काठमाडौं– नेपाल मजदुर किसान पार्टी (नेमकिपा)ले घोषणापत्र सार्वजनिक गरेको छ। मंसिर ४ गते हुने प्रतिनिधि सभा र प्रदेश सभा निर्वाचनका लागि सो पार्टीले मंगलबार घोषणापत्र सार्वजनिक गरेको हो।
सदनमा नेपाली कांग्रेस र नेकपा (एमाले)को भूमिकाको चर्चा गर्दा घोषणापत्रमा ती दुवै दल नेतृत्वको गठबन्धनलाई एउटै सिक्काका दुई पाटा भनिएको छ।
’कांग्रेसको नेतृत्वको गठबन्धन र एमाले नेतृत्वको गठबन्धन दुवै सारमा एउटै सिक्काका दुई पाटा हुन् भन्ने प्रस्ट छ। यी दुवै सिद्धान्तहीन गठबन्धन पुँजीवादी सरकारको भागबन्डा गर्ने चाँजोपाँजो मात्र हो’, घोषणापत्रमा भनिएको छ।
जनताबाट निर्वाचित नेमकिपाका प्रतिनिधिहरूले देश र जनताको व्यापक हितमा नीति, कार्यक्रम र विधेयक निर्माण गर्ने एवम् कामदार जनताको पक्षमा पारित गराउन संघर्ष गर्ने र देशघाती सन्धि–सम्झौतालाई रोक्न आवाज उठाउने घोषणापत्रमा उल्लेख छ।
नेपाली सम्पत्ति र पुँजीलाई विदेशमा लान नपाउने ऐन–कानुन तत्काल बनाउन आवश्यक रहेको नेमकिपाको ठहर छ।
’ती पुँजीलाई देशकै विकासमा लगाउन राष्ट्रिय पुँजीपतिहरूलाई उत्साहित गर्नुपर्छ। विदेशी पुँजीलाई प्रोत्साहन गर्ने तर राष्ट्रिय पुँजीपति वर्गलाई उत्साहित नगर्ने सरकारी प्रवृत्तिको निन्दा र विरोध गर्दै त्यस प्रवृत्तिमाथि अंकुश लगाउनु आवश्यक छ’, घोषणापत्रमा भनिएको छ।
स्थानीय तहलाई स्वायक्तता र विकेन्द्रीकरणको अधिकार दिइएको खण्डमा संघीयताको आवश्यकता नरहेको नेमकिपाको अडान छ। ’प्रदेश सरकारले केन्द्रको मुख नताकी आफ्नै खुट्टामा उभिएर संघीय सरकारले गर्न नसकेको कृषि, उद्योग, यातायात, शिक्षा, स्वास्थ्य उपचारको तालिम तथा रोजगारबारे तड्कारो रूपले काम गर्नु आवश्यक छ।
खेतीको निम्ति मल कारखाना स्थापना गर्ने, कृषि औजार कारखाना पुनःस्थापना गर्ने, नयाँ बिउबिजन बन्दोवस्त गर्ने, सिंचाइमा ध्यान दिने र दलगत भेदभाव नगरी अधिकारविहीन स्थानीय तहहरूको समस्या समाधानमा सहयोग गरेमा प्रदेशको महत्व बढ्दै जानेछ’, घोषणापत्रमा भनिएको छ।
यस्तो छ पूर्णपाठ:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
