नेपाली कांग्रेसका केन्द्रीय सदस्य एवं उद्योग वाणिज्य तथा आपूर्तिमन्त्री दिलेन्द्रप्रसाद बडू मंसिर ४ गते हुने प्रतिनिधि सभा निर्वाचनमा दार्चुलाबाट लड्दैछन्। सत्ता-गठबन्धनका साझा उम्मेदवार बडूको प्रतिस्पर्धा नेकपा एमालेका पोलिटब्युरो सदस्य गणेश ठगुन्नासँग हुँदैछ।
२०४८ र २०५६ को प्रतिनिधि सभा निर्वाचनमा दार्चुलाबाट विजयी भएका बडू यस पटक ह्याट्रिक गर्ने दाउमा छन्। तीन पटक दार्चुलाबाट संघीय संसदको प्रतिनिधित्व गरिसकेका उनी २०७४ मा भने समानुपातिकतर्फबाट सांसद भएका थिए।
नजिकिँदै गरेको निर्वाचनको तयारी र चुनावी अजेण्डा लगायतका विषयमा बडूसँग नेपाल लाइभले गरेको कुराकानी:
तपाईं यस पटक के अजेण्डा लिएर मत माग्दै हुनुहुन्छ?
पहिलो त राष्ट्रिय अजेण्डा नै हो। मुलुकको संविधान, संविधानले निर्देशित गरेको शासन व्यवस्था, संघीयता, समावेशिता जस्ता विषयमा जुन संकट उत्पन्न भयो, त्यसलाई जोगाउनु नै मेरो मुख्य अजेण्डा हुनेछ।
यो सामान्य निर्वाचन मात्र होइन, प्रवृत्तिका विरुद्धको आन्दोलन पनि हो। यही कुरा हामीले जनता बुझाइराखेका छौं। किन यस्तो अवस्था आयो? किन हामी गठबन्धन बनाएर चुनावमा जानुर्यो? जनताको ठूलो बलिदान र संघर्षपछि संविधान सभाबाट बनेको संविधान किन समाप्त पार्न खोजियो? यसको हिसाब-किताब अब जनताले खोज्नेछन्।
यो संविधान र प्रणाली बचाउन सकिने भने न मुलुकले समृद्धिको बाटो समात्ने हो। संविधान नै खतरामा परेपछि मुलुक त दुर्घटनामा पर्छ नै। मुलुकलाई दुर्घटनाबाट बचाउनु पहिलो आवश्यकता हो। यीनै विषयलाई मैले अजेण्डामा समेटेको छु।
यो निर्वाचनलाई कसरी लिनुभएको छ?
मैले अघि नै भनिहालें, यो सामान्य निर्वाचन होइन। सामान्य भएको भए त आ-आफ्ना पार्टीका अजेण्डा लिएर गइन्थ्यो होला नि। हामी गठबन्धनसहित निर्वाचनमा होमिएका छौं। यो विशेष अवस्थामा बनेको गठबन्धन हो। संविधानले निर्दिष्ट गरेको प्रणाली, यही प्रणालीबाट जनताले अपेक्षा गरेको विकास र समृद्धिको यात्रा सुनिश्चित गर्नु जरुरी छ।
दोस्रो, आफ्नो जिल्लासँग सम्बन्धित विकास निर्माणका विषयवस्तु मेरा मुख्य अजेण्डा हुन्। म आफू निर्वाचित भएर सरकारमा प्रतिनिधित्व गर्दाको बखत जति काम गरें। कति अधुरा छन्। ती अधुरा कामलाई पूरा गर्नु मेरो प्रमुख जिम्मेवारी हो।
म मन्त्री हुँदा जिल्लामा के-कति काम गरें? म नहुँदा जसले जिते उनीहरुले १० वर्षको अवधिमा के गरे? त्यो त जनताले मूल्यांकन गरेकै होलान्। मैले गरेको कामहरु जनताले खुलस्त रुपमा देखेका छन्। त्यस कारण उनीहरु हामीलाई कुनै किसिमका विकास निर्माणका कामले छुन सक्दैनन्।
प्रतिपक्षी दल नेकपा एमालेले २०७४ सालको चुनावपछि जसरी मुलुकलाई दुर्घटनामा पार्ने कोसिस गर्यो। त्यो दण्डनीय छ। जसका कारण एमाले आफैं पनि विभाजित भएर नेकपा एकीकृत समाजवादी पार्टी बनेको छ। जसले नेकपा एकीकृत समाजवादी पार्टीको नेतृत्व गरिरहेका छन् उनीहरु एमाले भित्रका इमान्दर र आन्दोलन र परिवर्तनका पक्षधर हुन्।
केपी ओलीजीको एमाले अहिले मैदानमा छ। ऊ त्यसै पनि कमजोर भइसक्या छ। त्यसका विरुद्धको एउटा जनमत संघर्षको एउटा बाटोमा लागिरहेका छौं।
तपाईं जित्ने आधार के-के हुन्? जनताले तपाईंलाई किन मतदान गर्ने?
मैले गरेको विकास र योजनाहरु नै मेरा जित्ने आधार हुन्। २०४८ र २०५६ सालमा मैले यही ठाउँबाट चुनाव जितेर गएको हुँ। त्यतिबेला सरकारमा हुँदा र अहिले संघीय सरकारमा रहँदा मैले गरेका कामहरु नियाल्ने हो भने स्पष्ट हुन्छ।
हामीले प्राधिकरणबाट चमेलिया विद्युत आयोजना बनायौं। यहाँ विद्युतीकरण हाम्रै पालामा सुरु भएको हो। सँगसँगै हामीले खानेपानीका आयोजनाहरु सञ्चालन गरेका छौं। २०५६ मा पनि सरकारमा रहँदा शिक्षा क्षेत्रमा स्कुल भवनहरु बनाएको छु। त्यो पूर्वाधार अहिले पनि टिकिरहेको छ।
अपी नाप्पा निकुञ्ज बनाएर हामीले पर्यटकीय पूर्वाधारका निमित्त प्रोजेक्ट चलाइराखेका छौं। यहाँका गाउँहरुमा अहिले खाद्यान्नको व्यवस्था गरेका छौं। म सरकारमा रहँदा २०५१ सालमा मैले नै यहाँ खाद्यान्न डिपोको स्थापना गरेको थिएँ। तीन ठाउँमा खाद्य डिपो थियो। यस पटक ८ वटा नयाँ ठाउँमा खाद्य डिपो थपेको छु। जिल्लामा खाद्यान्नको कार्यालय पुनर्स्थापना गरेको छु।
यहाँ तीन वटा साना अल्लो उत्पादन गर्ने उद्योगहरु चलिरहेका छन्। उनीहरुलाई प्राविधिक सहयोग पुर्याएका छौं।
दार्चुला भारत र नेपालसँग जोडिएको जिल्ला हो। दार्चुलामा भर्खरै नेपाल-भारत जोड्ने मोटेरबल पुलको शिलान्यास पनि गरेका छौं। यसअघि गड्डा चौकीमा एउटा पुल थियो। त्यसपछिको पहाडी जिल्ला दार्चुलामा मोटेरबल पुल बन्ने भएको हो। यसले उद्योग तथा वाणिज्यको क्षेत्रमा मुलुकको समृद्धिको कुरामा टेवा पुग्नेछ। हामीले जुन काम अहिले गरिरहेका छौं, जुन प्रयत्न गर्यौं, त्यसका निम्ती हामीलाई जनताले मत दिन्छन् भन्नेमा विश्वस्त छु।
प्रतिपक्षलाई तपाईंले कसरी मूल्याङ्कन गर्नुभएको छ?
प्रतिपक्षलाई मैले चुनौतीको रुपमा लिएको छैन। उनीहरु हाम्रो छेउमै पुग्दैनन्। उनीहरुले विकासको सन्दर्भमा पनि हामीलाई छुन सक्दैनन्। हामी उनीहरुभन्दा कयौं गुणा अगाडि छौं।
प्रतिपक्षले संसद् विघटन गरेर संविधान मास्न खोज्दा हामीले बचायौं। यी कुरा सबै मतदाताकहाँ पुर्याएका छौं। मतदाताले पूर्ण रुपमा हामीलाई साथ दिनुभएको छ।
तपाईंले जित्नुभयो भने संसदमा कस्ता मुद्दा उठाउनुहुन्छ?
हामीले जनतामाझ गरेका बाचाहरु पूरा गर्नेछौं। राजनीतिक स्थायित्वका विषय हामी जोडतोडका साथ उठाउँछौं। विकास निर्माणका मुद्दा उठाउँछौं। संघीय सरकार, प्रदेश सरकारमार्फत हामी स्थानीय सरकारलाई पनि साधन-स्रोत सम्पन्न बनाउँछौं।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।