काठमाडौं– नेपाली राष्ट्रिय क्रिकेट टिमका अलराउण्डर मोहमद आदिल आलमले आफूमाथि लागेको स्टप फिक्सिङको आरोप अस्वीकार गरेका छन्।
केही समय अघिसम्म भएको नेपाल टी–२० क्रिकेट लिगमा भएको स्पट फिक्सिङमा संलग्न भएको दाबी केन्द्रीय अनुसन्धान ब्यूरो (सीआइबी)ले गर्दै आएको छ।
आदिलले आरोप अस्वीकार गरे पनि विभिन्न तथ्यहरुले उनी फिक्सिङमा संलग्न रहेको देखाएको सीआइबीले जनाएको छ। सीआईबीले आदिललाई स्पट फिक्सिङको प्रतिवादी बनाउनुको विभिन्न कारणहरु उल्लेख गरेको छ।
सीआइबीले आदिलको संलग्नताबारे खुलाएका कारणहरु हामीले उल्लेख गरेका छौं।
१.जनकपुर रोयल्सका खेलाडी मोहमद आदिल आलमले पुस १२ गते सम्पन्न भएको काठमाडौं नाइट्स र जनकपुर रोयल्सबीचको खेलको बाह्रौं ओभरको पहिलो बल नो–बल र दोश्रो बल वाइड बल गरी जम्मा १३ रन र पुस १४ गते भएको जनकपुर रोयल्स र फार वेष्ट यूनाइटेड बीचको खेलको छैठौं ओभरमा पनि पहिलो बल नो–बल र दोश्रो बल वाइड बल गरी जम्मा १५ रन दिएका हुन्।
स्कोर बोर्ड तथा भिडियो विश्लेषणको क्रममा ओभरको पहिलो बल नो–बल र लगत्तै वाइड बलको प्रकृति एकै किसिमको पाइएको। मोहमद आदिल आलमलाई एउटा ओभरमा नो–बल र वाइड बल फाल्नको लागि एप्रोचसमेत आएको र उक्त एप्रोचको समयमै रिपोर्ट नगरेको।
२.आदिलले पुस १२ गते भएको काठमाडौं नाइट्स र जनकपुर रोयल्सबीचको खेलको बाह्रौं ओभरमा र पुस १४ गते जनकपुर रोयल्स र फार वेष्ट यूनाइटेड बीचको खेलको छैठौं ओभरमा खेलमा पहिलो बल नो–बल र दोश्रो बल वाइड गरेको स्कोर बोर्ड तथा भिडियो विश्लेषणको क्रममा ओभरको पहिलो बल नो–बल र लगत्तै वाइड बलको प्रकृति एकै किसिमको देखिएको।
३.नेपाल टी–२० लिगमा सन् २०२२ डिसेम्बर २९ मा भएको जनकपुर रोयल्स र फार वेष्ट युनाइटेडबीचको खेलमा आदिलले जानी–जानी नो–बल फालेको शंकास्पद भएको क्रिकेट कमेन्टेटर सचिन तिमल्सेनाको कागजबाट देखिन्छ।
४.आदिलले आफूलाई भारतीय नागरिक समिर शेखले एक नो–बल र एक वाइड बल फाल्नको लागि प्रस्ताव गरेको भनि अख्तियार प्राप्त अधिकारी समक्ष गरेको बयान तथा खेल सम्पन्न भएपश्चात खेल उपर शंका हुँदा उनले नेपाल क्रिकेट संघका क्रिकेट म्यानेजर विनोद दासलाई बताएको देखिन्छ।
५.आदिल आलमले शंकास्पद बलिङ गरेको सम्बन्धमा आईसीसीबाट प्राप्त इमेलमा शंका गरिएकोबाटसमेत मिलोमतो तथा अनियमितता गर्नको लागि आदिलले ओभरको पहिलो बल नो–बल र लगत्तै वाइड बल गरेको देखिएको। सन् २०२२ डिसेम्बर २९ मा भएको फार वेष्ट युनाइेटविरुद्धको खेलमा आदिलले आफ्नो ओभरको पहिलो बलमा फ्रन्ट फुट नो बल बलिङ गर्दा काट्न नहुने लाईन र संकेत गरेको विषय शंका लागि आईसीसीबाट खटिई आएका एन्टी करप्सन युनिट अफिसर वीर सिंहलाई छानबिनको लागि जानकारी गराएको क्रिकेट कमेन्टेटर परेश लोहनीले गरी दिएको कागजबाट देखिन्छ।
६. सहभागिहरूका लागि अन्तर्राष्ट्रिय क्रिकेट परिषद् भ्रष्टाचार विरोधी संहिताको धारा २.४.४ मा भ्रष्टाचार विरोधी संहिता अन्तर्गत भ्रष्ट आचरणमा संलग्न हुन सहभागीले प्राप्त गरेको कुनै पनि प्रलोभन देखाउने खालको प्रस्ताव वा निमन्त्रणाको पूर्ण विवरण एन्टी करप्सन यूनिटमा अनावश्यक ढिलाइ नगरी जानकारी नगराएमा उक्त संहिता बमोजिम कसुर मानिने प्रावधान भएकाले आदिलले कसुर गरेको देखिएको।
७.आदिलले करप्ट एप्रोच गर्ने व्यक्ति समिर शेख भनि बताएको तर एप्रोच गर्ने व्यक्तिको बारेमा पूर्ण विवरण खुलाउनुपर्ने बाध्यात्मक व्यवस्था हुँदाहुँदै उक्त प्रावधान उल्लंघन गरेको देखियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
