काठमाडौं– ब्राजिलका भेट्रान फुटबलर ड्यानी अल्भेस एक साताअघि गत शुक्रबार यौन दुव्र्यवहारको आरोपमा स्पेनमा पक्राउ परे। स्पेनिस प्रहरीले उनलाई महिलामाथि यौन दुव्र्यवहार गरेको आरोपमा पक्राउ गरेको थियो।
गत डिसेम्बरमा एक नाइट क्लबमा महिलामाथि यौन दुव्र्यवहार गरेको आरोपमा पक्राउ गरेर उनीमाथि अनुसन्धान अघि बढाइएको छ। अदालतमा उपस्थित गराएर म्याद लिँदै उनीमाथि स्पेनिस प्रहरीले अनुसन्धान गरिरहेको छ।
पक्राउ गरेर सुरुमा राखिएको जेलमा उनीमाथि सुरक्षा थ्रेट हुनेसक्ने भन्दै अहिले अर्को जेलमा राखिएको स्पेनिस पत्रिका मार्काले उल्लेख गरेको छ। ब्रायन्स वान जेलबाट उनलाई सारेर ब्रायन्स टुमा राखिएको मार्काले उल्लेख गरेको छ।
प्रहरी अधिकारीहरुले उनलाई सार्नुको कारणमा सुरक्षाको ग्यारेन्टी रहेको बताएका छन्। बार्सिलोनाको एक नाइट क्लबमा एक युवतीमाथि यौन दुव्र्यवहार गरेको आरोपमा उनी एक सातादेखि प्रहरी नियन्त्रणमा छन्।
अहिले अल्भेसलाई राखिएको जेलमा यसअघि बार्सिलोनाका पूर्वअध्यक्ष स्यान्ड्रो रोसेललाई समेत राखिएको थियो। ब्रायन्स वानको भन्दा प्रत्येक विभागमा आधा कैदीबन्दी ब्रायन्स ‘टू’मा छन्।
अल्भेसले अन्य कैदीबन्दीसँग बाथरुम सेयर गर्नुनपर्ने गरी व्यवस्था मिलाइएको छ। आफ्नै छुट्टै शौचालय भएकाले अरु कैदीसँग उनले घुलमिल हुनु नपर्ने अवस्था छ। यो जेलमा सजाय भोगिरहेका तथा मुद्दा चलिरहेका बन्दीहरुलाई पनि राख्ने गरिन्छ।
उनीसँग ब्राजिलकै अर्का कैदी कौउटिन्होसँगै राखिएको मार्काले उल्लेख गरेको छ। जेलको सुरक्षामा रहेकाहरु उनको फुटबल करिअरभन्दा पनि मानसिक अवस्थाका बारेमा बढी चिन्तित रहेका छन्।
यता आफूमाथि लागेको आरोप झुटो रहेको अल्भेसले दाबी गरेका छन्। आल्भेस पक्राउ परेसँगै सिंगो फुटबल जगत नै तरंगित बनेको छ। अल्भेस बार्सिलोनामा अहिले वकिलहरुको खोजीमा छन्। आरोप प्रमाणिण भएको अवस्थामा स्पेनको कानुनअनुसार उनलाई १२ वर्षसम्म कैद हुने उल्लेख गरिएको छ।
स्पेनिस बार्सिलोना तथा सेभिल्लाका पूर्वडिफेन्डरसमेत रहेका अल्भेस पछिल्लो समय मेक्सिकन क्लब पुमासमा आबद्ध थिए। तर, स्पेनमा उनी पक्राउ परेसँगै पुमासले उनीसँगको सम्झौता रद्ध गरिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
