काठमाडौं– नेपाली काग्रेसका नेताहरुले राष्ट्रपतिको निर्वाचनपछि पनि प्रधानमन्त्रीमा पुष्पकमल दाहालकै निरन्तरता हुने बताएका छन्।
राष्ट्रपतिको मनोनयनपछि सञ्चारकर्मीसँग कुरा गर्दै कांग्रेस नेताहरुले यस्तो बताएका हुन्। कांग्रेसका उपसभापति तथा सांसद धनराज गुरुङले राष्ट्रपति निर्वाचन पछि पनि प्रधानमन्त्रीमा प्रचण्डकै निरन्तरता हुने बताए।
उनले प्रधानमन्त्रीमा दाहालकै निरन्तरता हुनुले सरकार अस्थिर भन्न नमिल्ने दाबी गरे। उनले भने, ‘२५ गते पछि पनि प्रचण्डजी नै प्रधानमन्त्री रहिरहनुहुन्छ। त्यसो भएपछि अस्थिर कसले भन्ने? प्रचण्डजी नै निरन्तर प्रधानमन्त्री हो। धेरै पहिलादेखि भनेको थिँए, र अहिले पनि भनिराखेको छु, निरन्तर प्रधानमन्त्री उहाँ नै हो।’
यस्तै नेपाली कांग्रेसका नेता डा. शेखर कोइरालाले राष्ट्रपतिको रुपमा संविधानको रक्षा गर्ने उपयुक्त पात्र रामचन्द्र पौडेल भएको बताए। उनले एमालेले सरकार नछाडेको अवस्थामा आफूहरुले सरकारमा जाने सम्बन्धमा निर्णय नगरेको बताए।
उनले भने, ‘उम्मेदवारको रुपमा रामचन्द्रजी जत्तिको व्यक्ति जो धेरै सिनियर, खारिएको र प्रत्येक आन्दोलनमा उहाँको भूमिका अत्यन्त महत्वपूर्ण र त्यसमा पनि अहिले जुन संविधान छ, त्यसलाई रक्षा गर्ने उपयुक्त पात्रको रुपमा हामीहरुले लिएका छौं। र मलाई विश्वास छ, उहाँको जित सुनिश्चित छ भने पनि हुन्छ। सरकारमा एमालेले के गर्छ? अहिले त छोडेको छैन एमालेले। एमाले सरकारमा हुँदा–हुँदै हामी कसरी सरकारमा जाने? सरकार त पूरै छ नि त। त्यसै जाने भनेर त जाने होइन नि सरकारमा।’
त्यस्तै जनता समाजवादी पार्टीका नेता प्रकाश अधिकारीले राष्ट्रपतिको निर्वाचन पछि जसपा सरकारमा जाने बताए। उनले भने, ‘अधिकतम दलको सहमति भएको। त्यसकारण सहामति नै हो यो। उपराष्ट्रपति बारेमा निर्णय हुन सकेको छैन। राष्ट्रपतिको निर्वाचन के–के छ सबै भएपछि स्वभाविक हो पार्टी त सरकारमा जान्छ नै।’
जनता समाजवादी पार्टीकै अर्का नेता राजकिशोर यादवले रामचन्द्र पौडेल राष्ट्रपतिको उम्मेदवारको रुपमा उत्तम र सर्वश्रेष्ठ रहेको बताए। पौडेलले संविधान र पदको दुरुपयोग नगर्ने उनले विश्वास व्यक्त गरे। पौडेलले राष्ट्रपति पदको मर्यादा र गरिमालाई बढाउने नेता यादवको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
