काठमाडौं- हाइड्रो कम्पनीको नक्कली सेयर लगत बनाएर ६२ लाख रुपैयाँ ठगी गरेको आरोपमा एक जना विरुद्ध मुद्दा दायर भएको छ। नक्कली सेयरधनी पुर्जा बनाएर ठगी गरेको आरोपमा म्याग्दीको मंगला गाउँपालिका-५ घर भई काठमाडौं बस्दै आएका ६७ वर्षीय गंगाबहादुर खत्री विरुद्ध मुद्दा दायर भएको हो।
प्रहरीको केन्द्रीय अनुसन्धान ब्युरो (सीआईबी)ले ठगी आरोपमा अनुसन्धान गरेर मुद्दा चलाउनका लागि भन्दै जिल्ला सरकारी वकिल कार्यालयमा फाइल पठाएको थियो। सरकारी वकिल कार्यालयले खत्री विरुद्ध जिल्ला अदालत काठमाडौंमा माघ २७ गते मुद्दा दायर गरेको छ।
६२ लाख ९ हजार ७५० रुपैयाँ ठगी गरेको भन्दै उनी विरुद्ध मुद्दा दर्ता भएको हो। उनीमाथि थुनछेक बहस जारी नै रहेकाले पुर्पक्षमा कारागार चलान तथा धरौटी/साधारण तारेखमा रिहा भन्ने अहिले टुंगो लागिसकेको छैन। मंगलबार पुनः थुनछेक बहस हुनेछ।
हाइड्रो इम्पायर कम्पनी प्रालिको नक्कली सेयर धनी लगत बनाएर ठगी गरेको भन्दै जीतबहादुर घर्तीले उनी विरुद्ध जाहेरी दिएका थिए। उक्त कम्पनीमा २० जनाको लगानी थियो।
तीमध्येका डा लक्ष्मण शर्माको नाममा रहेको २८ लाखको सेयर र मनबहादुर श्रीसको नाममा रहेको १७ लाखको सेयर खरिद गर्न सहमति भएको भन्दै सञ्चालक समितिको बैठकको कागजमा जीतबहादुरको कीर्ते हस्ताक्षर गर्दै सेयरहरु नामसारी पाउँ भन्दै २०७५ पुस ३ गते गंगाबहादुरले लिखत समेत तयार पारेका थिए।
यसअघि २०७५ असोज १६ गते जीतबहादुर विदेशमा भएको बेला डा लक्ष्मण शर्माको अध्यक्षतामा बैठक बसेको र उक्त कम्पनीको कारोबारका लागि गंगाबहादुरको एकल खाता सञ्चालन हुने भनि निर्णय गराएको भन्दै कम्पनी रजिष्ट्रार कर्यालयमा पत्र समेत पठाइएको थियो।
त्यसपछि कम्पनी रजिष्ट्रारबाट प्रमाणित नभएको नक्कली सेयर धनी विवरण तयार पारेर गंगाबहादुरले आफ्नो नाममा रहेको प्रभु बैंकको खातामा एकल रुपमा सञ्चालनमा ल्याएका थिए। एकल खाता सञ्चालनमा ल्याएपछि गंगाबहादुरले ६२ लाख ९ हजार ७५० रुपैयाँ ठगी गरेको पाइएको सीआईबीका प्रवक्ता तथा एसपी सञ्जयसिंह थापाले जानकारी दिए।
गंगाबहादुरले २०७५ पुस १६ देखि २०७५ माघ १४ गतेसम्म एकल बैंक खाता सञ्चालनमा ल्याएका थिए। उक्त १ महिनाको अवधिमा उनले ६२ लाख ९ हजार ७५० रुपैयाँ ठगी गरेका थिए। २०७५ चैत २९ गते राजीनामा दिएर गंगाबहादुर कम्पनीबाट बाहिरिएका थिए।
गत साउन १ गते कम्पनीको सम्पूर्ण सेयर ५२ करोड जीतबहादुरले आफ्नो एकल नाममा बनाएका थिए।
जीतबहादुरको एकल नाममा सेयर आएपछि राजीनामा दिएर बाहिरिएका गंगाबहादुर पुनः ४ करोड ५० लाख ६५ हजार ३ सय रुपैयाँ बराबरको आफ्नो सेयर रहेको भन्दै दावी गर्न कम्पनीमा पुगेका थिए।
जीतबहादुरले सेयर नभएको बताएपछि गंगाबहादुर कम्पनी रजिष्ट्रारको कार्यालयमा गएर जीतबहादुरको सेयर लगत बदर गर्न माग गर्दै निवेदन दिएका थिए।
गंगाबहादुरको निवेदनपछि कम्पनी रजिष्ट्रार कार्यालयले जीतबहादुरको सेयर लगत बदर गर्दै २०७५ सालकै अवस्थामा फर्काई गंगाबहादुर अध्यक्ष बनाएर एजिएम गर्न आदेश दिएको थियो।
कम्पनी रजिष्ट्रारको उक्त निर्णयपछि जीतबहादुर उच्च अदालत पाटन पुगेका थिए। कम्पनी रजिष्ट्रारले गत कात्तिक ७ गते छानबिन गर्दा गंगाबहादुरले कम्पनी रजिष्ट्रारको कार्यालयबाट प्रमाणित नभएको सेयर लगत प्रभु बैंकमा पेस गरेर ६२ लाख ९ हजार ७५० रुपैयाँ ठगी गरेको खुलेको थियो।
त्यसपछि सीआईबीमा उजुरी दिएकोमा सीआईबीले पक्राउ गरेर गंगाबहादुरलाई अनुसन्धान गरेको थियो। सो क्रममा पनि उनले ठगी गरेको खुलेको हो।
अनुसन्धानका क्रममा खत्रीले मुलुकी फौजदारी अपराध संहिता २०७४ को दफा २४९ को उपदफा (१) र (२) बमोजिमको कसुर गरेको पाइएको भन्दै संहिताको दफा २४९ को उपदफा ३ को (ग) अनुसारको कारबाही हुनुपर्ने माग गरिएको छ। जसअनुसार ७ वर्षसम्म कैद र ७० हजार रुपैयाँसम्म जरिवाना हुने व्यवस्था छ। साथै ठगी बराबरको क्षतिपूर्तिको समेत माग गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779880470.png)
-1764146706.png)
-1779545841.jpg)
