काठमाडौं– व्यवसायीहरुले बैंकको उच्च ब्याजदर समाधान गरी लगानीमैत्री वातावरण बनाउन सरकारसँग माग गरेका छन्। बैंकको उच्च ब्याजदरले उद्योग व्यवसायमा पारेको समस्या सामाधान गरी सरकारले लगानीमैत्री वातावरण बनाउनुपर्ने व्यवसायीको माग छ।
नेपाल राष्ट्रिय व्यवसायी महासंघको अगुवाइमा सोमबार काठमाडौंमा भएको विरोध प्रदर्शनमा व्यवसायीहरुले बैंकको चर्को ब्याजका कारण आफूहरु मर्कामा परेको बताए। बैंकको चर्को ब्याजदरका कारण व्यवसायीहरु सडकमा आउनुपरेको भन्दै तत्काल सरकारले बैंकको ब्याजदर एकल अंकमा ल्याउनुपर्ने व्यवसायीले माग गरे।
पछिल्लो समय साना तथा मझौला उद्योगीहरुलाई मात्रै नभएर समग्र उद्योग क्षेत्रमा नै बैंकहरुले देखाएको आंतकले व्यवसायीहरु पीडित भएर आत्मदाह गर्न बाध्य बनाएको पनि व्यवसायीहरुले बताए।
सडक आन्दोलनमा सहभागी हुँदै नेपाल उद्योग वाणिज्य महासंघका उपाध्यक्ष दिनेश श्रेष्ठले सरकारले अहिलेको असहज अवस्थालाई हेरेर व्यवसायीहरुलाई सहजता बनाउनुपर्ने बताए। उद्योगी व्यवसायीहरुले बैंकबाट लिएको कर्जा तिर्दैनौँ नभनेको श्रेष्ठको भनाइ छ।
असहज अवस्था भएकाले व्यवसायीहरुले लिएको कर्जाको किस्ता तिर्न समय माग गरिएको श्रेष्ठले उल्लेख गरे। उपाध्यक्ष श्रेष्ठले राष्ट्र बैंकका गभर्नरले कर्जा दिन्न भन्नु अराजकता भएको भन्ने टिप्पणी गलत भएको बताए। उनले बैंकबाट व्यवसायीहरुले आधार देखाएर नै कर्जा लिएको बताए।
बैंकहरुबाट ऋण लिने प्रत्येक व्यक्तिको व्यवसाय र आयआर्जनलाई सुरक्षित बनाउन नसके जनताको निक्षेप सुरक्षित हुन नसक्ने उनको भनाइ छ। उद्योगी व्यवसायीहरुको लगानी सुरक्षित बन्ने कानुन बन्न आवश्यक रहेको पनि श्रेष्ठले उल्लेख गरे।
‘अहिलेको अवस्था असहज छ। त्यसको लागि कर्जाको किस्ता तिर्न समय माग गरेको हो। व्यवसायीहरुले जायज कुरा भनेका छौं। बैंकहरुले समय दिनुहुन्छ भन्ने आशामा छौं,’ श्रेष्ठले भने, ‘१८ लाख ऋणिले सबै कागज बुझाएर कर्जा लिएको हो। बैंकको ट्रेजर खोलेर कर्जा लिएको होइन। अहिलको असहज अवस्थामा बैंकहरु पनि जिम्मेवार हुनुपर्छ भन्ने हो।’
नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाले बैंकहरुले उद्योगी व्यवसायीहरुबाट चर्को ब्याज असुलेर नाफामा कमाएर बसेको आरोप लगाए। बैंकहरुले सबै क्षेत्रका व्यवसायीहरुको सम्पति लिलाममीमा दैनिकजसो पत्रपत्रिकाहरुमा प्रकाशित हुन थालेको बताए।
यातायात लगायत सबै क्षेत्रको एउटै समस्या भएकाले बैंकको चर्को ब्याजदर र आतंकको बिरुद्धमा आन्दोलनमा सहभागिता जनाएको सिटौलाले उल्लेख गरे। नेपालको यातायात क्षेत्रले मुलुकको अर्थतन्त्र चलायमान बनाउने मेरुदण्ड भएको सिटौलाले दाबी गरे।
फुटवेयर म्यानुफ्याक्चरर्स एसोसिएसन अफ नेपालका अध्यक्ष नानीराज घिमिरेले ७० प्रतिशत राज्य सञ्चालन गर्ने खर्च निजी क्षेत्रले योगदान गरिरहेको दाबी गरे। अहिले साना व्यवसायीहरुले रोजगारी लगायतमा राज्यलाई योगदान गरे पनि ठूला निश्चित व्यवसायीहरुले राज्यबाट फाइदा लिएको घिमिरेको भनाइ छ। साना व्यवसायीहरुले शरीरमा आगो लगाएर आत्मदाह गर्दा समेत राज्य मौन बस्नु राम्रो नभएको घिमिरले टिप्पणी गरे।
उनले बैंकहरुले व्यवसायीहरुले लिएको कर्जाको ब्याज नतिरेको भन्दै लिलामी निकालिदिने धम्की दिने गरेको बताए। सरकारलाई साना तथा मझौला उद्योगको ठूलो योगदान हुँदाहुँदै पनि सबैभन्दा पीडित साना तथा मझौला व्यवसायीहरु हुनुपरेको घिमिरेको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
