काठमाडौं— गैंडा चोरी शिकारी गरेको आरोपमा प्रहरीले १५ जनालाई पक्राउ गरेको छ।
प्रहरीको केन्द्रीय अनुसन्धान ब्युरो (सीआईबी)को टोलीले विभिन्न मिति र समयमा १५ जनालाई पक्राउ गरेको हो।
गैंडाको शिकार गरेर खाग निकालेर बेचबिखनमा संलग्न रहेको आरोपमा १५ जनालाई पक्राउ गरिएको हा । सीआईबीको वन्यजन्तुसम्बन्धी अपराधको अनुसन्धान गर्ने ४ नम्बर पिलरका डीएसपी सुन्दर तिवारीको टोलीले १५ जनाको गिरोहलाई पक्राउ गरेको छ।
पुस १९ गते सीआईबीले काठमाडौं सरस्वतीनगरबाट ५२२ ग्राम तौलको गैंडाको खागसहित दुई जनालाई पक्राउ गरेको थियो । त्यतिबेला झापाको भद्रपुर नगरपालिका १० का ४५ वर्षीय इन्द्रमणि आचार्य र बाँकेको कोहलपुर नगरपालिका ११ कि जमुना कुमारी शर्मा पक्राउ परेका थिए।
उनीहरु पक्राउ परेपछि यो घटनामा सीआईबीले थप अनुसन्धान अघि बढाएको थियो। अनुसन्धानको क्रममा थप १३ जना पक्राउ गरिएको सीआईबीका प्रवक्ता तथा एसपी सञ्जयसिंह थापाले जानकारी दिए।
अनुुसन्धानका क्रममा माघ १२ गते थप तीन जना पक्राउ परेका थिए। त्यतिबेला काठमाडौं सीतापाइलाबाट पाल्पाको भुवनपोखरीका ६२ वर्षीय बाबुलाल भट्टराई, काठमाडौंको गोँगबुबाट कैलालीको मसुरियाका ६१ वर्षीय गणेश भनिने गजाधर सापकोटा र काठमाडौं सीतापाइलाबाटै कैलालीको घोडाघोडी नगरपालिका १० का ३६ वर्षीय प्रताप चौधरी पक्राउ परेका थिए।
उनीहरु पक्राउ परेका ८ दिनपछि माघ २० गते फेरि तीन जनालाई सीआईबीले पक्राउ गरेको थियो। ललितपुरको लगनखेलबाट भाोजपुरको अरुण गाउँपालिका २ घर भएका ४५ वर्षीय डम्बर कुमार आलेमगर, काठमाडौं हात्तीसारबाट गोरखाको पालुङटार नगरपालिका २ का ४७ वर्षीय दानबहादुर राना र जमलबाट स्याङ्जाको पुतलीबजार नगरपालिका १ का ४६ वर्षीय निर्मल शाही पक्राउ परेका थिए।
माघ २२ गते स्याङ्जाकै वालिङ नगरपालिका ८ बाट सोही ठेगानाका ३८ वर्षीया हरिमाया राना पक्राउ परेकी थिइन्।
माघ २४ गते चितवनको भरतपुर महानगरपालिका ८ की ४० वर्षीया सम्झना चेपाङ भनिने कमला तामाङलाई भरतपुरबाटै पक्राउ गरिएको सीआईबीले जनाएको छ।
माघ २५ गते ५ जनालाई सीआईबीले पक्राउ गरेको छ। चितवनको कालिका नगरपालिका ९ का ३९ वर्षीय राजु भनिने सोमबहादुर चेपाङलाई चितवनबाटै पक्राउ गरिएको छ। चितवनकै इच्छाकामना गाउँपालिका ७ पदमपुरकी ३० वर्षीया तुलसी चेपाङ, सोही ठाउँका ३९ वर्षीय वीरमान वाइबा, चितवनको कालिका नगरपालिका ९ का ३० वर्षीय राधाकृष्ण चेपाङ र चितवनको भरतपुर महानगरपालिका ८ गौरिगञ्जका ५२ वर्षीय आइतबहादुर तामाङलाई पक्राउ गरिएको हो
२० खालमा डिल, मोटरसाइकलमा राखेर ल्याइयो काठमाडौं
पक्राउ परेकामध्ये सोमबहादुर चेपाङ समेतको टोलीले चितवनको चतुरमुखी सामुदायिक बन उपभोक्ता समूह तथा नवजागृति सामुदायिक बन उपभोक्ता समितिको सीमानामा पर्ने खगेडी खोला वन क्षेत्रमा अवैध रूपमा गैंडा मारी खाग काटी लगेको अनुसन्धानबाट खुलेको छ।
केहीदिन उक्त खाग पक्राउ परेका राजु भन्ने सोमबहादुर चेपाङले कालिका नगरपालिका ९ शेरवास भन्ने ठाउँमा लुकाएर राखेको खुलेको छ।
राजुले नै सम्झना भन्ने कमला तामाङको योजना बमोजिम खाग बिक्री गर्नका लागि दिएका थिए। त्यसपछि सम्झनाले गैंडाको खागको तस्बिर हरिमाया रानाको मोबाइलमा पठाएकी थिइन्। हरिमायाले उक्त तस्बिर निर्मल शाहीको मोबाइलमा पठाएको समेत खुलेको छ।
कमला तामाङले उक्त खाग काठमाडौं ल्याउन वीरमान वाइबा समेतको योजना र सहयोगमा योजना बनाएकी थिइन्।
गत मंसिर १ गते चितवनबाट मोटरसाइकलमा मुग्लिङहुँदै काठमाडौंसम्म खाग ल्याइ २० लाखमा बिक्री गर्ने सहमतिमा निर्मल शाहीलाई दिएकोसमेत खुलेको छ। निर्मलले उक्त खाग अवैध रूपमा बिक्री गर्नका लागि दानबहादुर राना, डम्बरबहादुर आलेमगर समेतको सहयोगमा बाबुलाल भट्टराई, गजाधर सापकोटा र प्रताप चौधरीको समूहलाई दिएका थिए। बाबुलाल, गजाधर र प्रतापको समूहले उक्त खाग जमुना शर्मा र इन्द्रमणि आचार्यलाई दिएका थिए।
पक्राउ परेका सबैलाई कारबाहीका डिभिजन वन कार्यालय हात्तिसार पठाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
