रावल र भुसालले टिकट नपाएकोप्रति ओलीको टिप्पणी– अरुलाई पनि त पालो दिनुपर्छ

राजनीति

नेपाल लाइभ शनिबार, कात्तिक ५, २०७९ १९:४२

काठमाडौं– नेकपा (एमाले)का अध्यक्ष केपी शर्मा ओलीले पार्टीका दुई चर्चित नेताहरू भीम रावल र घनश्याम भुसाललाई टिकट नदिइएकोप्रति टिप्पणी गरेका छन्। दुवै नेताको नाम नलिई ओलीले अरुलाई पनि पालो दिइनुपर्ने बताए।

तिहारका अवसरमा एमाले ललितपुरले आयोजना गरेको शुभकामना आदानप्रदान कार्यक्रममा सम्बोधन गर्दै उनले भने– ’एकाधले टिकट पाएनन्। स्वभाविक हो। पालो गर्नुपर्दैन? अरुलाई पनि त पालो गर्नुपर्छ। कि, पार्टीको पक्षमा, देशको पक्षमा असाधारण भूमिका भए पनि ’उहाँको भूमिका आवश्यक छ, उहाँ नभइकन पार्लियामेन्ट चल्दैन, उहाँ नभइकन देश हाँकिदैन’ भन्ने स्थिति त होइन!’

ओलीे एमाले कार्यकर्तालाई कुनै सेन्टिमेन्टमा बग्नुपर्ने आवश्यकता नभएको बताए। एमालेमा न्याय हुने तर न्याय सापेक्ष हुने उनको भनाइ थियो।

ओलीले टिकट नपाएका नेताप्रति लक्षित गर्दै ०४८ देखि सांसद भइरहेका र गत असोज २÷३ गतेसम्म सांसद रहिरहेका मानिसले टिकट नपाएकोमा रुवाबासी भएको बताए।

’यसपटक अस्ति असोज २ गते बल्ल मुख खाली भएको छ, उसलाई किन बनाइएन भनेर फेरि रुवाबासी छ। अनि एकै जनाले मात्रै पाइरहनुपर्छ भन्ने छ? काम कस्तो गरेको छ, त्यो नभन्ने। पार्टीको पक्षमा एक शब्द कहिल्यै बोलेको होइन।

पार्टीको हितमा एक शब्द बोलेको होइन। आन्दोलनको हितमा एक शब्द बोलेको होइन। अरुअरु प्रकारका तमासा देखाउनुपर्ने ठाउँमा तमासा देखाएको छ,’ उनले भने।

रावलले २०५१ को मध्यावधि निर्वाचनबाट र भुसालले ०५३ मा सम्पन्न उपनिर्वाचनबाट संसदीय यात्रा सुरु गरेका थिए। ओली भने ०४८ देखि नै सांसद छन्। उनी ०६४ को संविधान सभा निर्वाचनमा मात्रै पराजित भएका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

राष्ट्रिय बीच भलिबल सिन्धुपाल्चोकमा हुने

सौगातको ‘बम बहादुर’ पुष ५ मा आउने, यस्तो छ टिजर

कांग्रेस–एमालेको सत्ता गठबन्धन अर्को निर्वाचनसम्म हुनेछ : नेता डा महत