काठमाडौं– राष्ट्रिय जनमोर्चाका अध्यक्षसमेत रहेका प्रतिनिधि सभाका सांसद चित्रबहादुर केसीले दलहरुको कारण नै अहिलेको व्यवस्थामाथि खतरा रहेको टिप्पणी गरेका छन्।
उनले गणतन्त्र र बहुदलीय व्यवस्था समाप्त हुने खतरा देखिएको दाबीसमेत गरे। प्रतिनिधि सभामा बोल्दै उनले अहिले राजनीतिक दलहरुले अपराधको आरोप लागेका व्यक्तिहरुलाई पार्टीभित्र भित्र्याउने र बचाउने काम गरिरहेको दृष्टान्त दिँदै उनले यस्तो कार्य किन गरेको भनेर आफू आश्चर्यमा परेको बताए।
जनताको नेता र मन्त्रीप्रति माया र सद्भाव नदेखिएको टिप्पणी पनि उनले गरे। उनले गणतन्त्र, धर्म निरपेक्षता र निर्दलीय व्यवस्थावालाहरुले संसदीय व्यवस्थाप्रति घृणा फैलाएको कारण पनि नेता र संसद्प्रति जनता सकारात्मक नभएको दाबी गरे।
उनले आपराधिक कार्यमा संग्लग्न भएको आरोप लागेका व्यक्तिलाई पार्टीहरुले भित्र्याउने अनि बचाउ खोज्ने कार्य बढेको भन्दै यसले राजनीति र नेताहरुप्रति नकारात्मक बनाएको दाबी गरे।
‘कसुरअनुसार कारबाही गराउने कुरामा अग्रसर हुनुपर्नेमा पार्टीभित्र भित्र्याउने अनि जोगाउने कार्य अब नयाँ रहेन,’ उनले भने, ‘पार्टीहरुले के कारण हो अपराध कर्ममा लागेकालाई काखी च्याप्ने कार्य भइरहेको छ।’
सांसद केसीले संसदीय व्यवस्थाप्रतिको आस्था जोगाउने हो भने दूधको दूध र पानीको पानी छुट्टाउने गरी कारबाही गर्नुपर्ने बताए। आफ्नो पार्टीको भए बचाउने र अर्को पार्टीको भए कारबाही गर्ने प्रवृत्ति अब सच्चिनुपर्ने बताए। उनले बहुदलीय व्यवस्था र गणतन्त्र जोगाउन सक्छौ कि सक्दैनौ भन्ने अग्नि परीक्षा अहिले आइरहेको पनि स्पष्ट पारे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
