काठमाडौं– कैलाली क्षेत्र नम्बर २ बाट प्रतिनिधि सभा सदस्यमा निर्वाचित अरुण चौधरी ट्र्याक्टर आगाजनीको मुद्दामा दोषी ठहर भइ जेल सजाय नभोगेका ‘फरार अभियुक्त’ रहेका खुलेको छ। नागरिक उन्मुक्ति पार्टीबाट विजयी उनी २०६७ सालमै दोषी ठहर भएका थिए। उनी लगायत ३ जनालाई अदालतले बिगोसहित ६ महिना कैदको फैसला सुनाएको थियो।
स्थानीय महादेव बजगाईंको ट्र्याक्टरमा आगो लगाएको कसुरमा उनीलगायत ३ जना दोषी पाइएको जिल्ला अदालत कैलालीले ठहर गरेको छ। उक्त घटनामा सांसद अरुणका साथै पर्शुराम चौधरी, अरुण र बिर बहादुर चौधरीलाई समेत अदालतले दोषी ठहर गरेको थियो। उनीहरुले ट्र्याक्टर चालक साजन चौधरीलाई कुटपिट गरेर पेट्रोल छर्केर आगो लगाएका थिए।
उक्त विषयमा जाहेरी परेपछि उनीहरु तीनैजना बयान दिन समेत अदालत नआएर फरार भएका थिए। तीनै जना प्रतिवादीहरुका नाममा अदालतमा हाजिर हुन म्याद जारी भए पनि हाजिर नभएर कसुर स्वीकार गरेको अदालतले जनाएको छ।
अरुण चौधरी समेत विरुद्धको मुद्दामा कैलाली जिल्ला अदालतको फैसला:
‘प्रतिवादीहरुले मुलुकी ऐन आगो लगाउनेको १ र ४ नम्बरको कसुर गरेको ठहर भइ निजहरुलाई सोही ऐनको ४ नम्बर बमोजिम जनही ६ (छ) महिनाका दरले कैद सजाय हुने भइ आगलागीबाट नोक्सान भएको बिगो ८ लाख १९ हजार ४२३ प्रतिवादीहरुबाट जाहेरवालाले भरी भराउ गरी लिन पाउने ठहर्छ,’ अदालतको फैसलामा भनिएको छ।
२०६६ साल भदौ ३ गते कैलालीको चिसापानीस्थित गोरङ्गा खोलाबाट ढुंगा लिएर लम्की फर्किने क्रममा उनीहरुले ट्र्याक्टरमा आगजनी गरेका थिए।
अदालतले ६ महिना कैद सुनाए पनि प्रहरीले उनीहरुलाई पक्राउ गरेर फैसला कार्यान्वयन गराएको देखिँदैन। उनी गएको प्रतिनिधि सभा निर्वाचनमा आफैं मनोनयन दर्ता गर्नेदेखि प्रचार-प्रसारमा सहभागी थिए। तर, फरारको सूचीमा रहेका उनलाई प्रहरीले पक्राउ गरी कारबाही भने गरेन।
नेपाल प्रहरीका प्रवक्ता एसएसपी पोषराज पोखरेलले सञ्चारमाध्यमबाट आफूहरुले उक्त विषयमा जानकारी पाएको बताए। त्यस विषयमा आफूहरुले थप जानकारी लिइरहेको पनि उनले बताएका छन्।
चौधरी यसअघिकै घटनामा दोषी ठहर भइ, कैद सजाय भुक्तान नगरेका अभियुक्त भएको खुलेपछि प्रतिनिधि सभामा ‘दागी’ सांसदको संख्या ३ पुगेको छ। मनाङबाट निर्वाचित नेपाली कांग्रेसका सांसद टेकबहादुर गुरुङविरुद्ध भ्रष्टाचारको अभियोग छ। अदालतमा मुद्दा विचाराधीन रहेका कारण उनी निलम्बित अवस्थामा छन्।
यसैगरी महोत्तरी १ बाट निर्वाचित एमालेका सांसद लक्ष्मी महतो कोइरीलाई सशस्त्रका असई थमन विक हत्यामा संलग्न रहेको आरोप छ। प्रहरीको सूचीमा उनी ‘फरार अभियुक्त’ हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
