पुस १० गते बालकोटको बार्दलीमा केपी ओली र प्रचण्ड। तस्बिर: ओलीको सचिवालय।
काठमाडौं- नेकपा एमालेले आफू पुस १० को सहमतिमा कायमै रहेको सन्देश दिने गरी निर्णय गरेको छ। शनिबार बिहान पार्टी कार्यालय च्यासलमा बसेको सचिवालय बैठकले सोही सहमति अनुसार उपाध्यक्ष सुवास नेम्वाङलाई राष्ट्रपतिको उम्मेदवार चयन गरेको हो।
बैठकपछि बोल्दै उपमहासचिव पृथ्वी सुब्बा गुरुङले आफूहरु पुस १० को सहमतिमा अडिएको बताए। ‘हामी पुस १० कै निर्णयमा अडिनुपर्छ। त्यसकै आधारमा उम्मेदवारी दिनुपर्छ र त्यसकै आधारमा राष्ट्रपति चयन गर्नुपर्छ भन्ने हो’, उनले भने, ‘२५ गतेसम्म कांग्रेसबाहेक अरु दललाई हामी सहमतिमा ल्याउने प्रयन्त गर्छौँ।’
कांग्रेस नेतृत्वको तत्कालीन गठबन्धन त्यागेर माओवादी केन्द्रका अध्यक्ष पुष्पकमल दाहाल ‘प्रचण्ड’ पुस १० मा एमाले अध्यक्ष केपी शर्मा ओली निवास बालकोट पुगेका थिए। त्यहीँ एमाले र माओवादी केन्द्र लगायतका दलहरुबीच नयाँ सत्ता साझेदारी बनेको थियो। त्यहाँ प्रचण्ड प्रधानमन्त्री बन्ने, राष्ट्रपति र सभामुख एमालेले पाउने र प्रधानमन्त्री तथा सभामुख आलोपालो गर्ने लगायतका सहमति भएको बताइन्छ।
तर, त्यतिबेलाको सहमति तोडेर प्रधानमन्त्री पुष्पकमल दाहाल प्रचण्ड भने अघि बढिसकेका छन्। प्रधानमन्त्री भएदेखि नै ओलीबाट अप्ठ्यारो महसुस गरेको सुनाइरहेका उनले कांग्रेससँग निकटता बढाएका थिए। सोही अनुसार शुक्रबार साँझ बालुवाटारमा आठ दलको बैठक राखेर कांग्रेस उम्मेदवारलाई राष्ट्रपतिमा सघाउने निर्णय गराएका थिए। बालुवाटारको सो निर्णयसँगै पुरानो गठबन्धन भत्किएको चर्चा भइहेको छ।
परिस्थितिको बोध गरेरै सत्ता साझेदार दल राप्रपाले पनि सरकारबाट बाहिरिने निर्णय लिइसकेको छ। शनिबार बिहान बसेको सो पार्टीको केन्द्रीय कार्यसम्पादन समिति र संसदीय दलको संयुक्त बैठकले सरकारबाट बाहिरिने निर्णय लिएको हो।
‘परिवर्तित सन्दर्भमा राप्रपा सत्तामा रहिरहनु अनुपयुक्त हुने ठहर गर्दै आजकैबाट सरकारलाई दिएको समर्थन फिर्ता लिई सरकारबाट बाहिरिने निर्णय गरेका छौँ’, बैठकपछि प्रवक्ता मोहनकुमार श्रेष्ठद्वारा जारी विज्ञप्तिमा भनिएको छ। सोही किसिमको निर्णय प्रदेशहरुको हकमा पनि गरिएको छ।
तर, एमालेले भने सरकारबाट नबाहिरिने निर्णय लिएको छ। गुरुङले पनि अहिले सरकार फाल्ने कि बस्ने भन्ने विषय नभएको बताए। बरु फागुन २५ सम्म परिस्थितिमा बदलाव आउने आशा एमालेलाई देखिन्छ। गुरुङको भनाइ छ, ‘राष्ट्रपतिको उम्मेदवार चयन गर्ने कुरामा पुस १० गते जे सहमति भएको छ, त्यसैमा जानुपर्छ भन्ने हाम्रो जोड छ। हामी त्यसका लागि पहल र प्रयत्न गर्ने हो। हिजोको निर्णयले त्यो कुरामा थोरै तलमाथि भएको हुनाले २५ गतेसम्म धेरै कुरा पाक्छ होला नि।’
एमाले केही पाक्ने आशामा रहे पनि प्रचण्ड भने एमाले र उससँगको सहमतिलाई छाडेर अघि बढिसकेको बुझिन्छ। शुक्रबार साँझको आठ दलीय बैठकमै उनले नयाँ गठबन्धनबारे विषयबारे ब्रिफिङ गरेका थिए। बैठकमा प्रचण्डको भनाइ उद्धृत गर्दै एकीकृत समाजवादीका सांसद प्रकाश ज्वालाले भनेका थिए, ‘आजदेखि हाम्रो नयाँ राजनीतिक यात्रा सुरु भएको छ। यसलाई अगाडि बढाऔँ। सबै दलहरू मिलेर जाऔँ। र, राष्ट्रको समृद्धि, राजनीतिक स्थिरता, राष्ट्रिय स्वाधिनता र जनतालाई सेवा सुविधा दिने क्रममा हामी सबै मिलेर एकताबद्ध भएर जाने हो। र, हामी सत्ता समीकरणका सन्दर्भमा पनि एकताबद्ध भएर जाऔँ।’
शुक्रबारको निर्णय अनुसार नै कांग्रेसले पौडेललाई राष्ट्रपतिको उम्मेदवार चयन गरिसकेको छ। सम्भवतः माओवादी केन्द्रका नेताहरु त्यसमा प्रस्तावक र समर्थक बस्नेछन्।
गुरुङको प्रतिक्रिया भने आठ दलीय गठबन्धन नै नबनेको भन्ने छ। उनले भने, ‘आठ दलीय गठबन्धन बनेकै छैन। त्यहाँ त बसेर सामान्य कुराकानी गरेको न हो। डकुमेन्टेसन भएको छ र? त्यस्तो केही भएको छ र? सहमति भयो, पुरानो टुट्यो भनेर प्रश्न आएको छ र? छैन नि।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
