काठमाडौं- नेकपा माओवादी केन्द्रका उपाध्यक्ष नारायणकाजी श्रेष्ठले पार्टी अध्यक्ष पुष्पकमल दाहाल प्रचण्ड चितवन छाडेर निर्वाचन लड्न गोरखा जानुका चार कारण औंल्याएका छन्।
गोरखा–काठमाडौं सम्पर्क मञ्चले आयोजना गरेको कार्यकर्ता प्रशिक्षण कार्यक्रममा श्रेष्ठले उक्त कुरा उल्लेख गरेका हुन्।
श्रेष्ठले औंल्याएका चार कारण यस्ता छन्
१. प्रचण्ड कुनै पनि निर्वाचन क्षेत्रमा लगातार दोहोरिरहने पुँजीवादी संसदीय सोच अन्तर्गत चुनाव लडिरहनु भएको छैन। प्रचण्डमा अन्तर्निहिन यो पुँजीवादी–संसदवाद अन्तर्गत एउटै क्षेत्र नै बनाई राख्ने सोचबाट क्रमभङ्गताको परिणाम हो। प्रचण्डको चिन्तन प्रणालीको स्वभाविक प्रक्रिया हो।
२. गोरखा जिल्लामा अध्यापन गराउनु भएको र संगठन निर्माण गर्नु भएकोले प्रचण्डको युवा अवस्था देखिको भावनात्मक सम्बन्ध छ। त्यस्तै, जनयुद्धको तयारीको निर्णायक बैठक गर्नुभयो। भावनात्मक सम्बन्ध र क्रान्तिकारी पृष्ठभूमिको सम्मान गर्न पनि प्रचण्डले गोरखा रोज्नुभयो।
३.विकास र समृद्धिका ऐतिहासिक बाँकी कार्यभार पूरा गर्न र नयाँ नेपालको मार्गचित्र प्रारम्भका लागि पनि प्रचण्ड गोरखा जानुभएको हो।
४.शान्ति प्रक्रियाको एउटा कार्यभार अन्तर्गतको संक्रमणकलीन न्यायको बाँकी कार्यभार बाँकी छ। द्वन्द्वको सिलसिलामा गोरखा यस्तो थलो बन्यो जसका कारण यहाँ विभिन्न कटुताहरु रहेका छन्, द्वन्द्वका घाउहरु छन्। अध्यक्षले सोच्नुभयो, शान्ति प्रक्रियाको बाँकी कार्यभार पूरा गर्नैपर्छ र त्यसको प्रारम्भ गोरखाबाट पूरा गर्नुपर्छ। त्यसैले गोरखा जानुभएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
