काठमाडौं– सत्तारुढ नेकपा (माओवादी केन्द्र) को स्थायी समिति बैठक दुई दिन पछि सारिएको छ।
केन्द्रीय कार्यालय पेरिसडाँडामा सोमबार बोलाइएको पदाधिकारी बैठकमा नेताहरुको कार्य विभाजनको विषयमा कुरा नमिलेपछि स्थायी समिति बैठक माघ १८ गतेका लागि बोलाउने निर्णय गरिएको हो। बैठक यसअघि मंगलबार बस्ने भनिएको थियो।
पार्टीको संगठन सम्बन्धी गृहकार्य नसकिएकाले मंगलबार पनि पदाधिकारी बैठक बसेर आवश्यक निर्णय गरी स्थायी समिति बैठक पर्सिका लागि सार्ने निर्णय गरिएको उपाध्यक्ष कृष्णबहादुर महराले जानकारी दिए।
‘हामीले आज पदाधिकारीको बैठक बस्ने हिजो र अस्ति होमवर्क गरेको कुरालाई यहाँ टुंगो लगाएर भोलि स्थायी समिति बैठक बस्ने सेड्युल थियो। आज पनि छलफल चल्यो। यो होमवर्क अझै टुंगिएको छैन। त्यसकारण आज र भोलि होमवर्क गर्ने पर्सि स्थायी कमिटी बैठक बस्ने भन्ने निर्णय भयो’, महराले भने।
नेकपा (माओवादी केन्द्र) को जारी स्थायी समिति बैठकमा नेताहरुको कार्य विभाजन सम्बन्धी प्रस्ताव तयार पार्न महासचिव देवप्रसाद गुरुङ नेतृत्वको कार्यदल बनाइएको थियो। त्यसमा सहमति जुटाउन सोमबार पदाधिकारी बैठक बोलाइएको थियो। पदाधिकारी बैठकले सो विषयमा टुंगो लगाउन नसक्ने भएपछि मंगलबार बोलाइएको स्थायी समिति बैठक बुधबारसम्मका लागि स्थगित गरिएको हो। बैठकमा गृहमन्त्री कसलाई बनाउने भन्ने विषयमा भने कुनै छलफल नभएको उपाध्यक्ष महराले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
