काठमाडौं- नवनिर्वाचित उपसभामुख इन्दिरा रानाले संविधाले व्यवस्था गरेको भूमिकालाई इमानदारीका साथ निभाउने बताएकी छिन्। शनिबारको प्रतिनिधि सभाको बैठकबाट उपसभामुखमा निर्वाचित भएर बाहिरिने क्रममा उनले संसद् भवन नयाँ बानेश्वरमा पत्रकारहरुलाई प्रतिक्रिया दिएकी हुन्।
'नेपालको संविधानले व्यवस्था गरेको भूमिकालाई म इमानदारीसाथ निभाउनेछु। विभिन्न पार्टी, गठबन्धनदेखि विपक्षी पार्टीका सम्पूर्ण माननीयज्यूहरुले उठाउनुभएको मुद्दालाई मैले इमानदारीसाथ तटस्थ भएर, सभामुखज्यूसँग सहकार्य गरेर सहजीकरण गर्नेछु', उनले भनिन्।
आफू भर्खरै एउटा बैठकमा सहभागी भएको र बाहिर उपसभामुख भनेको चुप लाग्ने भन्ने सुनेको भए पनि त्यस्तो नलागेको उनको भनाइ थियो। 'धेरै कामहरु गर्नुपर्ने रहेछ जस्तो लाग्यो', उनले भनिन्।
राष्ट्रिय स्वतन्त्र पार्टीबाट प्रतिनिधि सभामा प्रतिनिधित्व गर्ने रानालाई उपसभामुखमा निर्वाचित गरियोस् भन्ने प्रस्तावमाथि शनिबार प्रतिनिधि सभाको बैठकमा मतदान भएको थियो। मतदानमा २६४ सांसद सहभागी थिए। जसमध्ये पक्षमा १६६ मत, प्रस्तावको विपक्षमा ९७ मत र तटस्थमा १ मत खसेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
