मंसिर ४ गते हुने प्रतिनिधि सभा निर्वाचनका लागि नेपाली कांग्रेसका मोहन बस्नेत सिन्धुपाल्चोक-२ बाट उम्मेदवार बनेका छन्। यसअघि सिन्धुपाल्चोक-१ बाट उम्मेदवार भएर सांसद र मन्त्री समेत बनेका बस्नेत यस पटक नयाँ क्षेत्रमा गएर उम्मेदवार भएका छन्।
सत्ता गठबन्धनको साझा उम्मेदवारको रुपमा निर्वाचनमा होमिएका बस्नेतको प्रतिस्पर्धा नेकपा एमालेका शेरबहादुर तामाङसँग हुँदैछ। तामाङ तेस्रो पटक जित निकाल्ने दाउमा छन् भने बस्नेत उनलाई पराजित गर्दै नयाँ क्षेत्रमा आफ्नो वर्चस्व कायम गर्ने अभियानमा छन्। नेपाली कांग्रेसका केन्द्रीय सदस्य एवं सिन्धुपाल्चोक-१ का उम्मेदवार बस्नेतसँग निर्वाचन वरिपरि रहेर नेपाल लाइभले गरेको कुराकानीः
तपाईं यो क्षेत्रमा उम्मेदवार भएर घरदैलो गरिरहँदा जनताको अपेक्षा के पाउनुभएको छ?
जनताको चासो र अपेक्षा भनेकै विकास हो। सिन्धुपाल्चोक- १ मा निर्वाचित भएर मन्त्री हुँदा मैले धेरै विकास गरेको तर यो क्षेत्रमा जितेर जानेहरुले काम नगरेकोले यहाँका जनताले मबाट धेरै अपेक्षा राखेको देखें। यहाँका जनताले कृषिदेखि जडिबुटी र पर्यटकीय विकासको आशा राखेको पाएको छु।
बाढीले धेरै क्षति पुगेको क्षेत्र हो यो। यहाँका धेरै मानिस बाढीबाट विस्थापित भएका छन्। त्यसैले यहाँका मतदाताले काम गर्ने मानिस खोजिरहेका छन्। जनताका अप्ठ्यारा केन्द्रसम्म लैजाने र बजेट ल्याउने सांसद यहाँका जनताले खोजेको मैले पाएको छु।
मैले जनताको अपेक्षा अनुसार दिन र महिना तोकेर काम गर्छु भनेको छु। ती काम जिते पनि वा हारे पनि सम्पन्न गर्ने योजना बनाएको छु। १२ कक्षासम्म निःशुल्क गराउने अभियान अब सिन्धुपाल्चोक- २ बाट सुरु हुन्छ। लामो योजना बनाएर काम गरिरहेका छौं। सिन्धुपाल्चोकका धेरै क्षेत्र फ्रि वाइफाइ जोन बनाउने घोषणा गरेको छु र त्यो काम पूरा गर्नेछु।
तपाईंको प्रतिस्पर्धीका रुपमा रहनुभएका शेरबहादुर तामाङ यही क्षेत्रको स्थानीय हुनुहुन्छ। उहाँ यसअघि दुई पटक जितेर सांसद हुनुभएको र तपाईं अन्तैबाट आएको आरोप छ नि?
उहाँलाई आफ्नै कार्यकर्ताले गुनासो गरिरहेका छन्। जहाँ जाँदा पनि तपाईंले पाँच वर्षमा खै के काम गर्नुभयो भनी प्रश्न गरिरहेका छन्। उहाँलाई गाउँ घुम्न समेत गाह्रो परिरहेको देखिन्छ। त्यसैले मेरो उहाँसँग के प्रतिस्पर्धा भन्ने?
गठबन्धनका दलहरु माओवादी केन्द्र र एकीकृत समाजवादीका साथीहरु इमान्दारितापूर्वक निर्वाचन प्रचारमा लाग्नुभएको छ। गठबन्धनको भोट जोड्दा १६ हजारभन्दा धेरै अन्तर छ। उहाँको लोकप्रियता दिनप्रतिदिन घट्दो छ। म जनतासँग काम गरेर विकासवादी नेताको रुपमा परिचित छु। प्रत्येक वडामा पुग्दा धेरै हौसला पाएको छु। काम गर्ने उम्मेदवार भएकोले पार्टी नभनी भोट हाल्छौं भन्नुभएको छ।
तपाईं सिन्धुपाल्चोक- १ बाट उम्मेदवार हुँदै आउनुभएको थियो। यो पटक २ मा आउनुभएको छ। टुरिस्ट उम्मेदवार भनेर तपाईंको आलोचना भइरहेको छ। यस्तो अवस्थामा आफ्नो प्रतिस्पर्धीलाई कसरी लिनुभएको छ?
म विगतमा यो क्षेत्रमा निर्वाचन लडेको थिइनँ, यो सत्य हो। तर मैले यहाँको विकासका लागि काम गरेको छु। म स्वास्थ्य राज्यमन्त्री हुँदा मेलम्ची बजारमा अस्पताल निर्माण गरें। मेरो प्रतिस्पर्धी शेरबहादुर तामाङ स्वास्थ्य मन्त्री नै हुनुभयो। कानुन मन्त्री पनि हुनुभयो। उहाँले त्यो अस्पतालका लागि के गर्नुभयो त? मैले जिल्लाका धेरै विद्यार्थीलाई नि:शुल्क पढाएँ। बाढी-पीडित विद्यार्थीहरुलाई अहिले पनि पढाइरहेको छु।
मेलम्ची बजारमा ठूलो पहिरो गयो। म बिहानै आएर पैसा दिएर गएँ। उहाँ भने कार्यकर्ताले गाली गरेपछि बेलुका आएर हात हल्लाएर जानुभयो। भ्रेमाथाङ पहिरोले कति पुल बगायो। मैले चनौटेको रातो पुल बनाउन पहल गरें। प्रधानमन्त्री शेरबहादुर देउवासँग कुरा गरेर मैले त्यहाँ पुल बनाएँ। अहिले उहाँ त्यही पुलमा हिँडेर चुनाव प्रचार गरिरहनुभएको छ। म पुल बनाउने, बाढी आउने वित्तिकै आउने टुरिस्ट कि उहाँ टुरिस्ट।
उहाँको घरकै बाटोबाट म आएको हुँ। उहाँको घर अहिले शून्य छ। मेरो घरमा हेर्न जानूस्, कार्यकर्ता सधैं छन्। भूकम्पको समयमा मैले जनतालाई घरमै खाना बनाएर खुवाएँ। त्यतिबेला उहाँको अत्तोपत्तो थिएन।
सधैं काठमाडौ बस्ने, जनताको दु:खमा कहिल्यै नआउने अनि अरुलाई टुरिस्ट उम्मेदवार भनेर प्रचार गर्न मिल्छ? यहाँका जनतालाई कोरोना लाग्दा हेलिकोप्टरबाट अस्पताल लैजाने, स्वास्थ्य बिमा गर्नेदेखि अक्सिजन प्लान्ट समेत बनाएँ मैले। त्यसैले टुरिस्ट को हो, मंसिर ४ गतेको निर्वाचनमा जनताले फैसला गर्छन्।
तपाईंले जित्ने आधार के हो त?
मेरो जित्ने आधार मेरो काम नै हो। मैले गठबन्धनको आधारमा धेरै मत पाउँछु। पहिला पनि पपुलर मत पाएको थिएँ। अर्को आधार यही हो। यहाँ नेपाली कांग्रेस र माओवादीको संगठन र मत राम्रै छ। हामीलाई एकीकृत समाजवादीको समेत साथ छ। एमाले गठबन्धनको मतभन्दा निकै पछाडि हुनु पनि जितको बलियो आधार हो। मेरो अर्को जितको आधार शेरबहादुर तामाङले कुनै काम नगर्नु पनि हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
