सुरक्षा/अपराध

कमोडिटी धन्दा : ३ अर्ब ठगी भएको भन्दै मुद्दा चलाइएकामध्ये एक जना रिहा, ३ जना कारागार चलान

नेपाल लाइभ मंगलबार, फागुन ९, २०७९ १८:०७

काठमाडौं– कमोडिटी मार्केटमा लगानी गर्न लगाएर ठगी गरेको भन्दै मुद्दा चलाइएकामध्ये एक जना धरौटीमा रिहा भएका छन्। कमोडिटीसम्बन्धी तालिम दिने क्लबका सञ्चालक सुनिल श्रेष्ठकी श्रीमती कञ्चन धरौटीमा रिहा भएकी हुन्।

जिल्ला अदालत काठमाडौंले सोमबार ३ लाख धरौटी माग गरेपछि धरौटी बुझाएर उनी रिहा भएकी हुन्। उनीसँगै ४ जनालाई जिल्ला प्रहरी परिसर काठमाडौंले पक्राउ गरेर मुद्दा चलाएको थियो।

तीमध्ये ठगी प्रकरणका मुख्य नाइके मर्केन्टाइल (मेक्स) नेपालका प्रमुख कार्यकारी अधिकृत जितेश सुरेन्द्रन र सो कम्पनीका डेपुटी जनरल म्यानेजर तथा प्रवक्ता नरेन्द्र भट्ट, स्पेल इन्भेष्टमेन्ट प्रालि र ट्रेडिङ क्लबका सञ्चालक सुनिल श्रेष्ठ पुर्पक्षका लागि कारागार चलान भएका छन्।

जिल्ला अदालत काठमाडौंका न्यायाधीश दीपक ढकालको सोमबारको इलजासले उनीहरुलाई पुर्पक्षका लागि कारागार पठाएको हो।

कमोडिटीमा लगानी गरेर मुनाफा आर्जन गर्न सकिने भन्दै १२ हजार २५९ जनाबाट करिब साढे ३ अर्ब रुपैयाँ ठगी गरेको पाइएको भन्दै मुद्दा दर्ता भएको थियो।

उक्त क्रममा ४१ जनाको गिरोहले कमोडिटी मार्केटको प्रलोभन देखाएर ३ अर्ब ३५ करोड ५५ लाख १४७ रुपैयाँ ठगी गरेको रहस्य खुलेको हो। उनीहरुमध्ये ४ जना पक्राउ परेका थिए। बाँकीलाई फरार प्रतिवादी बनाएर मुद्दा चलाइएको थियो।

ठगीको यो समूहले बबरमहल नक्साल लगायतका ठाउँहरुमा एउटा ट्रेनिङ क्लबले सेयर मार्केटसम्बन्धी तालिम दिइरहेको भन्दै विज्ञापन गरेको थियो। उक्त क्लबमा सेयरको तालिम लिन गएकाहरुलाई कमोडिटी मार्केटको तालिम दिइएको थियो।

कमोडिटी मार्केट पनि सेयरजस्तै नेपाल धितोपत्र बोर्डको इजाजतमा सञ्चालन भएको र त्यसमा घरमै बसी–बसी घरजग्गा, सुन, चाँदी, तामा, तेल ग्यासलगायत हरेक चिजको कारोबार गर्न सकिने भनेर सहभागीहरुलाई ‘ओरेन्टेसन’ दिइएको थियो।

उक्त कारोबारबाट अत्यधिक फाइदा हुने उनीहरुले बताएका आश्वासन दिएका थिए। तालिमका क्रममा सुनिल श्रेष्ठ नाम गरेका व्यक्तिले आफू कमोडिटी मार्केटको ब्रोकर कम्पनी मनि स्पेल इन्भेस्टमेन्ट प्रालिको सञ्चालक रहेको बताएका थिए। वैधानिक नै नरहेको उक्त कम्पनीलाई वैधानिक रहेको बताउँदै कारोबार गर्न प्रलोभन देखाएका थिए।

कमोडिटी मार्केटमा क्लियरिङ हाउसको काम गर्ने हिमालयन क्लियरिङ कोअपरेन (एचसीसी) को खातामा रकम जम्मा गर्न उनीहरुले लगाएका थिए। रकम जम्मा गरिसकेपछि क्लाइन्ट कोड उपलब्ध गराउने र एक्सचेन्जको काम गर्ने मर्केन्टाइल एक्सचेन्ज नेपालद्वारा सञ्चालित मोबाइल एप मेक्स (एमईएक्स) नेपाल डाउनलोड गर्न लगाएर क्लाइन्ट कोड र पासपोर्ट उपलब्ध गराउने र अर्को लक्ष्मी बैंकको सेग्रीगेट खातामा रकम जम्मा गर्न लगाउँदै ठगी गरेको पाइएको थियो।

रकम जम्मा भइसकेपछि ह्वाट्सएप तथा भाइबर ग्रुपमा एपमार्फत् घरजग्गा, सुन, चाँदी, तामा, ग्यास, तेल खरिद–बिक्री गर्न निर्देशन दिँदै सुरु–सुरुमा फाइदासमेत उपलब्ध गराउने गरेको पाइएको थियो। पछि सफ्टवयेरसमेत मेनुपुलेट गरी ठगी गर्ने र बेपत्ता हुने गरेको पाइएको अनुसन्धानबाट खुलेको थियो।

यो पनि पढ्नुहोस

कमोडिटी मार्केटको नाममा ६ अर्बको अवैध कारोबार, साढे ३ अर्ब ठगी

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सुडानमा विद्रोही अर्धसैनिक समूहको आक्रमणमा १४ जनाको मृत्यु

खो खो विश्वकप : पुरुषतर्फ पनि नेपाल उपविजेता, भारत च्याम्पियन

कोलम्बियामा विद्रोहीको आक्रमणमा परी ६० जनाको मृत्यु