सत्ता सहकार्यबारे अहिले नै केही भन्न सकिन्न, गठबन्धनका नेताहरु सम्पर्कमा आएका छन् : सिके राउत

राजनीति

नेपाल लाइभ बुधबार, मंसिर १४, २०७९ ०९:०८

काठमाडौं– जनमत पार्टीका अध्यक्ष सिके राउतले सम्भावित नयाँ सरकारमा सहभागी हुने/नहुने बारेमा अहिले नै केही भन्न नसकिने बताएका छन्।

सत्तागठबन्धनलाई केन्द्रदेखि मधेससम्म जनमत पार्टीको धाप महत्वपूर्ण देखिएको बेला अध्यक्ष राउतले तत्कालै कुनै कुरामा दाबी गरेर भन्न नसकिने बताएका हुन्।

नेपाललाइभसँग कुरा गर्दै राउतले वर्तमान सत्तागठबन्धनका केही नेताहरु सम्पर्कमा आएको बारेमा भने स्वीकार गरेका छन्। सप्तरी क्षेत्र नम्बर २ बाट जसपाका अध्यक्ष उपेन्द्र यादवलाई फराकिलो मतान्तरले पराजित गरेका राउतको पार्टी समानुपातिकतर्फ थ्रेस होल्ड कटाउँदै राष्ट्रिय पार्टी बनेको छ।

प्रतिनिधि सभामा समानुपातिकसहित कम्तिमा ५ तथा मधेस प्रदेशमा प्रत्यक्ष र समानुपातिक दुवै गरी १२ भन्दा बढी सिट देखिएको छ। यस्तोमा केन्द्रमा सरकार निर्माणका लागि गठबन्धनलाई बहुमत नपुगेको खण्डमा राउतको पार्टीको सिटले काम गर्न सक्नेछ।

मधेश प्रदेशमा पनि सत्ता गठबन्धन र एमालेतिर दुवैमा राउतको पार्टीको संख्याले बहुमत पुग्ने देखिन्छ। निर्वाचनको परिणामपछि मंगलबार काठमाडौं आएका राउतले नेपाललाइभसँगको कुराकानीमा गठबन्धनका नेताहरुसँग अऔपचारिक कुराकानी अघि बढेको बताए। तर आफ्नो सम्भावित भूमिका अहिले नै प्रष्ट नभएको उनको भनाइ छ।

उनले भने, ‘अहिले पूर्ण रुपमा नतिजा पनि आएको छैन र महत्वपूर्ण कुरा हामीलाई गठबन्धनमा सत्ता समीकरणमा लगेपछि हाम्रो भूमिका के रहन्छ? त्यो पनि अहिले प्रष्ट भएको छैन।’

सबै कुराको ख्याल गरेर ठीक समयमा ठीक निर्णय लिने राउतले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

मुलुक प्रधानमन्त्रीले नभई बिचौलियाहरुले चलाइरहेछन् : उपेन्द्र यादव

गीत बजाएको आरोपमा १४ जना पक्राउ

कावासोतीमा मोटरसाइकल दुर्घटनामा परी दाजुभाइको मृत्यु