एजेन्सी– इजरायली आक्रमणमा शनिबार बिहान चारजना सिरियाली सरकारी सैनिकको मृत्यु भएको छ।
मध्य र पश्चिमी जिल्लाहरूमा भएको आक्रमणबाट एकजना घाइते भएको सिरियाली सरकारी मिडियाले जनाएको छ।
‘बिहान ६ः३० बजे इजरायली शत्रुले हवाई आक्रमण गरेको र त्यसमा परी चार सैनिकको मृत्यु भएको र एक सिपाही घाइते भएका छन्,’ सैन्य स्रोतले आधिकारिक साना समाचार एजेन्सीलाई बताएको छ।
बेलायतमा रहेको सिरियन अब्जर्भेटरी फर ह्युमन राइट्सले होम्स र हामा प्रान्तमा इरानी समर्थक समूहहरूलाई निशाना बनाएर हतियार र गोलाबारुदस्थलमा आक्रमण गरेको बताएको छ।
त्यसैगरी इजरायलले लाटाकिया प्रान्तमा रहेको सिरियाली एयर डिफेन्स ब्याट्रीलाई पनि निशाना बनाएको छ।
इजरायलले त्यस्ता रिपोर्टहरूमा विरलै टिप्पणी गर्ने गर्छ तर सन् २०११ मा गृहयुद्ध शुरु भएदेखि उसले सिरियाली क्षेत्रमा सयौं हवाई हमलाहरू गरेको छ। सरकारी स्थानहरू साथै इरान समर्थित सेना र हिजबुल्लाह लडाकुहरू त्यसको निशान बनेका छन्।
इजरायलले बारम्बार भनेको छ कि उसले आफ्नो कट्टरपन्थी दुष्मन इरानलाई त्यहाँ पाइला टेक्न अनुमति दिने छैन।
नोभेम्बर ८, २०२१ मा शायरात एयरबेसलाई लक्षित गर्दै इजरायली आक्रमणमा दुई सिरियाली सरकारका सैनिक घाइते भएको पनि सिरियाली मिडियाले जनाएको छ।
अक्टोबरको अन्तमा दमास्कस नजिकैका धेरै स्थानमा इजरायली आक्रमणका क्रममा चार इरानी समर्थक लडाकु मारिएको पनि अब्जरभेटरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
