काठमाडौं– नेपाली कांग्रेसले राष्ट्रपति निर्वाचनमा उम्मेदवारी दिने निर्णय गरेको छ। सोमवार बिहान बसेको पार्टी पदाधिकारी र पूर्वपदाधिकारीहरुको बैठकमा राष्ट्रपतिमा पार्टीको तर्फबाट उम्मेदवारी दिने निष्कर्ष निकालिइएको प्रवक्ता प्रकाशशरण महतले जानकारी दिए।
राष्ट्रपति निर्वाचनका लागी अन्य दलहरुसँग पनि छलफल गर्ने निष्कर्ष निकालेको महतले बताए। राष्ट्रपति निर्वाचन समयमै हुनुपर्ने पनि काग्रेसको निचोड रहेको महतको भनाइ छ। संविधान र ऐनमा कतै त्रुटि भए त्यसलाइ समयमै सच्याएर राष्ट्रपति निर्वाचनमा जानुपर्नेमा कांग्रेसले जोड दिएको छ।
मंसिर ४ गतेको निर्वाचनपछि संसद्को सबैभन्दा ठूलो दल बनेर पनि सत्ता बाहिर पुगेको कांग्रेसले प्रतिनिधि सभाको सभामुख र उपसभामुखमा पनि उम्मेदवारी दिएको थियो।
कांग्रेसले उम्मेदवारी दिए पनि सभामुख र उपसभामुखमा सत्ता साझेदार दलका उम्मेदवार विजयी भए। सभामुखमा एमालेका देवराज घिमिरे र उपसभामुखमा राष्ट्रिय स्वतन्त्र पार्टीकी इन्दिरा राना मगर निर्वाचित भइन्।
प्रधानमन्त्री प्रचण्डलाई विश्वाको मत दिएको कांग्रेसले राष्ट्रपति निर्वाचनमा सत्तारुढ दल माओवादी केन्द्रबाट सहयोग प्राप्त हुने आशा व्यक्त गरेको छ।
कांग्रेससँगको तत्कालीन सत्ता गठबन्धन तोडेर प्रचण्ड एमालेको सहयोगमा प्रधानमन्त्री बनेका थिए। सरकार गठनका सन्दर्भमा छलफल हुँदा राष्ट्रपति र सभामुख पद आफूहरुले पाउने सहमति भएको एमाले नेताहरुको दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
