काठमाडौं– कुनै बेला चुनावी कमाण्डर भएर निर्वाचन जिताएका सोमप्रसाद पाण्डेलाई पराजित गर्दे एमाले नेता ठाकुर गैरेले पाल्पा २ बाट जित हासिल गरेका छन्। तत्कालीन एमालेमा हुँदा पाण्डे ‘गुरु’ जस्तो गैरे ‘चेला’ जस्तो भूमिकामा रहन्थे। र त २०७० र २०७४ मा गैरे आकांक्षी हुँदा हुँदै उनै पाण्डेलाई जिताउने अवस्थामा पुगे।
तर यो निर्वाचनमा पाण्डे एमालेलाई छोडेर एकीकृत समाजवादीमा गएपछि गैरेसँग उनको प्रतिस्पर्धा भएको हो। जहाँ गैरेले पाण्डेलाई ४ हजार मतान्तरले पराजित गरे। गैरेले जित हासिल गर्दा २७ हजार ८१७ ल्याए भने पाण्डेले जम्मा २३ हजार ८५१ मत मात्र ल्याए।
गैरे २०७० को दोस्रो संविधान सभा निर्वाचनमा पाल्पा २ बाट उम्मेदवारका आकांक्षी थिए। तर अन्तिम समयमा पार्टीले अर्का नेता सोमप्रसाद पाण्डेलाई टिकट दियो। पाण्डेलाई जिताउन गैरेलाई चुनावी कमाण्डर बनाइयो। आफैं उम्मेदवार बन्ने योजनामा रहेका गैरे ‘रिङ’ आउट भएपछि पाण्डे लगायत पाल्पाका अन्य उम्मेदवारलाई जिताउने अभियानको नेतृत्वमा सीमित भए।
२०७४ मा भएको प्रतिनिधि सभा तथा प्रदेश सभा निर्वाचनमा पनि टिकटका लागि गैरे र पाण्डेकै दाबेदारी रह्यो। उक्त निर्वाचनमा पनि पाण्डेले नै बाजी मारे।
गैरेलाई प्रदेश सभाको उम्मेदवारी दिन सहयोगी तथा शुभेच्छुकले सुझाव दिएका थिए। तर उनले संघमै प्रतिस्पर्धा गर्ने मनसाय राखेपछि गैरे पाण्डेको जितका लागि सहयोगी भूमिकामा रहे।
कुनै बेला पाण्डेलाई जिताउन ‘कमाण्डर’ को भूमिका खेलेका गैरे र उनै पाण्डेबीच प्रतिस्पर्धा रहेकोले यो निर्वाचनलाई निकै उत्सुकताका साथ हेरिएको थियो। पाण्डेले २०५१ पछिका सबै निर्वाचनमा पल्पाबाट उम्मेदवार हुने मौका पाएका कारण विद्यार्थी राजनीतिबाट चर्चा कमाएका गैरे सँधै ओझेलमा रहन बाध्य भएका थिए।
को हुन् गैरे?
५४ वर्षीय गैरे नेकपा एमालेका पोलिटब्यूरो सदस्य हुन्। उनी एमालेको विद्यार्थी संगठन अनेरास्ववियुको अध्यक्ष समेत भइसकेका छन्। विद्यार्थी आन्दोलनमार्फत् खेलेको भूमिकाबाट उनले सक्रिय नेताको परिचय बनाएका थिए।
एमालेको भातृ संगठन अनेरास्ववियुबाट २०४४ देखि विद्यार्थी राजनीति सुरु गरेका गैरे पाल्पा जिल्ला अध्यक्ष हुँदै २०६३ मा अनेरास्ववियुको केन्द्रीय अध्यक्ष भएका थिए।
विद्यार्थी संगठनको नेतृत्वमा हुँदा गैरेले लोकतन्त्रको स्थापनाका लागि गरेको योगदान र विद्यार्थीका निम्ति सवारी शुल्कमा ३३ प्रतिशत छुटलाई कार्यन्वयनमा निरन्तर खबरदारी गरेको भूमिकालाई स्मरण गरिन्छ। यद्यपि सवारी शुल्कमा छुटको व्यवस्थाका लागि दिवंगत नेता रवीन्द्र अधिकारीले नेतृत्व गरेका थिए।
यस्तै, २०६५ मा बुटवलमा भएको एमालेको आठौं महाधिवेशनबाट एमालेको केन्द्रीय सदस्यमा निर्वाचित भएपछि गैरेले थप चर्चा बटुलेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791645793.png)
-1786602170.png)
