गमगढी– गत असोजको अन्तिम सातामा आएको भारी वर्षाले साना जलविद्युत् गृहहरुमा पुगेको क्षतिका कारण मुगु र हुम्लामा विद्युत् आपूर्ति हुन सकेको छैन। नेपाल विद्युत् प्राधिकरणले त्यहाँ वैकल्पिक व्यवस्थामार्फत् विद्युत् आपूर्तिको प्रयास थालेको छ।
वर्षा र पहिरो क्षति पुर्याएका विद्युत्गृहहरुरु पुननिर्माण तथा मर्मत गरी विद्युत् सुचारु गर्न अझै समय लाग्ने भएपछि प्राधिकरणले जेनेरेटरमार्फत् विद्युत् उत्पादन गरी मुगु र हुल्लामा आपूर्ति गर्ने छ। यसका लागि प्राधिकरणले ती जिल्लामा जेनेरेटरको व्यवस्था गरेको छ।
गत असोज १९–२५ गतेसम्मको भारी वर्षासँगै आएको बाढीपहिरोले मुगुस्थित ४०० किलोवाटको गमगाढ र हुम्लास्थित ५०० किलोवाटको हेल्दुङ साना जलविद्युत् गृहको नहरमा ठूलो क्षति पुर्याएको छ। नहरमा क्षति पुगी विद्युत् उत्पादन बन्द भएपछि मुगु र हुल्ला जिल्ला विद्युत्बिहीन भएका थिए। भौगोलिक कठिनाइ तथा विकटताका कारण दुई जिल्लामा राष्ट्रिय प्रसारण लाइन बनेको छैन।
1667459720.jpg)
प्राधिकरणले गमगढी र आसपासका क्षेत्रमा विद्युत् आपूर्तिका लागि कालिकोटमा रहेको ३०० केभीए क्षमताको जेनेरेटर मुगुमा लगेको छ। हुल्लाको सिमीकोट र आसपासका क्षेत्रमा विद्युत् आपूर्तिका लागि १२५ र १०० केभिएका जेनेरेटरहरुको व्यवस्था गरिएको छ। प्राधिकरणका मुगुमा ३ हजार १०० र हुल्लामा २ हजार ३०० ग्राहक छन्।
जेनेरेटहरु कुलेखानी विद्युत् गृह र नयाँ बुटवल सबस्टेसनबाट सिमिकोट लगिएका हुन्। प्राधिकरणले ती जेनेरेटहरु सडकबाट ढुवानी गरी मुगुको गमगढीसम्म लगेको थियो। राष्ट्रिय सडकले अहिलेसम्म नजोडिएको हुम्लामा गमगढीबाट जेनेरेटर र त्यसका लागि आवश्यक पर्ने डिजेल सेनाको हेलिकोप्टरमार्फत् ढुवानी गरी सिमिकोट पुर्याइएको छ।
प्राधिकरणका कार्यकारी निर्देशक कुलमान घिसिङ, वितरण तथा ग्राहक सेवा निर्देशनालयका उपकार्यकारी निर्देशक मनोज सिलवाल, कर्णाली प्रादेशिक कार्यालयका प्रमुख शम्भु कुसियत यादवसम्मिलित टोली बुधबार जेनेरेटर लिएर सिमिकोट पुगेको थियो।
प्राधिकरण र हुल्लाका प्रमुख जिल्ला अधिकारी सीता परियार नेतृत्वको टोलीले पहिरोले क्षति पुर्याएको हेल्दुङ विद्युत्गृहको संरचनाहरु र त्यहाँ भइरहेको पुनर्निर्माणको स्थलगत निरीक्षण गरेको थियो। टोलीले एक महिनाभित्रमा पुनर्निमाणको काम सम्पन्न गर्न निर्माण व्यवसायीलगायतलाई निर्देशन दिएको छ।
कार्यकारी निर्देशक घिसिङले साना विद्युत् गृहको पुनर्निर्माण भइरहेको र यसका लागि अझै कम्तीमा एक महिना लाग्ने देखिएकोले यस अवधिमा त्यस क्षेत्रको विद्युत्विहीनताको अवस्थाप्रति संवेदनशील भइ तत्कालका लागि हेलिकोप्टरमार्फत् जेनेरेटर र डिजेल ढुवानी गरी वैकल्पिक रुपमा विद्युत् आपूर्तिको व्यवस्था गरिएको बताए।
1667459719.JPG)
‘जेनेरेटरमार्फत् विद्युत् उत्पादन गर्दा लागत प्रतियुनिट ८० रुपैयाँभन्दा बढी पर्छ, तर यहाँका अधिकांश ग्राहकबाट न्यूनतम ३० रुपैयाँ मात्र उठ्छ, यहाँ खपत हुने विद्युत्को आम्दानीभन्दा लागत दोब्बरभन्दा महंगो छ, तर सबैको घरमा उज्यालो पुर्याउने राज्यको दायित्व भएकोले नाफा नोक्सान नहेरी विद्युत्लाई आधारभूत आवश्यकताको वस्तुको रुपमा लिएर हेलिकोप्टरमार्फत् सामान ढुवानी गरेरै भएपनि आपूर्तिको व्यवस्था गरेका छौं’, घिसिङले भने।
हुम्लाकी प्रमुख जिल्ला अधिकारी परियारले स्थानीय सरकारी कार्यालय तथा प्राधिकरणबाट रकम जोहो गरिएको र जनश्रमदानमार्फत् समेत पहिरोले क्षति पुर्याएको विद्युत्गृहको नहरको पुनर्निर्माण भइरहेको बताइन्। ‘पुनर्निर्माणमार्फत् विद्युत्गृह तत्कालका लागि सञ्चालनमा ल्याएपनि त्यो क्षेत्र विपत् जोखिमयुक्त भएकोले दीर्घकालीन हुँदैन, त्यसैले विद्युत् आपूर्तिको स्थायी विकल्प खोजी गरी तत्काल काम सुरु गर्नु पर्छ’, उनले भनिन्।
मुगुका प्रमुख जिल्ला अधिकारी रोम बहादुर महतले गमगाढ विद्युत्गृहको पुनर्निर्माण जतिसक्दो छिट्टो सम्पन्न गरी विद्युत् आपूर्तिको व्यवस्था गर्न आग्रह गरे। उनले पुनर्निर्माणका लागि आवश्यक सहजीकरण गरिदिन आफू तयार रहेको प्रतिबद्धता जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
