काठमाडौं– आईसीसी आईसीसी विश्वकप क्रिकेट लिग २ को त्रिकोणात्मक एकदिवसीय अन्तर्राष्ट्रिय सिरिजमा स्कटल्याण्डले नामिबियालाई पराजित गरेको छ। ओपनर जर्ज मुन्सेको सानदार शतकमा स्कटल्याण्डले नामिबियालाई १० विकेटले हरायो।
बुधबार त्रिवि क्रिकेट मैदानमा १५४ रनको लक्ष्य पछ्याएर जवाफी ब्याटिङमा उत्रिएको स्कटल्याण्डले २२.१ ओभरमा एउटा पनि विकेट नगुमाइ पूरा गर्यो।
सिरिजमा नामिबियाको यो लगातार दोस्रो हार हो। यसअघि मंगलबार भएको खेलमा नामिबिया नेपालसँग २ विकेटले पराजित भएको थियो।
स्कटल्याण्डको जितमा मुन्सेले ६१ बलमा १२ चौका र ७ छक्कासहित अविजित १ सय ३ रनको बनाए। यस्तै, केली कोट्जरले ७२ बलमा ७ चौकासहित अविजित ४६ रन बनाए।
नामिबियाका लागि कुनै खेलाडीले विकेट लिन सकेनन्। पहिले ब्याटिङ गरेको नामिबियाले ३९.२ ओभरमा सवै विकेट गुमाएर भएर १५३ रन बनाएको थियो।
नामिबियाका लागि लोह्यान्डरी लोरेन्स ५४ रनमा आउट हुँदा बेर्नाड स्कोल्टेजले ३० रन बनाए। जान ग्रिनले २५ तथा प्रिन्कि फ्रान्सले ११ रन बनाए। मंगलबार नेपालविरुद्ध शतक प्रहार गरेका माइकल भान लिगेनले १४ बलमा ४ रन मात्र बनाए। उनी सफियान सरिफको बलमा बोल्ड आउट भए। कप्तान ग्रेहार्ड इरास्मस र जान निकोल एउटा पनि रन नबनाइ आउट भए।
स्कटल्याण्डका लागि मिचेल लेक्सले ४ तथा सफियान सरिफ र मार्क वाटले समान ३–३ विकेट लिए।
बुधबारको जितसँगै ४८ अंक जोडेर स्कटल्याण्ड अंक तालिकाको शीर्ष स्थान पक्का गरेको छ। ७ टोली सहभागी विश्वकप लिग २ मा अरु सबै टोलीले बाँकी सबै खेल जितेमा भपनि स्कटल्याण्डभन्दा माथि पुग्ने अवस्था छैन। स्कटल्याण्डले आगामी जुनमा जिम्बाबेमा हुने आईसीसी एकदिवसीय विश्वकपको छनोटमा स्थान बनाइसकेको छ।
नामिबिया भने ३२ खेलमा ३७ अंकका साथ अंक तालिकाको तेस्रो स्थानमा रहेको छ।
मंगलबारबाट सुरु त्रिकोणत्मक सिरिज फागुन ९ गतेसम्म संचालन हुनेछ। यो सिरिजमा सहभागी तीनवटै टिमले एक अर्काविरुद्ध समान २–२ खेल खेल्ने छन्।
नामिबियासँगको पहिलो खेल जितेको नेपालले दोस्रो खेलमा स्कटल्याण्डसँग फागुन ५ मा खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
