नेपाल–भारत महिला फुटबल मैत्रीपूर्ण खेल: २–२ गोलको बराबरी

फुटबल

नेपाल लाइभ बुधबार, फागुन ३, २०७९ २२:११

काठमाडौं– पहिलो अन्तर्राष्ट्रिय मैत्रीपूर्ण महिला फुटबल खेलमा नेपाल र भारतको बराबरी भएको छ। भारतको चेन्नईमा बुधबार साँझ भएको खेलमा नेपाल र भारत २–२ गोलको बराबरीमा रोकिएका छन्।

नेपालका लागि सावित्रा भण्डारीले २ गोल गरेकी छन्। जवाहरलाल नेहरू स्टेडियममा दुई गोलको अग्रता उल्टाएर नेपालले घरेलु टोलीसँग बराबरी खेलेको हो।

पहिलो हाफ बराबरीमा रोकिएको थियो। ५६ औं मिनेटमा भारतका लागि सौम्या गुगुलोथले पहिलो गोल गर्दै भारतलाई अग्रता दिलाएकी थिइन्।

यस्तै ६८ औं मिनेटमा इन्दुमथी काथिरेसनले अर्को गोल गर्दै भारतलाई २-० को अग्रता दिलाइन्। तर खेलको ९०औं मिनेटमा नेपालका लागि सावित्रा भण्डारीले पेनाल्टीबाट गोल गर्दै नेपाललाई २-१ को स्थितिमा पुर्‍याइन्।

भारतकी स्विटी देवीले पेनाल्टी बक्समा ह्यान्डबल गरेपछि नेपालले पेनाल्टीको अवसर पाएको थियो। जसमा सावित्राले सहजै गोल गरिन्।

त्यसपछि खेलको इन्जुरी समयमा सावित्राले व्यक्तिगत दोस्रो गोल गर्दै २-२ गोलको बराबरीमा ल्याउदै नेपाललाई हारबाट जोगाएकी हुन्।

काठमाडौंमा आयोजना भएको महिला साफ च्याम्पियनसिपपछि नेपाल र भारतले पहिलोपटक मैत्रीपूर्ण खेल खेलेका हुन्। गत भदौमा दशरथ रंगशालामा भएको महिला साफको सेमिफाइनलमा नेपालले भारतलाई १-० ले हराएको थियो।

ओलम्पिक छनोटको तयारी स्वरूप भारतले नेपाललाई दुई मैत्रीपूर्ण खेलका लागि बोलाएको हो। नेपाल र भारतबीचको दोस्रो मैत्रीपूर्ण खेल आगामी शनिबार हुनेछ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

ट्रम्प–पुटिनको भेटपछि स्कोल्जद्वारा युक्रेनका लागि ‘निर्देशित शान्ति’ अस्वीकार

हत्या अभियोगमा फरार दुई जना २० वर्षपछि पक्राउ

फोहोर व्यवस्थापनका विषयमा छलफल गर्न मुख्यसचिवसहितलाई बोलाउन सर्वोच्चको आदेश