काठमाडौं– गत डिसेम्बर १८ मा कतारमा विश्वकप जितेसँगै अर्जेन्टिनाका कप्तान लियोनल मेसी फुटबलमा सबैभन्दा महत्वपूर्ण मानिने तीनवटै उपाधि वा पुरस्कार जित्ने दुर्लभ खेलाडीमा दर्ज भएका छन्।
फुटबलमा विश्वकप, युरोपियन च्याम्पियन्स लिगको उपाधि र व्यक्तिगत अवार्ड बालोन डि‘ओरलाई महत्वपूर्ण मानिन्छ। यी तीनवटै उपाधिलाई एउटै भाषामा ‘ट्रिपल क्राउन क्लब’ भनिन्छ। ट्रिपल क्राउन जित्नु फुटबलमा दुर्लभ मानिन्छ। किनकि, हालसम्म यी तीन उपाधि जित्ने जम्मा नौजना मात्र खेलाडी छन्।
डिएगो म्याराडोनाजस्ता सर्वकालीन महान भनिने र अहिलेका क्रिस्टियानो रोनाल्डो र केलियन एम्बाप्पेजस्ता खेलाडीले समेत ‘ट्रिपल क्राउन’ जितेका छैनन्।
यद्यपि, अर्जेन्टिनाका मेसीसँगै इंग्ल्याण्डका बबी चार्लटन, जर्मनीका फ्रान्ज बेकनबाउर, जर्मनीकै गर्ड मुलर, इटालीका पाब्लो रोसी, फ्रान्सका जिनेदिन जिदान तथा ब्राजिलका, रिभाल्डो, रोनाल्डिन्हो र काकाले भने महत्त्वपूर्ण तीनवटै उपाधि जितेका छन्। अब यसबारे चर्चा गरौंः
१. बबी चाल्टन (इंग्ल्याण्ड)
बबी चाल्टन सन् १९६६ मा इंग्ल्याण्डले पहिलो र एकमात्र विश्वकपको उपाधि जित्दा महत्वपूर्ण सदस्य थिए। सो विश्वकपमा तीन गोल गरेका चाल्टनले त्यसैवर्षको बालोन डि‘ओरको उपाधिसमेत जितेका थिए। यस्तै, उनले १९६८ मा च्याम्पियन्स लिगको उपाधि जित्दै ट्रिपल क्राउनमा आफूलाई उभ्याउने पहिलो खेलाडी बने। चाल्टनले यो उपाधि म्यानचेस्टर युनाइटेडबाट जितेका थिए।
२. फ्रान्ज बेकनबाउर (जर्मनी)
जर्मनीका फ्रान्ज बेकनबाउरले पनि फुटबलका महत्वपूर्ण तीन उपाधि जितेका छन्। उनले सन् १९७४ मा तत्कालीन पश्चिम जर्मनीबाट आफ्नै कप्तानीमा विश्वकपको उपाधि जितेका थिए। साथै, उनले बायर्न म्युनिखबाट १९७४, ७५ र ७६ गरी तीनवटा च्याम्पियन्स लिगको उपाधि जितेका छन्। यस्तै, उनले १९७२ र ७६ गरी दुईपटक बालोन डि‘ओर हात पारेका छन्।
३. गर्ड मुलर (जर्मनी)
बेकनबाउरसँगै गर्ड मुलरले पनि सन् १९७४ मा पश्चिम जर्मनीको तर्फबाट विश्वकपको उपाधि जितेका थिए। साथै, उनले सोही वर्ष अर्थात १९७४ र ७६ मा च्याम्पियन्स लिग जितेका थिए। यसैगरी, उनले १९७० मा बालोन डि‘ओरको उपाधि जित्न सफल भए।
४. पाब्लो रोसी (इटाली)
इटालीका पाब्लो रोसीले सन् १९८२ मा विश्वकप जितेका थिए। साथै, उनले त्यसै वषर्ए बालोन डि‘ओर पनि जिते। यस्तै, उनले १९८५ मा च्याम्पियन्स लिगको उपाधि जित्न सफल भए।
५. जिनेदिन जिदान (फ्रान्स)
फ्रान्सका अट्याकिङ मिडफिल्डर जिनेदिन जिदानले सन् १९९८ ले विश्वकप जितेका थिए। फाइनलमा उनले दुई गोल गरेका थिए। उनले त्यसै वर्ष बालोन डि‘ओर पनि जिते। यस्तै, जिदानले २००२ मा स्पेनिस क्लब रियल म्याड्रिडबाट च्याम्पियन्स लिग जितेका थिए।
६. रिभाल्डो (ब्राजिल)
रिभाल्डोले सन् २००२ मा ब्राजिलका लागि विश्वकप जितेका थिए। उनले सो विश्वकपमा उत्कृष्ट प्रदर्शन गर्दै पाँच गोलसमेत गरेका थिए। उनले २००३ मा इटालियन क्लब एसी मिलानबाट च्याम्पियन्स लिग जितेका थिए।
७. रोनाल्डिन्हो (ब्राजिल)
रोनाल्डिन्हो पनि रिभाल्डोजस्तै सन् १९९५ मा विश्वकप जित्दाका ब्राजिली टोलीका सदस्य हुन्। सो विश्वकपमा उनले दुई गोल गरेका थिए। साथै, उनले २००५ मा बालोन डि‘ओर पनि जितेका छन्। यसैगरी, उनले २००६ मा स्पेनिस क्लब बार्सिलोनाबाट च्याम्पियन्स लिगको उपाधि जित्न सफल भए।
८. काका (ब्राजिल)
रिभाल्डो र रोनाल्डिन्होसँगै काकाले पनि सन् २००२ मा विश्वकपको उपाधि उचाले। उनले २००७ मा एसी मिलानबाट च्याम्पियन्स लिगको उपाधि उचालेर बालोन डि‘ओरसमेत जिते।
९. लियोनल मेसी (अर्जेन्टिना)
यसअघि चारपटक च्याम्पियन्स लिग र सर्वाधिक सातपटक बालोन डि‘ओर जितिसकेका लियोनल मेसी कतारमा भर्खरै सम्पन्न विश्वकपको उपाधि जितेसँगै ट्रिपल क्राउन क्लबमा नाम लेखाउने अन्तिम तथा नवौं खेलाडी भएका छन्। अर्जेन्टिनालाई ३६ वर्षपछि विश्वकपको उपाधि दिलाउँदा मेसीले उत्कृष्ट प्रदर्शन गरेका थिए। उनले सात गोल र तीन असिस्ट गर्दै प्रतियोगिताको सर्वोत्कृष्ट खेलाडीले जित्ने गोल्डेन बलसमेत प्राप्त गरे।
मेसीले सन् २००६, ९, ११ र १५ मा गरी चारपटक च्याम्पियन्स लिगको उपाधि जितेका हुन्। उनले यी सबै उपाधि बार्सिलोनाबाट जितेका हुन्।
यसैगरी, मेसीले २००९, १०, ११, १२, १५, १९ र २१ गरी सातपटक बालोन डि‘ओरको उपाधि जितेका छन्। उनी सबैभन्दा धेरै बालोन डि‘ओर जित्ने खेलाडीसमेत हुन्। विश्वकप जितेसँगै यो वर्ष पनि उनले नै बालोन डि‘ओर जित्नसक्ने विश्लेषण गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763721444.png)
-1763559424.jpg)
-1763559424.jpg)
