काठमाडौं– बढुवाको मुखमा नेपाल प्रहरीका प्रहरी नायब महानिरीक्षक (डीआईजी)हरुको सरुवा गरिएको छ। पद रिक्त हुँदा बढुवा गर्नुपर्नेमा उनीहरुलाई सरुवा गर्दै विभिन्न प्रदेश तथा विभागहरुमा पठाइएको छ।
बढुवाको मुखमा डीआईजीहरुको सरुवा गरिँदा तत्कालै बढुवा नहुने र अब डीआईजीबाटै सोझै महानिरीक्षक (आईजी) बन्नुपर्ने अवस्थासमेत आउने देखिन्छ। अतिरिक्त महानिरीक्षक (एआईजी)को अनुभव नै नभएकाहरु अब सोझै डीआईजीबाट आईजी हुने अवस्था देखिएको हो। किनकि आउँदो चैतको दोस्रो साता हालका आईजी धिरजप्रताप सिंह अनिवार्य अकाशमा जाने हुँदा त्यतिबेला सरकारले आईजीमा बढुवा गर्नुपर्ने हुन्छ।
अहिलेसम्म एआईजीमा बढुवा नगरी प्रतिस्पर्धीहरुलाई समेत सरुवा गरेर नयाँ जिम्मेवारी दिइएका कारण डीआईजबाटै आईजी बन्ने अवस्था आउने देखिएको हो।
गत साउनदेखि खाली हुँदै आएको एआईजी पदमा अहिलेसम्म आइपुग्दा रिक्त पदको संख्या ४ पुगिसकेको छ। एआईजी रिक्त भएको ५ महिना पुगिसक्नै लाग्दा समेत बढुवा प्रक्रिया अघि नबढाइ डीआईजीकै सरुवा गरिएको हो।
गत साउन २० गतेबाट एआईजी विश्वराज पोखरेल अनिवार्य अवकाशमा गएका थिए। त्यसयता कात्तिक २५ गतेसम्म गरेर ४ एआईजीहरु अवकाशमा गइसकेका छन्। कात्तिक २५ गते रवीन्द्र धानुक अवकाशमा जाँदा देश चुनावी माहोलमा गइसकेकाले बढुवाका लागि निर्वाचन आयोगसको स्वीकृत लिनुपर्ने भन्दै निर्वाचन सकिएपछि एआईजी बढुवा प्रक्रिया अघि बढाउने बताइएको थियो।
निर्वाचन सकिएलगत्तै एआईजी बढुवाका लागि आयोगसँग स्वीकृति समेत लिइसकिएको थियो। तर त्यसपछि नयाँ सरकार गठन भएपछि एआईजी बढुवाको विषय भने गौण बन्यो। बढुवा हुनुको साटो डीआईजीहरुकै सरुवा गरियो। बढुवाका लागि पुराना टोली र नयाँ टोली को छिर्ने भन्ने चर्को लबिइङ र प्रतिस्पर्धाका कारण बढुवा प्रक्रिया लम्बिएको थियो। त्यतिबेला बालुवाटार निकटहरुले तत्काल बढुवा गर्न तीव्र लबिइङ गरेका थिए। तर दुई टोलीबीच कडा प्रतिस्पर्धा हुँदा लम्बिएको बढुवा अहिले भने झनै अन्योलमा परेको छ।
रिक्त ४ एआईजीका लागि दर्जन डीआईजीहरु लबिइङमा लागेका छन्। अहिले बढुवा हुने ४ एआईजी मध्येबाटै आउँदो चैत ११ गते प्रहरी महानिरीक्षक (आईजी) बन्ने हुँदा यो पटकको एआईजी बढुवा निकै पेचिलो बन्ने देखिन्छ। त्यही कारण पनि बढुवा नगरी सोझै डीआईजीबाटै आईजी बनाउने तयारी गरिएको पनि हुनसक्ने बताइन्छ।
एआईजी बढुवा नहुँदा एआईजीले नेतृत्व गर्ने चार विभागहरु अहिले नेतृत्वविहीन छन्। अपराध अनुसन्धान विभाग, प्रदेश समन्वय विभाग, कार्य विभाग र प्रशासन विभाग गरी ४ विभाग अहिले नेतृत्वविहीन छन्।
अहिले बढुवा भएका एआईजीहरु नै आगामी चैतमा आईजी बन्ने थिए। जसकारण बढुवाका लागि दौडधुप गरेका डीआईजीहरुलाई भने अहिले काठमाडौं उपत्यकाबाट विभिन्न ठाउँमा पठाइएको छ।
बढुवाको टप ‘थ्री’मा रहेका डीआईजीहरु मसाउद आलम खाँ, नलप्रसाद उपाध्याय र मोहनकुमार आचार्य एआईजीमा बढुवा भए पनि उनीहरु आईजीको प्रतिस्पर्धामा रहने छैनन्। उनीहरु यही चैत ११ गते हालका आईजी सिंहसँगै अवकाशमा जाँदैछन्।
डीआईजी भएको ९ महिनामै आईजी बन्ने रेसमा रहेकाहरु
अब चैत ११ मा आईजी बन्नेहरु डीआईजी भएको ९ महिनामै आईजी हुन्छन्। एआईजी तथा आईजीको प्रतिस्पर्धामा रहेकाहरु गत असारमा मात्रै प्रहरी वरिष्ठ उपरीक्षक (एसएसपी)बाट डीआईजीमा बढुवा भएका थिए।
गत असारमा डीआईजी भएकाहरु बसन्तबहादुर कुँवर, टेकप्रसाद राई, अशोक सिंह, दीपक थापा, श्यामलाल ज्ञवाली, किरण बज्राचार्य, सन्दीप भण्डारी, सुदीप गिरी, मीरा चौधरी, टेकबहादुर तामाङ, उमेशराज जोशी, भीमप्रसाद ढकाल, रामदत्त जोशी, पोषराज पोखरेल, बुद्धिराज गुरुङ, दुर्गा सिंह र किरण राणा एआईजी तथा आईजी बढुवाको प्रतिस्पर्धामा छन्।
प्रतिस्पर्धीहरुलाई भर्खर सरुवा गरिएको छ। प्रदेश १ मा डीआईजी श्यामलाल ज्ञवालीलाई पठाइएको छ। मधेस प्रदेशमा वसन्त कुँवर गएका छन्। बागमती प्रदेशमा भने दीपक थापाको सरुवा भएको छ। गण्डकीमा बुद्धिराज गुरुङ तथा लुम्बिनीमा टेकप्रसाद राईको सरुवा गरिएको छ भने सुदूरपश्चिममा अशोक सिंह र कर्णालीमा भीम प्रसाद ढकाल खटाइएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
