काठमाडौं– कम्बोडियामा यही पुस १५ गते बिहान आगलागीमा परेर ज्यान गुमाएका निराकार पाण्डेको शव अस्पतालमा नै अलपत्र परेको छ। उक्त दुर्घटना भएको ९ दिन बितिसक्दा पनि शव नेपाल ल्याउन सकिएको छैन।
पाण्डेले पुस १५ गते आगलागी भइरहेको होटेलको १२औं तलाको झ्यालबाट ज्यान बचाउन हामफाल्दा उनको मृत्यु भएको थियो। पाण्डेले आगलागी सुरु भइसकेपछि करिब चार घण्टा आफ्नो परिवारसँग कुरा गरेका थिए।
आगलागी भएको त्यतिका समयसम्म पनि उनको उद्धार नभएपछि उनले आफू झ्यालबाट हामफाल्न लागेको भिडियो कलमार्फत आफन्तलाई बताएका थिए। परिवारले उनलाई उद्धारको पर्खाइमा धैर्य गर्न बारम्बार सुझाव दिए पनि उनले हामफालेका थिए।
मृतकका परिवारले प्रधानमन्त्रीलाई गुहारे, तर अझै भएन उद्धार
मृतक निराकार पाण्डेका परिवारले आफ्नो छोराको शव नेपाल झिकाउन पहल गरिदिनका लागि गत २१ गते बिहीबार प्रधानमन्त्री पुष्पकमल दाहाल ‘प्रचण्ड’लाई समेत भेटेका थिए। प्रधानमन्त्री तथा मन्त्रिपरिषदको कार्यालयमा नै पुगेर मृतक पाण्डेका बाबु अग्नि पाण्डेले आफ्नो छोराको शव नेपाल ल्याउन पहल गरिदिन गुहार मागेका थिए।
प्रधानमन्त्री प्रचण्डले निराकारको शव नेपाल ल्याइ परिवारलाई सरकारको तर्फबाट सहयोग गर्ने प्रतिबद्धता जनाएका थिए। पाण्डेको शव ल्याउन सरकारले आर्थिक सहयोग गर्ने पनि निर्णय गर्यो। गत बिहीबार बसेको मन्त्रिपरिषद् बैठकले सो निर्णय गरेको शुक्रवार उपप्रधान तथा अर्थमन्त्री विष्णु पौडेलले जानकारी दिएका थिए। तर, उक्त दुर्घटना भएको ९ दिन बितिसक्दा पनि पाण्डेको शव नेपाल आइपुगेको छैन।
शुक्रबारसम्म शव नेपाल ल्याउने प्रयत्नमा छौं– एनआरएनए
गैरआवासीय नेपाली संघ (एनआरएनए) ले आफूहरू मृतक पाण्डेको शव नेपाल फर्काउनका लागि पहल गरिरहेको जनाएको छ। एनआरएन कम्बोडियाका अध्यक्ष लालसिंह खड्काले आफूहरूले निरन्तर दूतावाससँग समन्वय गरिरहेको बताए।
नेपालबाट पठाएको कागजातको आधारमा उक्त शव कार्गोमार्फत नेपाल फर्काइने खड्काले बताएका छन्।
‘हामी निरन्तर रूपमा दूतावाससँग समन्वय गरिरहेका छौं। गत शुक्रबार नै दूतावासमा डकुमेन्टहरू पठाइसकिएको छ’, उनले भने ‘उक्त डकुमेन्ट कम्बोडियाको स्थानीय भाषामा ट्रान्सलेट गरेर मात्रै त्यहाँको गृह मन्त्रालयमा पठाइएको छ। सम्भवतः मंगलबार वा बुधबारसम्म उक्त शव त्यहाँ गृह मन्त्रालयले बुझ्ने छ। त्यसपछि मात्रै कार्गोमार्फत नेपाल फर्काइन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788007575.jpg)
-1786602170.png)
-1787821306.jpg)
-1786513116.png)
