलोचना गरेका हुन्।
सहिद घाइते तथा बेपत्ता परिवारको कार्यक्रममा सम्बोधन गर्न पुगेका उनले प्रचण्डको नेतृत्वमा सुरु तत्कालीन जनयुद्धलाई हिंसाको अभियान भने। जुन अस्वाभाविक होइन। यसअघि पनि प्रचण्ड र माओवादीसँग सहज सम्बन्ध रहेका बेलामा जनयुद्धका सन्दर्भमा मौन बस्ने वा नरम आलोचना गर्ने तर सम्बन्ध बिग्रिएका बेलामा आक्रोश पोख्ने उनको पुरानै शैली हो। गत फागुन १ गते सरकारले जनयुद्ध दिवसको अवसरमा बिदा दिँदा मौन बसेका उनले बिदा मनाएको ११ दिनपछि भने 'हिंसा दिवस' भनेका थिए।
आइतबारको कार्यक्रममा उनले प्रचण्डलाई बिरालोसँग तुलना गरे। प्रचण्डले गठबन्धन परिवर्तन गरेकोप्रति उनको कटाक्ष थियो, 'एउटा प्रवृत्ति के देखिन्छ, बिरालो किन्नुपर्दैन, दूध र भात कचौरामा दियो भने छिमेकीको बिरालो आफ्नै भइहाल्छ भन्ने। कसले कचौरामा कति दूध भात दिन्छ, त्यस अनुसार खुत्रुक्क छिमेकीका घरतिर सर्ने।'
ओलीले २०६२/६३ को आन्दोलनपछि कोही पनि प्रचण्ड जति लामो समय निरन्तर सत्तापक्ष नभएको बताए। 'जता जोसँग मिलेर भए पनि सत्तामा हुने', प्रचण्डको शैलीप्रति उनको टिप्पणी थियो।
यसबीचका संवादहरुमा पनि प्रचण्डले दोहोरो शैली देखाएको ओलीको आरोप थियो। 'पुष्पकमल दाहालले अस्तिका (शुक्रबार) दिनसम्म मलाई छक्याइरहनु भयो। उहाँले हातमा चक्कु लिएर बस्नु भएको थियो, मलाई भन्नुभयो- 'म फूल लिएर बसेको छु। मैले फूल लिएर बसेको छु, चक्कु जस्तो देख्नुभयो होला, यो भ्रम हो। यो चक्कु हैन, फूल हो' भन्नुभयो। म पनि तपाईंले भन्नु भएपछि फूल नै हो, केको चक्कु हो भन्दै बसेँ।’
यसै प्रसंगमा उनले प्रचण्डले एक थोक बोल्ने र अर्को काम गर्ने बताए। साथै आफूलाई धोका दिएको आरोप लगाए। 'उहाँ ढाँट्न र छक्याउन अप्ठ्यारो मान्नुहुन्न। धोका दिन अप्ठ्यारो मान्नुहुन्न। जनतालाई धोका दिनुभयो, सहयोद्धाहरुलाई धोका दिनुभयो। आफूलाई त्यस ठाउँमा पुर्या उन योगदान गर्नेहरुलाई धोका दिनुभयो। आफूलाई त्यस ठाउँमा पुर्याईउन जीवन दिने सहिदहरुलाई धोका दिनुभयो भने मलाई धोका दिन कुन ठूलो कुरा भयो र?', उनको भनाइ थियो।
प्रधानमन्त्री प्रचण्डले ओली लगायतसँगको दुई महिने सहकार्यले आफूलाई गाह्रो परेको भन्दै दिएको अभिव्यक्तिको पनि उनले कटाक्षपूर्ण ढंगले खण्डन गरे। 'दुई महिना कस्तो गाह्रो भएको थियो। साँच्चै गाह्रो भएको थियो उहाँलाई। हरियो देख्नै नहुने, दाम्लो चुडाएर जान खोज्ने। मैले रोकिदिने। गाह्रो त गाह्रो परेको थियो उहाँलाई। दाम्लो छिनालेर जान खोज्ने। झ्याप्पै मुख लाउन खोज्ने। तान्दिएपछि गाह्रै भएको थियो', ओलीले भने।
उनले आफूलाई पहिल्यै प्रचण्ड आफूसँग टिक्न नसक्ने थाहा भएको बताए। आफूसँग काम गर्दा 'काले-काले मिलेर खाऔँ भाले' हुन नसक्ने उनको भनाइ छ। 'त्यसैले जहाँ हुनसक्छ। त्यतै जानु उहाँका लागि सायद अनिवार्य थियो', उनले भने।
त्यसो त ओलीले पुस १० गते सत्ता गठबन्धन निर्माण गर्न आफूले नयाँ विज्ञान र प्रविधि प्रयोग गरेको तर सफल नभएको बताए। 'मैले लेटेस्ट साइन्स एन्ड टेक्नोलोजीको प्रयोग गरेर जोड्दाखेर हुन्छ कि भनेर पुस १० गते जोडिहेरेँ। इन्जेक्सन दिएँ। मलम लगाएँ। तर हुँदो रहेनछ। फत्रक्क झर्यो फेरि', उनले भने।
त्यस दिन प्रचण्ड तत्कालीन प्रधानमन्त्री शेरबहादुर देउवासँगको बालुवाटार बैठकबाट बाहिरिएर बालकोट पुगेका थिए। त्यहीँ नयाँ गठबन्धन निर्माण भएको थियो। त्यतिबेला प्रचण्डलाई प्रधानमन्त्री दिने र एमालेले राष्ट्रपति तथा प्रधानमन्त्री पाउने सहमति भएको नेताहरुको भनाइ छ। प्रधानमन्त्री र राष्ट्रपतिमा आलोपालो गर्ने सहमति भएको पनि उनीहरु बताउँछन्। तर, प्रचण्डले एमालेलाई राष्ट्रपतिमा नसघाउने भन्दै कांग्रेससहितको गठबन्धन निर्माण गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
