पूर्वाधार

तीनमुखे झोलुङ्गे पुल बनेपछि गुल्मीमा आन्तरिक पर्यटक बढे (तस्बिरहरू)

अजय खड्का शुक्रबार, कात्तिक ४, २०७९ १३:१९

गुल्मी – तीनवटा जिल्लालाई जोड्ने तीनमुखे झोलुङ्गे पुलको निर्माण कार्य सम्पन्न भएको छ।

सो पुलको २०७१ साल मंसिर १५ गते तत्कालीन मुख्य सचिव लीलामणि पौडेल र संविधान सभा सदस्यसमेत रहेका कांग्रेस नेता चन्द्र भण्डारीले तामझासहित सामुहिक रुपमा शिलान्यास गरेका थिए। त्यसपछि पुलको काम अलपत्रमा पर्यो। पछि एमाले नेता प्रदीप ज्ञवाली सांसद भएपछि पुलले पूर्णता पाएको थियो।

सो पुलको नयाँ बाटो रुबिना मना जेबीले ललितपुरको पुल्चोकस्थित स्थानीय पूर्वाधार विभाग अन्तर्गतको झोलुङ्गे पुल शाखासँग नौ करोड ८८ लाख २६ हजार ३३२ रुपैयाँमा ठेक्का सम्झौता गरेको थियो।

तीनमुखे पुलले गुल्मीको रुरुक्षेत्र गाउँपालिका वडा नम्बर १ रिडी, पाल्पाको तानसेन नगरपालिका वडा नम्बर १४ अर्गली र स्याङ्जाको कालीगण्डकी गाउँपालिका वडा नम्बर १ चण्डीभञ्ज्याङ जोडेको छ। पुलको काम सकिएपछि उक्त स्थानमा आन्तारिक पर्यटकहरूकोे चहल–पहल सुरु भएको छ।

अहिले यो पुल अवलोकन गर्न र यसमा सवार गर्नका लागि धेरै ठाउँबाट मानिसहरू आउने गरिरहेका छन्। नेपालकै चारधाम मध्येको एक धाम भनेर चिनिने रुरुक्षेत्रमा तीनमुखे पुलको निर्माण भएपछि यस क्षेत्र रमणीय बनेको छ।

पुल निर्माण भएसँगै धार्मिक पर्यटनमात्र नभएर अन्य पर्यटकहरूको आर्कषण बन्ने स्थानीयको भनाइ छ। उनीहरूका अनुसार अब जोखिम मोलेर बजार भर्न जाने बाध्यता हट्यो।

पाल्पाको तानसेन नगरपालिका १४ र स्याङ्जाको कालीगण्डकी गाउँपालिका १ का स्थानीयको मुख्य बजार रिडी हो। पाल्पा जिल्ला सडक सञ्जालले जोडिए पनि स्याङ्जाको कालीगण्डकी गाउँपालिकासँग सजिलै सडकको पहुँच छैन।

यसले गर्दा, जोखिम मोलेर स्वास्थ्य उपचार र अन्य सामग्री खरिद–बिक्री गर्नुपर्ने बाध्यता थियो। अहिले पुल निर्माणपछि सहज भएको कालिगण्डकी गाउँपलिका १ का अमरप्रसाद कोइरालाले बताए।

‘पहिला–पहिला यो पुल नबन्दा हामीलाई बजार भर्नका लागि डुङ्गा चडेर वा अन्य जोखिम मोलेर आउनुपर्ने बाध्यता थियो तर, अहिले सजिलै ओहोर–दोहोर गर्न सजिलो भएको छ। हामीजस्ता वृद्धहरूलाई स्वास्थ्य उपचार गर्न जान–आउन झन् सजिलो भएको छ,’ उनले भने।

पुल सुहाउँदो बत्ती भएन

तीनमुखे झोलुङ्गे पुललाई रातको समयमा पनि उज्यालो पार्नका लागि सोलार बत्ती जडान गरिएको छ। तर, त्यो बत्तीले पुललाई उपयुक्त सुन्दरता दिन नसकेको स्थानीयको गुनासो छ।

‘पुल निर्माणको सुरुवातमा निर्माण व्यवसायीले बेलायतको लण्डन ब्रिजमा जस्तो बत्ती जडान गर्नका लागि एक करोड रकम राखिएको भनेका थिए,’ स्थानिय सुन्दर कसजुले भने, ‘तर, अहिले जोडिएको बत्ती नजिकबाट हेर्दा मोबाइलको टर्चलाइट बालेको जस्तो देखिएको छ। यसप्रति हामी स्थानीयको गुनासो छ।’

तीन जिल्लामा जानका लागि कालीगण्डकी नदीको बीचमा नौ मिटर रनिङ गोलाइ भएको स्तम्भ निर्माण गरिएको छ। पुलमा २५ मिटर उचाइको भ्युटावर छ। बीचमा निर्माण भएको स्तम्भबाट तीन जिल्लासम्म पुग्न तीनैतर्फ १७७ मिटर लामा झोलुङ्गे पुलको निर्माण भएको छ।

पुल निर्माणअन्तर्गत अन्तिम चरणमा जाली, सोलार र भर्‍याङको काम सकिएको निर्माण व्यवसायी करनजित बर्माले जानकारी दिए। यस पुल एसियाकै पहिलो नमुना तीनमुखे झोलुङ्गे पुल भएको निर्माण व्यवसायीको दाबी छ। पुल निर्माणको काम सकिए पनि उद्घाटन भने हुन सकेको छैन।