काठमाडौं– क्रिकेटर सन्दीप लामिछानेले दायर गरेको निवेदन र उनीविरुद्ध महान्यायाधीवक्ता कार्यालयले दिएको पुनरवलोकन निवेदनको संयुक्त सुनुवाइ अहिले सर्वोच्च अदादतमा भइरहेको छ।
सर्वोच्चका न्यायाधीश सपना प्रधान मल्ल र कुमार चुडालको संयुक्त बन्द इजलासमा यो मुद्दाको सुनुवाइ भइरहेको हो। पीडितको पक्षबाट दुई जना सरकारी वकिल तथा कानुन व्यवसायीहरुले बहस गरिसकेका छन्।
अहिले सन्दीप लामिछानेका तर्फबाट बहस भइरहेको छ। पीडितको पक्षबाट बहस गर्नेहरुले सन्दीपलाई टीममा राख्दा विपक्षी खेलाडीहरुले हातसमेत नमिलाएको भन्दै खेल्नका लागि टिममा राख्न नहुने र उच्च अदालत पाटनले धरौटीमा छाडेको आदेश रद्द गर्दै पुर्पक्षका लागि थुनामा पठाउनुपर्ने माग राखेका थिए।
जवाफी बहसको क्रममा सन्दीपका तर्फबाट बहस गरेका वरिष्ठ अधिवक्ता शम्भू थापाले सन्दीपसँग हात नमिलाएकै आधारमा दोषी भन्न नमिल्ने तर्क राखे। ‘कसैले सन्दीपसँग हात मिलाएन भन्दैमा दोषी करार गर्न मिल्दैन। सन्दीपले राम्रो खेलेका थिए। विपक्षीलाई हराए पनि। हराएपछिको रिसमा उनीहरुले हात मिलाएनन्। यसैलाई आधार बनाएर दोषी करार गर्न मिल्दैन’, थापाले भने।
यसअघि पीडितको तर्फबाट बहस गरेकाहरुले सन्दीपलाई थुनामै राख्नुपर्ने माग गरेका थिए। नाबालिक किशोरीमाथि बलात्कार गरेको अभियोगमा जिल्ला अदालत काठमाडौंको थुनछेक आदेशपछि मुद्दाको पुर्पक्षका लागि थुनामा गएका सन्दीपलाई उच्च अदालत पाटनले सर्तसहित २० लाख धरौटीमा रिहा गर्ने आदेश दिएको थियो।
देश छाडेर विदेश जान नपाउने लगायतका सर्तका कारण सन्दीप संयुक्त अरब ईमिरेट्स (यूएई)को दुबईमा हुने आईसीसी विश्वकप लिग–२ खेल्ने नेपाली टोलीमा सहभागी हुन पाएनन्। आफूले विदेश जान नपाउने उच्च अदालतको सर्त खारेजीको माग गर्दै सन्दीपले सर्वोच्च अदालतमा निवेदन दिएका थिए।
यस्तै, सन्दीपलाई धरौटीमा रिहा गर्ने उच्च अदालत पाटनको आदेशविरुद्ध सरकारी पक्षले सर्वोच्चमा पुनरवलोकन निवेदन दिएको थियो।
सन्दीपले दायर गरेको निवेदनमा प्रारम्भिक सुनुवाइ गर्दै सर्वोच्च अदालतका न्यायाधीश ईश्वर खतिवडाको शुक्रबारको इजलासले सन्दीपको निवेदन र उनलाई धरौटीमा रिहा गर्ने उच्च अदालतको आदेशविरुद्ध सरकारी पक्षले दिएको निवेदन साथै राखेर सुनुवाइ गर्नका लागि आइतबारलाई पेसी तोक्न आदेश दिएको थियो। सोही अनुसार अहिले मुद्दाको सुनुवाइ भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
